ބިމާއި ފްލެޓަށް އެދި ވިހި ހާހަށްވުރެ ގިނަ ފޯމް ހުށަހަޅައިފި: މުއްތަލިބް

ސަރުކށާރުން ހުޅުވާލާފައިވާ ފްލެޓާއިބިމަށް އެދި ވިހި ހާހަށްވުރެ ގިނަ ފޯމް ލިބިފައިވާކަމަށް ގެދޮރުވެރިކަމާއި ބެހޭ ވަޒީރު ޑރ. އަބްދުﷲ މުއްޠަލިބު ވިދާޅުވެއްޖެއެވެ.

މިނިސްޓްރީގެ މަސައްކަތްތައް ކުރިއަށްދާގޮތާ ބެހޭގޮތުން ރައީސުލްޖުމްހޫރިއްޔާގެ އޮފީހުގައި ނޫސްވެރިންނަށް މައުލޫމާތު ހިއްސާކުރައްވަމުން މިނިސްޓަރު މުއްތަލިބް ވިދާޅުވީ އަދުގެ ސަރުކާރުން ހުޅުވާލާފައިވާ ފްލެޓާއި ގޯއްޗަށް އެދި 20 ހާހަށްވުރެ ގިނަ ފޯމް ސަބްމިޓްކޮށްފައިވާކަމަށެވެ. މިނިސްޓަރު ވިދާޅުވީ، 20 ހާހަށްވުރެ ގިނަ ފޯމް ހުށަހެޅިއިރު ހުށަހެޅުމުގެ މަރުހަލާގައިވެސް 16 ހާހަށްވުރެ ގިނަ ފޯމް އެބައޮތް ކަމަށެވެ.

މިނިސްޓަރު ވިދާޅުވީ، ބޯހިޔާވަހިކަމަށް އެދި 36 ހާހަށްވުރެ ގިނަ ފޯމް ލިބޭނޭކަމަށް އަންދާޒާކުރެވޭކަމަށެވެ. ސަރުކާރުން ހުޅުވާލާފައިވާ ބޯހިޔާވަހިކަމަށް އެދުމުގެ ސުންގަނޑިއެއްގެ ގޮތުގައި ކަނޑައަޅާފައިވަނީ، އަންނަ މެއިމަހުގެ 31 ވަނަ ދުވަހެވެ.

ރައީސް ޑރ.މުހައްމަދު މުއިއްޒު ސަރުކާރުގެ ބޯހިޔާވަހިކަމުގެ ދަށުން ހުޅުމާލެ އަދި ވިލިމާލޭގައި އެޅުމަށް ނިންމައިފައިވާ ސޯޝަލް ހައުސިންގް ޔުނިޓްތަކުގެ މަސައްކަތް ވަނީ ފަށާފައެވެ. މީގެ ތެރެއިން ބީޔޫސީޖީ އާ ހަވާލުކޮށްގެން 1،190 ހައުސިންޔުނިޓް ހެދުމުގެ މަސައްކަތް ކުރިއަށްގެންދާއިރު، އަމީން ކޮންސްޓްރަކްޝަނާ ހަވާލުކޮށްގެން ހުޅުމާލެ ފޭސް 1 ގައި 364 ހައުސިން ޔުނިޓު އެޅުމަށް ވަނީ ނިންމާފަ އެވެ. މީގެ އިތުރުން އިތުރު ހައުސިން ޔުނައިޓްތައް އިމާރާތް ކުރުމުގެ މަސައްކަތްވެސް ވަނީ ފަށާފައެވެ.

ބީއެމްއެލް އެފޯޑަބަލް ހޯމް ލީސިން މޮޑަލްގެ ދަށުން އެކަނިވެސް ޖުމުލަ 3800 ހައުސިންގ ޔުނިޓް ތަރައްގީ ކުރުމަށް ވަނީ ނިންމާފައެވެ. މި މަޝްރޫއުގެ އަމަލީ މަސައްކަތް ނިންމުމަށް ހަމަޖެހިފައިވަނީ 2028 ވަނަ އަހަރު ނިމުމުގެ ކުރިންނެވެ.