އިސްރާއީލާ ހެދި އެންމެފަހުން އިޓަލީގެ އެކި ހިސާބުތަކުގައި ސަރުކާރާދެކޮޅަށް މުޒާހަރާކުރަނީ

ޣައްޒާ ހިސާރުކޮށްފައި އޮތް އޮތުން ނިމުމަކަށް ގެނައުމަށް އިޓަލީގެ ރައްޔިތުން ފެށި ދަތުރަށް އިސްރާއީލްގެ ސިފައިން ހުރަސްއެޅި މައްސަލާގައި ކަންތައްވެދިޔަގޮތުން، އެންމެފަހުން އިޓަލީގެ މަގުތަކަށް ރައްޔިތުން މުޒާހަރާއަށް ނިކުމެއްޖެއެވެ.

އިޓަލީގެ އެކި ހިސާބުތަކުގައި އެޤައުމުގެ ސަރުކާރާ ދެކޮޅަށް ރައްޔިތުން މަގުތަކަށް ނިކުމެ މުޒާހަރާކުރަން ފަށާފައިމިވަނީ ޞުމޫދު ފްލޮޓިއްލާގައި ޣައްޒާއަށް ދިޔަ އިޓަލީގެ ރައްޔިތުން އިސްރާއީލުން ރަހީނުކުރި މައްސަލާގައި އިޓަލީގެ ބޮޑުވަޒީރު ޖިއޯޖިއާ މެލޯނީގެ ފަރާތުން ކަންކަންވެ ދިޔަ ގޮތުންނެވެ.

ޞުމޫދު ފްލޮޓިއްލާގައި އެންމެ ގިނަ އަދަދަކަށް މީހުން ބައިވެރިވި ޤައުމުތަކުގެ ތެރޭގައި އިޓަލީ ހިމެނޭއިރު، އިޓަލީގެ ބޮޑުވަޒީރު ވަނީ ދަތުރަށް ފެށުމުގެ ކުރިންވެސް އެކަމާ ދެކޮޅުކަމަށް ބުނެފައެވެ. ނަމަވެސް މި މައްސަލާގައި އިޓަލީ ރައްޔިތުން ވަނީ މަދަނީ ބަސްނޭހުމަކަށްގޮސް އެންމެފަހުން ޔޮޓްތަކުގައި ދަތުރުތައް ފަށައި އިސްރާއީލް ސިފައިންގެ އަތްދަށުވެފައެވެ. ޔޮޓްތަކުގައި ތިބި އިޓަލީގެ ރައްޔިތުން އިސްރާއީލް ސިފައިން ހައްޔަރުކޮށްފައިވާއިރު، މިކަމުގައި އިޓަލީ ސަރުކާރުން އަދި ވަކި އެއްޗެއް ބުނެފައެއް ނުވެއެވެ.

މި މައްސަލައާ ގުޅިގެން އިޓަލީގެ ޔޫނިއަންތަކުން ސަރުކާރާ ދެކޮޅަށް ނިކުމެފައިވާއިރު، އިޓަލީގެ ބޮޑެތި ސިޓީގެ މަގުތަކަށް ރައްޔިތުން ނިކުމެ މުޒާހަރާ ކުރަން ވަނީ ފަށާފައެވެ. މީގެ ތެރޭގައި މިލާން، ޓޮރިނޯ، ފްލޮރެންސް، ބޮލޯނާ ފާހަގަކޮށްލެވެއެވެ. އިޓަލީ ރައްޔިތުން މަގުތަކަށް ނިކުމެ ކުރަންފެށި މުޒާހަރާތަކުގައި ބައެއް ސިޓީތަކުގެ މޭޔަރުން ބައިވެރިވެއެވެ.

ރޯމް ސިޓީ ކައުންސިލުގެ މެމްބަރު ލޮރެންޒޯ ޖިއާޑިނެޓީ ވިދާޅުވީ، މިއީ އިސްރާއީލް ސިފައިން ޣައްޒާގައި ހިންގަމުންގެންދާ ގަތުލު އާއްމު ހުއްޓުވުަމަށް ކުރަމުންގެންދާ މަސައްކަތުގެ ބައެއްކަމަށެވެ. މުޒާހަރާގައި އިޓަލީގެ މަޝްހޫރު ކޮލޮސިއަމް ބިނާ ކައިރިއަށް 10،000 އަށްވުރެ ގިނަ މީހުން އެއްވިއިރު، މިލާންގައި ކުރިއަށްދިޔަ މުޒާހަރާތަކަށްވެސް ވަނީ 5،000 ހަށްވުރެ ގިނަ މީހުން ނިކުމެފައެވެ. މުޒާހަރާގެ ސަބަބުން އިޓަލީގެ އާއްމު ދަތުރުފަތުރަށް ހުރަސްއެޅިފައިވާކަމަށް ރޮއިޓާސްއިން ވަނީ ބުނެފައެވެ. މީގެ އިތުރުން އިޓަލީ މުޒާހަރާތައް މިއަދުން ފެށިގެން އިތުރަށް ބޮޑުވެގެންދާނޭކަމަށްވެސް މީޑިއާތަކުން ވަނީ ބުނެފައެވެ.