ހުޅަނގު އައްސޭރި ރަސްމީކޮށް ހިފުމަށް އިސްރާއީލުގެ މަކަރުވެރި ރޭވުމެއް؛ ފަލަސްތީނުން ކުށްވެރިކޮށްފި

މުޅި ދުނިޔޭގެ ސަމާލުކަން ގައްޒާގައި ހިނގަމުންދާ ގަތުލުއާންމަށް ހުއްޓިފައިވާ ދަނޑިވަޅެއްގައި، އިސްރާއީލު ސަރުކާރުން ހުޅަނގު އައްސޭރީގައި "ގާނޫނީ ބަޣާވާތެއް" ހިންގައި، އެ ބިންތައް ރަސްމީކޮށް އިސްރާއީލުގެ ދަށަށް ގެނައުމަށް ފިޔަވަޅުތަކެއް އަޅަން ފަށައިފިއެވެ.

މިދިޔަ އާދީއްތަ ދުވަހުގެ ރޭ އިސްރާއީލުގެ ސެކިއުރިޓީ ކެބިނެޓުން ވަނީ މާލީ ވަޒީރު ބެޒަލެލް ސްމޮޓްރިޗް އާއި ދިފާއީ ވަޒީރު އިސްރާއީލް ކާޓްޒް ހުށަހެޅި ސިޔާސަތުތަކެއް ފާސްކޮށްފައެވެ.

މި އާ ފިޔަވަޅުތަކުގެ މަގްސަދަކީ ގަދަކަމުން ފޭރިގެންފައިވާ ހުޅަނގު އައްސޭރީގައި އިސްރާއީލުގެ ބާރު ފުޅާކުރުމާއި، ފަލަސްތީނުގެ ބިންތައް ޣައިރު ގާނޫނީ ގޮތެއްގައި އަތުލަން ފަސޭހަކުރުމެވެ.

މިކަމާ ގުޅޭގޮތުން ވާހަކަ ދައްކަމުން ދިފާއީ ވަޒީރު ކާޓްޒް ބުނީ، ޔަހޫދީ އާބާދީތައް ބިނާކުރުމަކީ އިސްރާއީލު ސަރުކާރުގެ ސިޔާސަތުގެ ވަކިނުކުރެވޭނެ ބައެއްގެ ގޮތުގައި ހަމަޖައްސަމުންދާ ކަމަށެވެ.

ގާނޫނީ މާހިރުން ފާހަގަކުރާ ގޮތުގައި، މި ނިންމުމުގެ ސަބަބުން ހުޅަނގު އައްސޭރީގެ މަދަނީ އަދި ގާނޫނީ ހާލަތަށް ވަރަށް ބޮޑެތި ބަދަލުތަކެއް އަންނާނެއެވެ. އަދި އެތައް އަހަރެއް ވަންދެން ޣައިރު ގާނޫނީ އާބާދީތައް ފުޅާކުރުމަށް ހުރި "ގާނޫނީ ހުރަސްތައް" މި ނިންމުމުގެ ސަބަބުން ނެތިގެންދާނެ ކަމަށް އިސްރާއީލުގެ ވަޒީރުން ވަނީ ބުނެފައެވެ.

ފަލަސްތީނުގެ ރިއާސަތުން މި ނިންމުންތަކަކީ "ނުރައްކާތެރި" ނިންމުންތަކެއްގެ ގޮތުގައި ސިފަކޮށް، މިއީ އާބާދީތައް ފުޅާކުރުމަށާއި ބިންތައް ފޭރިގަތުމަށް އިސްރާއީލުން ހިންގާ ފާޅުކަން ބޮޑު އަމަލެއް ކަމަށް ބުނެފައެވެ.

ރައީސް މަހްމޫދު އައްބާސްގެ އޮފީހުން ވަނީ އެމެރިކާއަށާއި އދ. ގެ ސަލާމަތީ މަޖިލީހަށް މިކަމުގައި ވަގުތުން ތަދަޚުލްވުމަށް ގޮވާލާފައެވެ.

މިދިޔަ ހޯމަ ދުވަހު، އިސްލާމީ އަށް ގައުމަކުން ވަނީ ހުޅަނގު އައްސޭރީގެ މައްޗަށް "ޣައިރު ގާނޫނީ އިސްރާއީލުގެ ސިޔާދަތު" ފެތުރުމަށް ކުރާ މަސައްކަތް ހަރުކަށި އިބާރާތުން ކުށްވެރިކޮށްފައެވެ.

ފަލަސްތީނުގެ އޮފިޝަލުންނާއި ގާނޫނީ މާހިރުން އިންޒާރު ދެއްވާ ގޮތުގައި، އިސްރާއީލުގެ މި އަމަލުތަކުގެ ސަބަބުން 1993 ވަނަ އަހަރުގެ އޮސްލޯ މުއާހަދާ އަމަލީ ގޮތުން ނިމުމަކަށް އަންނާނެއެވެ. އަދި ފަލަސްތީނުގެ އިދާރާ (ޕީ.އޭ) އަށް ލިބިފައިވާ މަދަނީ ބާރުތައް ގެއްލި، ހުޅަނގު އައްސޭރި އިސްރާއީލުގެ ބައެއްގެ ގޮތުގައި ހެދުމަށް ކުރާ މަސައްކަތްތައް ގާނޫނީ އޮނިގަނޑެއްގެ ތެރެއަށް ފެތިގެންދާނެއެވެ.