ބޯޑަރު ބެލެހެއްޓުމަކީ ޤާނޫނީ ޒިންމާއެއް؛ ނުރަނގަޅު ތަޞައްވުރު ފެތުރުން ހުއްޓާލުމަށް ކަސްޓަމްސްއިން އިލްތިމާސްކޮށްފި

ރާއްޖެއަށް އެތެރެކުރުން މަނާތަކެތި ބޯޑަރުން އެތެރެވިޔަނުދީ ހިފެހެއްޓުމަކީ ކަސްޓަމްސްގެ ޤާނޫނީ ޒިންމާއެއް ކަމަށާއި، އެ މަސައްކަތާމެދު ރައްޔިތުންގެ މެދުގައި ނުރަނގަޅު ތަޞައްވުރެއް އުފެދޭގޮތަށް ޢަމަލުނުކުރުމަށް މޯލްޑިވްސް ކަސްޓަމްސް ސަރވިސްއިން އިލްތިމާސްކޮށްފިއެވެ.

ކަސްޓަމްސްއިން ނެރުނު ނޫސް ބަޔާނެއްގައި ބުނެފައިވަނީ، ދިވެހިރާއްޖޭގެ ކަސްޓަމްސް ޤާނޫނު (ޤާނޫނު ނަންބަރު: 8/2011) ގެ ދަށުން ރާއްޖެއަށް އިމްޕޯޓްކުރާ މުދަލާއި، ފަސިންޖަރުންނާއި ރާއްޖެއިން ބޭރުން އަންނަ އުޅަނދުފަހަރު ބަލާފާސްކުރުމަކީ އެ މުއައްސަސާއާ މަތިކުރެވިފައިވާ ޒިންމާއެއް ކަމަށެވެ.

މިގޮތުން ބަނދަރުތަކުގައި ޤާއިމުކޮށްފައިވާ ވަސީލަތްތައް ބޭނުންކޮށްގެންނާއި، ލިބޭ މަޢުލޫމާތަށް ރިޢާޔަތްކޮށް ފިޒިކަލީ ބަލައިފާސްކުރަންޖެހޭ ފަރާތްތައް ޤާނޫނާ އެއްގޮތަށް ބަލައިފާސްކުރަމުންދާނެ ކަމަށް އެ އިދާރާއިން ބުނެއެވެ.

ކަސްޓަމްސްއިން އިތުރަށް ބުނީ، ބޯޑަރުން މުދަލާއި ފަސިންޖަރުން ބަލައިފާސްކުރަނީ ދިވެހި ރައްޔިތުންނާއި މުޖުތަމަޢުގެ ސަލާމަތާއި ރައްކާތެރިކަން ކަށަވަރުކުރުމުގެ މަތިވެރި މަޤްޞަދުގައި ކަމަށެވެ. އެހެންކަމުން، ކަސްޓަމްސްގެ ޤާނޫނީ މަސްއޫލިއްޔަތާމެދު ޝައްކު އުފައްދައި، މުއައްސަސާގެ އަގުވެއްޓޭ ފަދަ ޢަމަލުތައް އެއްވެސް ފަރާތަކުން ނުކުރުމަށް އެ އިދާރާއިން ވަނީ ހަރުކަށިކޮށް އިލްތިމާސްކޮށްފައެވެ.

ކަސްޓަމްސްއިން މި ބަޔާން ނެރެފައިވަނީ، އެ އިދާރާގައި ގިނަ ދުވަސްތަކެއް ވަންދެން މަސައްކަތް ކުރަމުންދާ އަންހެން މުވައްޒަފެއްގެ ފޮޓޯ ސޯޝަލް މީޑިއާގައި އާއްމުކޮށް، އޭނާއަށް ބޮޑެތި ތުހުމަތުތަކެއް ކުރި މައްސަލައެއް ފެންމަތިވުމާ ގުޅިގެންނެވެ.

މި މައްސަލައާ ގުޅިގެން ކަސްޓަމްސްގެ މުވައްޒަފުންނާއި ގިނަ އަދަދެއްގެ އާއްމުން ވެސް ވަނީ އެ މުވައްޒަފުގެ ދިފާއުގައި ވާހަކަ ދައްކާފައެވެ.