ބިން ނުހިއްކަން ނިންމި ނިންމުން ބަދަލުކުރަން ދޮންފަނު ކައުންސިލުން ގޮވާލައިފި

ބ. ދޮންފަނުގެ ބިން ހިއްކުން ކުރިޔަށް ނުގެންދިއުމަށް ނިންމި ނިންމުން ބަދަލުކުރަން އެ ރަށު ކައުންސިލުން ގޮވާލައިފި އެވެ.

އެކަމަށް ގޮވާލާ އެ ކައުންސިލުން ވަނީ ބަޔާނެއް ނެރެފަ އެވެ. ސަރުކާރު ހިންގާ ކޮންގްރެސް ޕާޓީގެ އެއްވެސް ކައުންސިލަރަކު ނުހިމެނޭ ދޮންފަނު ކައުންސިލުން އެކަމަށް ގޮވާލީ ވަރަށް ގިނަ ބައެއްގެ އެދުމުގެ މަތީން ދޮންފަނުގެ ބިން ހިއްކުން ކުރިޔަށް ނުގެންދިއުމަށް ނިންމާ އެކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރެއްވުމުންނެވެ.

ރައީސް އެކަން އިއުލާނު ކުރައްވާ ވިދާޅުވީ ދޮންފަނުގެ ރައްޔިތުންގެ އެދުމުގެ މަތިން އެ ރަށުގައި ބިން ހިއްކުމުގެ މަޝްރޫޢެއް ހިންގަން ވަޢުދުވެވަޑައިގެންނެވިން ކަމަށާއި، އެ މަސައްކަތް ކުރުމަށް އެއްބަސްވުމެއްގައި ވެސް ސޮއިކުރެއްވި ކަމަށެވެ. އެހެން ނަމަވެސް މިހާރު އެ މަސައްކަތްކުރުމަށް ރައްޔިތުން ބޭނުންނުވާކަން ރައްޔިތުންގެ ފަރާތުން އެމަނިކުފާނަށް އެނގިފައިވާތީ އެ މަސައްކަތް ހުއްޓާލާފައިވާ ކަމަށް ރައީސް މިއަދު ވަނީ އިއުލާނު ކުރައްވާފަ އެވެ.

ދޮންފަނު ބިން ހިއްކަން ނިންމުމާއި ގުޅިގެން އެ ރަށާއި ކިލޯމީޓަރެއްހާ ކައިރީގައި އޮންނަ ހަނިފަރަށް ދޮންފަނު ހިއްކުމުން އަސަރުކުރާނެ ކަމަށް ބުނެ ވަރަށް ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. އެތަނަކީ ބައޮސްފެއާ ރިޒާވްއަކަށް ވާއިރު، އެތަނަކީ މުޅި ދުނިޔެއިން ވެސް ވަރަށް މަދުން ފެންނަ ފަދަ މަންޒަރުތައް ފެންނަ ސަރަހައްދެކެވެ. 539 ހެކްޓަރުގެ ބޮޑު ސަރަހައްދަކީ ފެހުރިއްސާއި އެންމަޑި ފަދަ ތަކެތި ކާނާ ހޯދުމަށް ޖަމާވާ ތަނެކެވެ.

ނަމަވެސް ކައުންސިލުން ނެރުނު ބަޔާނުގައި ބުނެފައިވަނީ ބިން ހިއްކުމަކީ ރައްޔިތުންގެ ވަރަށް ބޮޑު އުންމީދެއް ކަމަށެވެ. އަދި ރައްޔިތުން އެންމެ ބޮޑަށް ބޭނުންވެފައިވާ އެއް މަޝްރޫއެއް ކަމަށެވެ. އެ މަޝްރޫއު ނުހިންގަން ނިންމީ މަޝްވަރާ ވެސް ނުކޮށް ކަމަށް އިދިކޮޅު އެމްޑީޕީގެ މެޖޯރިޓީ އޮންނަ ދޮންފަނު ކައުންސިލުން ވަނީ ބުނެފަ އެވެ.

އެހެން ކަމުން ރައީސްގެ ނިންމެވުން ބަދަލުކުރައްވާ ރައްޔިތުން އެދިފައިވާ ގޮތަށް ދޮންފަނުގެ ބިން ހިއްކުމުގެ މަސައްކަތް ވީހާ ވެސް އަވަހަކަށް ފަށައި ރައީސުލްޖުމްހޫރިއްޔާގެ ވައުދުފުޅާ އެއްގޮތަށް ރައްޔިތުންނަށް ދިމާވެފައިވާ ބޯހިޔާވަހިކަަމުގެ މައްސަލައަށް ހައްލު ހޯދައިދިނުމަށް ގޮވާލާފައިވެ އެވެ.