ދިވެހި ހުރިހާ ހައްޖުވެރިން މިހާރު ތިބީ މައްކާގައި. ހައްޖުވެރިންގެ ހާލު ރަނގަޅު: ޝަކީލް

ދިވެހި ހުރިހާ ހައްޖުވެރިން މިހާރު ތިބީ މައްކާގައި ހައްޖުވެރިން ތިބުމަށް ހަމަޖެހިފައިވާ ހޮޓާތަކުގައިކަމަށް ހައްޖު ކޯޕަރޭޝަނުގެ މެނޭޖިންގ ޑިރެކްޓަރު މުހައްމަދު ޝަކީލް ވިދާޅުވެއްޖެއެވެ.

ދިވެހި ހައްޖުވެރިންގެ ހާލަތާ ގުޅޭގޮތުން އެކްސްގައި ކުރެއްވި ޕޯސްޓެއްގައި ޝަކީލް ވިދާޅުވީ ޖުމްލަ ގޮތެއްގައި ދިވެހި ހުރިހާ ހައްޖުވެރިންގެ ހާލުވެސް ރަނގަޅުކަމަށެވެ. އެގޮތުން ޙައްޖުގެ އަޅުކަން ފުރިހަމަ ކުރުމަށް ހައްޖު ކޮޕަރޭޝަންގެ ހަވާލުގައި ސައުދީއަރަބިއްޔާއަށް ޒިޔާރަތްކުރި ހުރިހާ ހައްޖުވެރިން މިހާރު ތިބީ މައްކާގައި ދިވެހި ހައްޖުވެރިން ތިބުމަށް ހަމަޖެހިފައިވާ ހޮޓަލުގައިކަން އޭނާ ފާހަގަކުރެއްވިއެވެ.

ރާއްޖެއިން މިފަހަރު 1،000 މީޙުން ހައްޖުގެ އަޅުކަން އަދާކުރުމަށް މައްކާގައި ތިބިއިރު، އެމީހުންގެ ހުރިހާ އިންތިޒާމްތަކެއްވެސް ހަމަޖއްސާނީ ސަރުކާރުގެ ހައްޖު ކުންފުނި، ހައްޖު ކޯޕަރޭޝަނުންނެވެ. ހައްޖުގެ އަޅުކަން އަދާކުރުމަށް ސައުދީއަށް ދިޔަ ދިވެހިންނަށް ރަނގަޅު ހިދުމަތެއް ފޯރުކޮށްދިނުމުގެ ގޮތުން ސަރުކާރުން ވަނީ މިފަހަރު ގިނަ މަސައްކަތްތަކެއް ކޮށްފައެވެ. މިގޮތުން ކުރި އެންމެ މުހިއްމު މަސައްކަތަކީ މައްކާ ރޫޓް އިނީޝިއޭޓިވް ރާއްޖެއަށް ތައާރަފްކުރުމެވެ.

މައްކާ ރޫޓް އިނީޝިއޭޓިވްގެ ސަބަބުން މިފަހަރު ދިވެހި ހައްޖުވެރިން ސައުދީއަށް ފުރީ ވެލާނާ އިންޓަރނޭޝަނަލް އެއާޕޯޓުން އިމިގްރޭޝަން ތަތްގަނޑާއި ލަގެޖްތައް ޗެކްކޮށްގެންނެވެ. ނަތީޖާއަކަށްވީ ޖިއްދާގެ އެއާޕޯޓް އިމިގްރޭޝަން ކިއުގަ މަޑުކުރަން ނުޖެހި ސީދާ ހައްޖުވެރިން ތިބުމަށް ހަމަޖެހިފައިވާ ހޮޓާތަކަށް ދެވޭގޮތް ވުމެވެ. މިއީ އަދި ރައްޖޭގެ ހައްޖުވެރިންނަށް މުޅިން އަލަށް ލިބުނު ހިދުމަތެކެވެ.

މިފަހަރު ރާއްޖޭގެ ހައްޖުވެރިން މިނާގައި ތިބުމަށް ހަމަޖެހިފައިވާ ޓެންޓުތަކުގެ ފެންވަރުވެސް ވަނީ ވަރަށްބޮޑަށް ރަނގަޅުކޮށްފައެވެ. މިގެ އިތުރުން ދިވެހި ހައްޖުވެރިންނަށް ހާއްސަކޮށް ކްލިނިކެއްވެސް ވަނީ ގާއިމްކޮށްފައެވެ.