ހަންޏާމީދޫ އާއި މާވަށު ގޮނޑުދޮށް ހިމާޔަތްކުރަން އެމްޓީސީސީއަށް

އދ. ހަންޏާމީދޫ އާއި ލ. މާވަށު ގޮނޑުދޮށް ހިމާޔަތްކުރުމުގެ މަސައްކަތް އެމްޓީސީސީއާ މިއަދު ހަވާލުކޮށްފި އެވެ.

ކޮންސްޓްރަކްޝަން މިނިސްޓްރީގައި މިއަދު ބޭއްވި ރަސްމިއްޔާތެއްގައި ހަންޏާމީދޫ ގޮނޑުދޮށް ހިމާޔަތްކުރުމުގެ މަޝްރޫއުގައި ކޮންސްޓްރަކްޝަން މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު އިބްރާހިމް ނަޒީމީއެވެ. އަދި އެމްޓީސީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަހުމަދު ސައުދީ އެވެ.

240 ދުވަސް ނުވަތަ ގާތްގަނޑަކަށް ހަތް މަހުން ނިންމާ ގޮތަށް މި މަޝްރޫޢު ހަވާލުކޮށްފައިވަނީ 46.2 މިލިއަން ރުފިޔާއަށެވެ.

މި މަޝްރޫޢުގެ ދަށުން 14،322.75 ކިއުބިކް މީޓަރުގެ ރާޅުވެލި އަޅައި، 14،322.75 ކިއުބިކް މީޓަރުގެ ހިމުންވެލި އެޅުމުގެ އިތުރުން، 455 މީޓަރުގެ ބޮޑުހިލައިގެ ބޭރު ތޮއްޓެއް ލައި 440 މީޓަރުގެ ބޮޑުހިލައިގެ ގްރޮއިން ޖެހުމަށް ވަނީ ހަމަޖެހިފައެވެ.

ލ. މާވަށު ގޮނޑުދޮށް ހިމާޔަތްކުރުމުގެ މަޝްރޫއު 89.13 މިލިއަން ރުފިޔާއަށް 540 ދުވަސް ނުވަތަ ގާތްގަނޑަކަށް ދޮޅު އަހަރުން ނިންމަން ހަވާލުކުރި މަޝްރޫޢުއެކެވެ.

ކޮންސްޓްރަކްޝަން މިނިސްޓްރީގައި މިއަދު ބޭއްވި ރަސްމިއްޔާތެއްގައި މި މަޝްރޫއުގެ އެއްބަސްވުމުގައި ސޮއިކުރެއްވީ ކޮންސްޓްރަކްޝަން މިނިސްޓްރީގެ ސްޓޭޓް މިނިސްޓަރު އިބްރާހިމް ނަޒީމް އާއި އެމްޓީސީސީގެ މެނޭޖިން ޑިރެކްޓަރު އަހުމަދު ސައުދީއެވެ.

މި މަޝްރޫޢުގެ ދަށުން 166،400 ކިއުބިކް މީޓަރުގެ ރާޅުވެލި ގޮނޑުދޮށަށް އަޅައި، 55،500 ކިއުބިކް މީޓަރުގެ ހިމުންވެލި ގޮނޑުދޮށަށް އެޅުމުގެ އިތުރުން، 7،500 ކިއުބިކް މީޓަރު ފަތާ ސަރަހައްދު ފުންކުރުމާއި 524 މީޓަރުގެ ބޮޑުހިލައިގެ ރިވެންޓްމެންޓެއް ޖަހާނެއެވެ.

ހަމަ އެހެންމެ، 2،024 މީޓަރުގެ ޖިއޯބޭގް ރިވެންޓްމެންޓެއް ޖަހައި، 180 މީޓަރުގެ ބޮޑުހިލައިގެ ގްރޮއިން ޖަހައި 260 މީޓަރުގެ ޖިއޯބޭގް ގްެރޮއިން ޖަހާނެއެވެ.