މައުރޫފް ސަރުކާރަށް؛ އިސްރާއީލު ޕާސްޕޯޓް މަނާކުރަން ބޭނުންނުވާނަމަ އެގޮތަށް ކަނޑައަޅުއްވަންވީ ނޫންތޯ

އިސްރާއީލު ޕާސްޕޯޓް މަނާކުރަން ބޭނުންނުވާނަމަ އެގޮތަށް ކަނޑައެޅުމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު، މައުރޫފް ޒާކިރު ސަރުކާރަށް ގޮވާލައްވައިފިއެވެ.

މިއަދު އެމްޑީޕީގެ ޕާލިމެންޓަރީ ގްރޫޕުން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން، މައުރޫފް ވިދާޅުވީ، އިސްރައީލުގެ ޕާސްޕޯޓް މަނާކުރުމުގެ މަސައްކަތް މަޖިލީހުން ނުކުރާ ކަމަށް ބުނާ ބުނުން ބަލައިނުގަނެވޭ ކަމަށެވެ.

ރާއްޖެއިން އިސްރާއީލުގެ ޕާސްޕޯޓް މަނާ ކުރުމުން މުޅި މައްސަލަ ހައްލު ވަނީ ނޫންކަން ފާހަގަ ކުރައްވަމުން މައުރޫފް ވިދާޅުވީ، މިއަދު ޣައްޒާގެ ބިމުގައި ހިނގަމުންދަނީ އިސްލާމީ ރައްޔިތުންތަކެއް ނުވަތަ އެތަނުގެ ނަސްލު ނައްތާލުމުގެ ބޮޑު ޖަރީމާއެއްކަމަށާއި،  ދިވެހިންނަކީ ފަލަސްތީނަށް އިހުތިރާމް ކުރާ، ފަލަސްތީނުގެ ރައްޔިތުންގެ ހައްގުގައި އަބަދުވެސް އަޑު އުފުލަމުން އަންނަ ބައެއް ކަމަށެވެ.

"ދިވެހި ރައްޔިތުންނަށް ހަޖޫ ޖަހާ، އޮޅުވާލާ، ބޮޑު ސިޔާސީ ކަމަކަށް މިކަން ހަދައިގެން ސަރުކާރުން ގެންދާ ގެންދިޔުމަކީ މިއީ އަޅުގަނޑުމެންގެ ވަރަށް ބޮޑު ކަންބޮޑުވުމެއް."

މައުރޫފް ވިދާޅުވިއެވެ.

އިސްރާއީލުގެ ޕާސްޕޯޓު މަނާކުރުން ލަސްވުމާއި ގުޅިގެން ޕީއެންސީން ނޫސްބަޔާން ނެރުނު ސަބަބާއި ގުޅޭގޮތުން ސުވާލު އުފައްދަވަމުން މައުރޫފް ވިދާޅުވީ، މަޖިލީހަށް ހުށަހެޅޭ ބިލެއް އެއްދުވަހުގެ ތެރޭގައި ގަނޫނަކަށް ފާސްވެގެންދާކަމަށާއި، އެއް ދުވަހުގެ ތެރޭގައި ކޮމެޓީ މަރުހަލާ ނިންމާލާކަމަށެވެ.

އެހެންކަމުން ފަލަސްތީނުގެ މައްސަލައިގައި ސަރުކާރުން އިސްރާއީލުގެ ޕާސްޕޯޓު މަނާކުރަން ބޭނުންނުވާނަމަ އެކަން އެގޮތަށް ކަނޑައެޅުއްވުމަށް މައުރޫފް ވަނީ ސަރުކާރަށް ގޮވާލައްވާފައެވެ.

"ފަލަސްތީނު މި މައްސަލައިގައި ވަކި ގޮތެއް، ސަރުކާރުން ޕާސްޕޯޓް ބޭން ކުރަން ބޭނުންނުވާކަމުގައި ވާނަމަ އެކަން އެގޮތަށް ކަނޑައަޅުއްވަންވީ ނޫންތޯ؟"

މައުރޫފް ވިދާޅުވިއެވެ.

މައުރޫފް އިތުރަށް ވިދާޅުވީ، މިކަންކަމުގައި ރައްޔިތުން ނުކުމެ ސަރުކާރު ހަމަމަގަށް އަޅުވަން ޖެހޭ ކަމަށާއި، އެހެންނޫންނަމަ މުޒާހަރާ ކުރަން ޖެހޭނީ 100 ފޫޓު ދުރުން ނޫންކަމަށާއި، މާލޭގައި ވެސް މުޒާހަރާކޮށް، އެއްވެ އުޅުމަށް ފުރުސަތު ނުދޭނެ ކަމަށެވެ.

މިއީ ރައްޔިތުންނަށް ގެއްލިގެންދާ ހައްގުތަކަށް ތެދުވަންވީ ވަގުތު ކަމަށާއި، މި މަސައްކަތް ކުރުމުގައި އެމްޑީޕީ އަށް ނިސްބަތްވާ މަޖިލީހުގެ 12 މެމްބަރުން ދެމިތިބޭނެކަމަށް މައުރޫފް ވިދާޅުވިއެވެ.