ޣައްޒާގެ ގަތުލުއާއްމާއި ގުޅޭގޮތުން ދެކުނު އެފްރިކާއިން ހުށަހެޅި މައްސަލައިގައި ސްޕެއިން އިން ބައިވެރިވަނީ

ޔަހޫދީ ފައުޖުން ޣައްޒާގައި ހިންގަމުން އަންނަ ގަތުލުއާއްމާއި ގުޅިގެން ދެކުނު އެފްރިކާއިން އިސްރާއީލާއި ދެކޮޅަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އަށް ހުށަހަޅާފައިވާ މައްސަލައިގައި ސްޕެއިން އިން ބައިވެރިވުމަށް ހުށަހަޅައިފިއެވެ.

އިސްރާއީލުން ޣައްޒާގެ ނަސްލު ނައްތާލުމުގެ ގޮތުން ލާއިންސާނީ އަމަލުތައް ހިންގަމުންދާތީ ދެކުނު އެފްރިކާއިން މި މައްސަލަ އައިސީޖޭ އަށް ހުށަހަޅާފައިވަނީ މިދިޔަ އަހަރުގެ ފަހުކޮޅެވެ.

މި މައްސަލައިގައި އެފްރިކާ އާއި އެކު ސްޕެއިން އިން ބައިވެރިވާނެ ކަމަށް އިއުލާނު ކުރައްވަމުން އެގައުމުގެ ޚާރިޖީ ވަޒީރު ހޯސޭ މެނުއަލް އަލްބާރެސް ވިދާޅުވީ، ސްޕެއިން އިން މިފަދައިން ނިންމީ، އިސްރާއީލުން ޣައްޒާގައި ހިންގަމުން އަންނަ ގަތުލުއާއްމު ހުއްޓުވައި، މެދުއިރުމައްޗަށާއި ހާއްސަކޮށް ޣައްޒާއަށް ހަމަޖެހުން ގެނައުމަށްޓަކައި ކަމަށެވެ.

ސްޕެއިން ގެ މި ނިންމުމާއިއެކު އެގައުމު ވެގެން ގޮސްފައިވަނީ ދެކުނު އެފްރިކާއިން ހުށަހެޅި މި މައްސަލައިގައި ހުޅަނގުން ބައިވެރިވި ފުރަތަމަ ގައުމަށެވެ.

ސްޕެއިން އިން މިފަދައިން ނިންމާފައިވާއިރު، އެގައުމާއި ނޯވޭ އާއި އަޔަރލޭންޑުން ވަނީ ދާދި ފަހުން ފަލަސްތީނުގެ ދައުލަތް ރަސްމީކޮށް ބަލައިގެންފައެވެ.

ސްޕެއިންގެ އިތުރުންވެސް، މެކްސިކޯ، ކޮލަމްބިއާ، ނިކަރާގޫއާ އަދި ލީބިޔާ އިން ވެސް ވަނީ މި މައްސަލައިގައި އެފްރިކާ އާއި އެކު ބައިވެރިވާން ބޭނުންވާކަން ހާމަކޮށް، އެކަމަށް އެދި ހުށަހަޅާފައެވެ. މިގައުމުތަކަށް މި މައްސަލައިގައި ބައިވެރިވެވޭނީ އައިސީޖޭއިން ގޮތެއް ނިންމުމުންނެވެ.

ކޯޓުން މި ގައުމުތައް މައްސަލައިގައި ބައިވެރިކުރަން ނިންމައިފިނަމަ، ފަލަސްތީނުގެ ހައްގުގައި ލިޔުމުންނާއި އާންމު އަޑުއެހުންތަކުގައި ވާހަކަ ދެއްކުމުގެ ފުރުސަތު މި ގައުމުތަކަށް ފަހިވެގެންދާނެ އެވެ.

ދެކުނު އެފްރިކާއިން ހުށަހެޅި މި މައްސަލައާއި ގުޅިގެން އައިސީޖޭއިން ބޭއްވި އަޑުއެހުމުގައި، ނިމިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީ ފައުޖުން ޣައްޒާއަށް ދެމުން އަންނަ ހަމަލާތައް ވަގުތުން ހުއްޓާލައި، އެއްވެސް ދަތިކަމެއް ނެތި ޣައްޒާއަށް އިންސާނީ އެހީ ފޯރުކޮށްދިނުމަށް ވަނީ އިސްރާއީލަށް އަމުރުކޮށްފައެވެ.

މި އަމުރަށް އިސްރާއީލުން ތަބާވެފައިނުވާއިރު، މި މައްސަލައާއި ގުޅިގެން ވަކާލާތު ކުރަމުން އެގައުމުން ވަނީ ޣައްޒާގައި ގަތުލުއާއްމު ހިންގާކަމަށް ދެކޮޅު ހަދާފައެވެ.

މި އަމުރު ނެރެފައިވަނިކޮށް، ޔަހޫދީން ޣައްޒާއަށް ދެމުން އަންނަ ހަމަލާތައް ވަރުގަދަކޮށް އެހީގެ މަގުތައް ބަންދުކޮށްފައިވާއިރު، ދާދި ފަހުން އެމީހުން ޣައްޒާގެ އުތުރުގައިވާ ޖަބަލިއާއިން ފޭބީ މުޅި ތަން ސުންނާފަތިކޮށްލުމަށް ފަހުއެވެ.