ޕީޕީއެމް/ޕީއެންސީގެ މަސައްކަތް ކުރިއަށްދާގޮތް އެނގޭނީ ޕާޓީ ދޫކުރައްވައި ވަޑައިގެންނެވި ބޭފުޅުންނަކަށް ނޫން: ހީނާ

ޕީޕީއެމް/ޕީއެންސީގެ މަސައްކަތް ކުރިއަށްދާގޮތް އެނގޭނީ ޕާޓީ ދޫކުރައްވައި ވަޑައިގެންނެވި ބޭފުޅުންނަކަށް ނޫން ކަމަށް މަޖިލިސް އިންތިހާބުގެ ޕްރޮގްރެސިވް ކޮންގްރެސްގެ ޗީފް ސްޕޯކްސްޕާސަން އަދި އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.

މަޖިލިސް އިންތިހާބުގައި ޕީޕީއެމް އަދި ޕީއެންސީގެ ފަރާތުން ވާދަކުރާނެ ކަމަށް މީގެ ކުރިން އެ ކޯލިޝަނުން ބުނި ނަމަވެސް، އިންތިޚާބުގައި ވާދަކުރައްވަނީ ޕީއެންސީގެ ކެންޑިޑޭޓުން އެކަންޏެވެ. އެކަމާއި ގުޅިގެން ޕްރޮގްރެސިވް ކޮންގްރެސްގެ ޗީފް ސްޕޯކްސްޕާސަންގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއެއް ކުރި ސުވާލަށް ޖަވާބު ދެއްވަމުން ހީނާ ވިދާޅުވީ، ޕީއެންސީއަކީ މި ވަގުތު ވެރިކަން ކުރާ ޕާޓީ ކަމަށާއި، މަޖިލިސް އިންތިހާބުގައި ޕީއެންސީން ހުރިހާ ކެންޑިޑޭޓުން ވާދަކުރަން ނިންމުމަކީ ޕީޕީއެމް އަދި ޕީއެންސީގެ ލީޑަޝިޕްގެ ނިންމުމެއް ކަމުގައެވެ.

ޕީއެންސީއަކީ މި ވަގުތު ވެރިކަން ކުރާ ޕާޓީ، ދެން މަޖިލިސް އިންތިހާބުގައި ޕީއެންސީން ހުރިހާ ކެންޑިޑޭޓުން ވާދަކުރަން ނިންމުމަކީ ޕީޕީއެމް އަދި ޕީއެންސީގެ ލީޑަޝިޕްގެ ނިންމުމެއް. އެއީ ދެޕާޓީގެ ޖުމްލަ ނިންމުމެއް. އެއްގޮތަކަށް ޕީޕީއެމް އެއްލާލީއެއް ނޫން. ޕީޕީއެމްގެވެސް މިވަގުތުގެ ލީޑަރަކީ ރައީސުލްޖުމްހޫރިއްޔާ ޑރ މުއިއްޒު

ހީނާ ވަލީދު

ހީނާ ވިދާޅުވީ ދެ ޕާޓީގައިވެސް ތިއްބަވަނީ ޕާޓީގެ މެންބަރުން ކަމަށާ، ރައީސުލްޖުމްހޫރިއްޔާ މަސައްކަތް ކުރައްވަނީ ދެ ޕާޓީއާއެކުވެސް މަޝްވަރާ ކުރެވިގެން ކަމަށެވެ.

އަދި ޕީޕީއެމްގެ އަދި ޕީއެންސީގެ ކަންކަން ކުރިއަށްދާގޮތް ދުރުގައި ތިއްބަވާ ބޭފުޅުންނަށް އެނގިވަޑައެއް ނުގަންނަވާނެ ކަމަށް ވިދާޅުވެ ހީނާ ވަނީ ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި ޕީޕީއެމްގެ ނަމުގައި ވާދަކުރުމުގެ ފުރުސަތު އެޕާޓީގެ މެމްބަރުންނަށް ދީފައި ނުވާކަމަށް ވިދާޅުވެ ކުރީގެ ރައީސް އަދި ކުރީގެ ޕީޕީއެމްގެ ލީޑަރ ޔާމިން އަބްދުލްގައްޔޫމް ދައްކަވަމުން ގެންދަވާ ވާހަކަތަކަށް ރައްދު ދެއްވާފައެވެ.

ދެން ޕީޕީއެމްގެ ކަންތައް ކުރިއަށްދާ ގޮތް، ޕީއެންސީގެ މަސައްކަތްތައް ކުރިއަށް ދާ ގޮތް އެނގިވަޑައިގަންނަވާނީ އަޅުގަނޑުމެންނަށް. ދުރުގައި ތިއްބަވާ ބޭފުޅުންނަކަށް މަސައްކަތްތައް ކުރިއަށް ދާ ގޮތެއް އެނގިވަޑައެއް ނުގަންނަވާނެ. އަދި ޕާޓީ ދޫކުރައްވައި ވަޑައިގެންނެވި ބޭފުޅުންނަކަށް ވެސް މިވަގުތު ޕާޓީގެ ކަންކަން ދާގޮތެއް އެނގިވަޑައިނުގަންނަވާނެ.

ހީނާ ވަލީދު

ހީނާ މިހެން ވިދާޅުވެފައި ވާއިރު، ކުރިޔަށް އޮތް ރައްޔިތުންގެ މަޖިލިހުގައި ޕީއެންސީގެ ޓިކެޓްގައި މަހިބަދޫ ދާއިރާއަށް ވާދަކުރާ އަހުމަދު ތާރިގް(ޓޮމް)އާއި އޭދަފުށީ ދާއިރާއަށް ވާދަކުރާ އަހުމަދު ސަމީމް (ރެޑް ވޭވް ސަލީމް) އާއި ދެބޭފުޅުން ޕީއެންސީގެ ނަމުގައި އެ ދެދާއިރާއަށް ވާދަކުރަނީ ޕީޕީއެމްގެ ޓިކެޓްގައި ވާދކުރަން ހުއްދަ ނުލިބިގެން ކަމުގައި ޔާމިން ވަނީ ވިދާޅުވެފައެވެ.