ހިންމަފުށީ ސްކޫލް އިންޓަ ހައުސް ފުޓްބޯޅަ އަދި ހޭންޑްބޯޅަ މުބާރަތް މި މަހު ފަށަނީ

ކ. ހިންމަފުށީ ސްކޫލުން އިންތިޒާމުކޮށްގެން ބާއްވާ އިންޓަ ހައުސް ފުޓްބޯޅަ އަދި ހޭންޑްބޯޅަ މުބާރާތް މި މަހު 19 ވަނަ ދުވަހު ފެށުމަށް ހަމަޖެހިއްޖެއެވެ.

ގާތްގަޑަކަށް 250އެއްހާ ދަރިވަރުން ތަޢުލީމު ޙާސިލްކުރާ ހިންމަފުށީ ސްކޫލުގެ ދަރިވަރުންގެ ކުލަބުތަކުގެ ދެމެދުގައި މި މުބާރާތްތައް ކުރިޔަށްދާނީ ދެ ޑިވިޝަނަކަށް ބަހާލައިގެންނެވެ. އެގޮތުން ފުޓްބޯޅަ އަދި ހޭންޑްބޯޅަ މުުބާރާތުގައި ވެސް ސީނިއާ އަދި ޖޫނިއާގެ ޑިވިޝަންތަކަށް ބަހާލައިގެން ކުލަބުތަކުގެ މެދުގައި ދަރިވަރުން ބައިވެރިވާނެއެވެ.

އެގޮތުން ފުޓްބޯޅަ އަދި ހޭންޑްބޯޅައިގެ ދެ ޑިވިޝަނުގައި ވެސް އެ ސްކޫލުގެ ތިން ކުލަބުކަމުގައިވާ އަލިމަސް، ޔާގޫތު އަދި އިތާމުތް ވާދަކުރާނެއެވެ.

މި މުބާރާތުގައި ސީނިއާ ޓީމުތަކުން ކުޅޭ މެޗުތަކުގެ ދިގުމިނަކީ ހާފެއްގައި 15 މިނެޓެވެ. އަދި ޖޫނިއާ ޓީމު 10 މިނެޓުގެ ހާފެއް ކުޅޭނެއިރު، ފަސް މިނެޓުގެ ބްރޭކެއް ދެ ޑިވިޝަނަށް ވެސް ދިނުމަށް ނިންމާފައިވެއެވެ.

މި މުބާރާތްތައް މި މަހުގެ 19ގައި ފަށާއިރު، މި މަހުގެ 22 ވަނަ ދުވަހުގެ ނިޔަލަށް ކުރިޔަށްދާނީ އެ މުބާރާތްތަކުގެ ގްރޫޕް ސްޓޭޖް ނުވަތަ ލީގު އުސޫލުން ކުޅޭ މެޗުތަކެވެ. އެ މެޗުތަކުން އެންމެ ގިނަ ޕޮއިންޓް ހޮވާ ޓީމުތަކުން ފައިނަލު މެޗުތައް ކުޅުން އޮންނާނީ މި މަހުގެ 23 ވާ ބުރާސްފަތި ދުވަހުއެވެ.

އެގޮތުން އެ ދުވަހު ހަވީރު 04:15 ގައި އެންމެ ފުރަތަމަ ޖޫނިއާ ހޭންޑްބޯޅަ ޓީމުގެ ފައިނަލު އޮންނައިރު، އެއަށްފަހު އޮންނާނީ ޖޫނިއާ ފުޓްބޯޅަ ޓީމުގެ ފައިނަލެވެ. އަދި އެ މެޗަށް ފަހު ހަމަ އެދުވަހުގެ ގާތްގަޑަށް 05:15 ހާއިރު ސީނިއާ ހޭންޑް ބޯޅައިގެ ފައިނަލް ކުޅޭނެ އިރު، ސީނިއާ ފުޓްބޯޅައިގެ ފައިނަލް ތާވަލުކޮށްފައިވަނީ ނިންމުމުގެ ރަސްމިއްޔާތާއެކު އެރޭ 08:15 ގައި ފަށާގޮތަށެވެ.