ބަޔަކު ޑރ.އަބްދުލް މަޖީދު ޝަހީދުކޮށްލީކަމަށް ކުރީގެ ހޯމް މިނިސްޓަރު އިމްރާނު ވިދާޅުވެއްޖެ

ދީނީ އިލްމުވެރިޔާ ޑރ.އަބްދުލް މަޖީދު އަބްދުލްބާރީ އަވަހާރަވީ ކޮންމެވެސް ބަޔަކު ކުރިކަމެއްގެ ސަބަބުންކަމަށް ކުރީގެ ހޯމް މިނިސްޓަރު ސެއިހް އިމްރާން ޢަބްދުﷲ ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި އަދާލަތު ޕާޓީގެ ރައީސްކަންވެސް ކުރައްވަމުން ގެންދަވާ އިމްރާން ވިދާޅުވީ، ޑރ ޢަބްދުލްމަޖީދުގެ ކުއްލި މަރާ ގުޅިގެން މިއޮތް ހުރިހާދުވަހު ހިތުގައި އުފެދިފައި އޮތް ޝައްކު މިހާރު ޔަގީންވާ ހިސާބައް އަތުވެއްޖެ ކަމަށެވެ. އެގޮތުން ޑރ.މަޖީދު ބަޔަކު ޝަހީދުކޮށްލީކަމަށް އިމްރާން ވިދާޅުވިއެވެ.

ބަޔަކު ޑރ.މަޖީދު އަވަހާރަކޮށްލިކަމަށް އިމްރާނު ވިދާޅުވިނަމަވެސް މިކަމާ ގުޅޭ އިތުރު ތަފްސީލެއް ވިދާޅުވެފައެއް ނުވެއެވެ.

ކުރީ ސަރުކާރުގައި ހޯމް މިނިސްޓަރުކަން ކުރެއްވި އިމްރާން އަބްދުﷲ މިހާރު ދިރިއުޅުއްވަމުން ގެންދަވަނީ، ބެންކޮކްގައެވެ. ޑރ.އަބްދުލް މަޖީދުގެ މަރާ ގުޅޭގޮތުން އިމްރާން ވާހަކަދައްކަވާފައިވާއިރު، އެމަނިކުފާނު ދާހިލީ ވަޒީރަކަށް ހުންނެވިއިރު، ޑރ.މަޖީދުގެ މަރާ ގުޅޭގޮތުން މިފަދަ ސީރިއަސް ވާހަކަތަކެއް ހާމަކުރައްވާފައެއް ނުވެއެވެ.

ޑރ.މަޖީދު އަވަހާރަވީ އަވައްޓެރި ސްރީލަންކާގައި 2018 ވަނަ އަހަރު މެއިމަހުގެ 22 ވަނަ ދުވަހުއެވެ. އަވަހާރަވީ ހާލު ސީރިއަސްވެ ހޮސްޕިޓަލުގެ އައިސީޔޫގައި ފަރުވާދެއްވަމުންދަނިކޮށެވެ. އަވަހާރަވިއިރު އެމަނިކުފާނުގެ އުމުރުފުޅަކީ 55 އަހަރެވެ.

ކުރީގެ ރައީސް މުހައްމަދު ނަޝިދުގެ ވެރިކަމުގައި އިސްލާމީ ވުޒާރާގެ ވަޒީރުކަން ކުރެއްވި ޑރ.އަބްދުލް މަޖީދަކީ ރާއްޖޭގެ ފުރަތަމަ އިސްލާމިކް މިނިސްޓަރެވެ. އެމަނިކްފާނު ވަނީ ތަފްސީރު އިލުމުން ޕީއެޗްޑީ ހާސިލުކުރައްވާފައިވާފައެވެ.