ދައުލަތުގެ ބެލުމުގެ ދަށަށް ކުއްޖަކު ގެންނަނީ، އެނޫން އެހެންގޮތެއް ނެތުމުން: މިނިސްޓްރީ

މައިންބަފައިންނާއި ޢާއިލާގެ އެއްވެސް ފަރާތަކުން ރައްކާތެރިކަން ކަށަވަރު ނުކުރެވޭ ޙާލަތުގައި މެނުވީ ދައުލަތުގެ ބެލުމުގެ ދަށަށް ކުއްޖަކު ނުގެނެވޭނޭކަމަށް ސިއްހަތާއި އާއިލާ އާއި އިޖުތިމާއީ އެހީއާބެހޭ ވުޒާރާއިން ބުނެފިއެވެ.

ތުއްތު ކުއްޖަކު ދައުލަތުގެ ބެލުމުގެ ދަށަށް ގެންދިޔަގޮތާ ގުޅޭގޮތުން ދެކެވެމުންދާ ވާހަކަތަކާ ގުޅިގެން އިޖުތިމާއީ އެހީއާ ބެހޭ ވުޒާރާއިން ނެރުނު ނޫސްބަޔާނެއްގައި ބުނެފައިވަނީ ދައުލަތުގެ ބެލުމުގެ ދަށަށް ކުއްޖަކު ގެންނަނީ، އެނޫން އެހެންގޮތެއް ނެތުމުން ކަމަށެވެ. އެ ވުޒާރާއިން ބުނީ ދައުލަތުގެ ބެލުމުގެ ދަށަށް ކުދިން ގެންދިއުމުގައި ޢަމަލުކުރަނީ ޤާނޫނު ނަންބަރު 2019/19 (ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު) ގައި ކަނޑައެޅިފައިވާ އިޖުރާއާތުތަކާ އެއްގޮތައްކަމަށެވެ. އެ ޤާނޫނުގެ 8 ވަނަ މާއްދާގެ (ހ) ގައި ބަޔާންކޮށްފައިވާ ފަދައިން ކުޑަކުއްޖަކާ ގުޅޭ ކޮންމެ ނިންމުމެއްގައި އެންމެ ބޮޑު އިސްކަމެއް ދޭންޖެހޭނީ އެ ކުއްޖާގެ މަޞްލަޙަތު ޙިމާޔަތްކުރުމަށް ކަމަށެވެ.

ވުޒާރާއިން ބުނީ ކުއްޖެއްގެ ރައްކާތެރިކަން ޔަޤީން ނުވާ ޙާލަތުގައި ވެސް އެންމެ ފުރަތަމަ މަސައްކަތްކުރާނީ މައިންބަފައިންގެ ގާތުގައި ބައިންދައިގެން ޙައްޤުތައް ކަށަވަރުކޮށްދިނުމަށް ކަމަށެވެ. އެ ގޮތް ނެތިއްޖެ ނަމަ ޢާއިލާގެ ތެރެއިން ރައްކާތެރިކަން ފޯރުކޮށްދެވޭނެ ފަރާތެއް ހޯދުން އިސްކުރާ ކަމަށާއި މައިންބަފައިންނާއި ޢާއިލާގެ އެއްވެސް ފަރާތަކުން ރައްކާތެރިކަން ކަށަވަރު ނުކުރެވޭ ޙާލަތުގައި މެނުވީ ދައުލަތުގެ ބެލުމުގެ ދަށަށް ނުގެނެވޭނެ ކަމަށެވެ.

ހަމައެހެންމެ މައިންބަފައިންގެ ކިބައިގައި ނުކުޅެދުންތެރިކަމެއް ހުރުމަކީ ކުއްޖާ ވަކިކުރުމުގެ ޞައްޙަ ސަބަބެއް ނޫން ކަމަށާއި ދައުލަތުގެ ބެލުމުގެ ދަށަށް ނެގުމަކީ އެ ޤާނޫނުގެ ދަށުން އެޅޭނެ އެންމެ ފަހު ފިޔަވަޅު ކަމަށް ވެސް ބަޔާނުގައި ފާހަގަކޮށްފައިވެއެވެ.

ކުޑަކުދިންނާއި ނާޒުކު ޙާލަތުގައި ދިރިއުޅެމުންދާ ފަރާތްތަކާ ގުޅޭ ޚަބަރުތައް ގެނެސްދެވޭ ގޮތުން އެ ފަރާތްތައް އިތުރު ނާޒުކު ޙާލަތަކަށް ހުށަހެޅުމުގެ ފުރުޞަތު އޮތް ކަމަށް ވެސް ވުޒާރާގެ ބަޔާނުގައި ބުނެފައިވެއެވެ. އެހެންކަމުން މިފަދަ ޚަބަރުތައް ދައުރުކުރުމުގައި މީޑިއާއާއި މީސް މީޑިއާ ބޭނުންކުރާ ފަރާތްތަކުން ސަމާލުވުމަށާއި ޞައްޙަ ނޫން މަޢުލޫމާތު ނުފެތުރުމަށް ވުޒާރާއިން ވަނީ އިލްތިމާސްކޮށްފައެވެ.

ޤާނޫނު ނަންބަރު 2019/19 ގެ 88 ވަނަ މާއްދާގެ ދަށުން ކުއްޖެއްގެ ރައްކާތެރިކަން ކަށަވަރު ނުވާ ޙާލަތެއް މެދުވެރިވެއްޖެ ނަމަ ވަގުތުން ފިޔަވަޅު އެޅުމުގެ ބާރު ދައުލަތަށް ލިބިދީފައިވާކަން ފާހަގަކޮށްލެވެއެވެ.