އެންމެ ކަމުދާ, ސިޔާސީ ލީޑަރަކީ މޯދީ: މާރިޔާ

ދެކުނު އޭޝިޔާގެ ސަރަހައްދުގެ އެންމެ ކަމުދާ ސިޔާސީ ލީޑަރަކީ އިންޑިޔާގެ ބޮޑުވަޒީރު ނަރެންދުރަ މޯދީ ކަމަށް ރާއްޖޭގެ ކުރީގެ ޑިފެންސް މިނިސްޓަރ މާރިޔާ ދީދީ ވިދާޅުވެއްޖެއެވެ.

އިންޑިޔާގެ ’ސީއެންއެން ނިޔުސް 18‘ އަށް އިއްޔެ ދެއްވި ޚާއްސަ ބަސްދީގަތުމެއްގައި ޕްރެސެންޓަރ ވަނީ ދެކުނު އޭޝިޔާއިން މާރިޔާއަށް އެންމެ ކަމުދާ ސިޔާސީ ލީޑަރަކީ ކޮބައިތޯ ސުވާލު ކޮށްފައެވެ.

”އިންޑިޔާގެ ބޮޑުވަޒީރު ނަރެންދުރަ މޯދީ. މޯދީވަނީ ބައިނަލްއަޤުވާމީ ދުނިޔޭގައި އިންޑިޔާ ވަރަށް ކުރިއަށް ގެންގޮސްދީފައި. އަދި އޭނާ މަގާމާ ހަވާލުވިފަހުން ވަރަށް ގިނަ ކަންކަން އިންޑިޔާއަށް ވަނީ ކޮށްދީފައި. މީގެ އިތުރުން އޭނާ ގެންގުޅޭ ’ނެއިބަރ ހޫޑް ފަސްޓް‘ ޕޮލިސީ. އަހަރެމެން އަވަށްޓެރި ހުރިހާ ގައުމެއް ކުރިއަރައި ދާނީ އެކީގައޭ، ތިބޭނީ އެކީގައޭ.“ އެ ސުވާލުގެ ޖަވާބުގައި މާރިޔާ ވިދާޅުވިއެވެ.

މީގެ އިތުރުން، މާރިޔާ ވަނީ ރާއްޖެއާއި އިންޑިޔާގެ ގުޅުމަށް ވަރަށް ބޮޑަށް ތަޢުރީފް ކުރައްވައި، އިންޑިޔާއަކީ ރާއްޖޭގެ ”ދައްތަ“ އެއް ކަމަށް ވިދާޅުވެފައެވެ.

އެގޮތުން، އިންޑިޔާއިން ރާއްޖެއަށް ފޯރުކޮށްދެމުންދާ އެހީތައް ފާހަގަކުރައްވައި އޭނާ ވިދާޅުވީ، ދާދިފަހުންވެސް، ބޭރުގެ އެހެން ބައެއް ގައުމުތަކަށް ކާބޯތަކެތީގެ ގޮތުން އިންޑިޔާއިން ފޯރުކޮށް ނުދޭ އެހީތައް ބޮޑުކޮށް ރާއްޖެއަށް ދޭން ނިންމާފައިވާ ކަމަށެވެ.

އަދި ހަމަ އެހެންމެ، ޢުމްރާނީ ގޮތުންވެސް އިންޑިޔާއިން ރާއްޖެއިން ފޯރުކޮށްދެމުންދާ އެހީތަކާއި، ރާއްޖޭގެ ތަރައްޤީގައި އިންޑިޔާގެ ދައުރު ނުހަނު މުހިންމު ކަމުގައި އޭނާ ފާހަގަކުރެއްވިއެވެ.

މީގެ އިތުރުން، ރާއްޖެއާއި ޗައިނާއާއި ދެގައުމުގެ ތެރެއިން ރާއްޖެއަށް ރަނގަޅު ބައިވެރިއަކީ ކޮބައިތޯ ކުރެވުނު ސުވާލަށް ޖަވާބު ދެއްވަމުން މާރިޔާ ވަނީ، އިންޑިޔާގެ ކޮޅަށް ބުރަވެ، އިންޑިޔާއަކީ ރާއްޖޭގެ އަވަށްޓެރި ގައުމަކަށް ވާތީ ރާއްޖެއަށް އެންމެ ފައިދާ ކުރާނެ ރަނގަޅު ބައިވެރިއަކީ އެ ގައުމު ކަމަށް ވިދާޅުވެފައެވެ.

މާރިޔާ ވިދާޅުވިގޮތުގައި، މި ސަރުކާރު ވެރިކަމަށް އަންނަން ވެގެން ކުރިއަށް ގެންދިޔަ އިންޑިޔާ އައުޓް ކެންޕެއިންވެސް މިހާރު ވަނީ ނިމުމަކަށް އައިސްފައެވެ. އަދި އެކަން، އިންޑިޔާއިން ރާއްޖެއަށް ޒިޔާރަތްކުރާ ފަތުރުވެރިންގެ އަދަދުންވެސް މިހާރު އެނގި ހާމަވާ ކަމަށް އޭނާ ވިދާޅުވިއެވެ.