ތިލަމާލެ ބްރިޖު މަޝްރޫޢު ނިންމުމަށް ދީފައިވާ މުއްދަތު އަނެއްކާވެސް އިތުރުކޮށްދީފިން: ރައީސް
ތިލަމާލެ ބްރިޖުގެ މަސައްކަތް ކުރިއަށްދާ ސްޕީޑާއި މެދު ހިތްހަމަނުޖެހުން ފާޅުކުރައްވަމުން، އެ މަޝްރޫޢު ނިންމުމަށް ދީފައިވާ މުއްދަތު އަނެއްކާވެސް އިތުރުކޮށްދީފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހާމަކުރައްވައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ، މަޝްރޫޢުގެ ސްޕީޑާއި މެދު އެމަނިކުފާނު އެއްގޮތަކަށްވެސް ހިތްހަމަނުޖެހޭ ކަމަށެވެ.
ހަގީގަތުގަ ވަރަށް ލަސް ދާލެއް. އެކަމަކު ސަރުކާރުން ކޮށްދޭންޖެހޭ ހުރިހާ ކަމެއްވިއްޔާ ކޮށްދޭން. ދެން މި ދޭތެރެއިން މުއްދަތު އިތުރުކޮށްދޭންވެސް ވަރަށް ބޮޑައް އެދިގެން އަޅުގަނޑުމެން ހަމަ ވަރަށް ބޮޑަށް ބަލާފަ އަނެއްކާވެސް އިތުރަށް މުއްދަތުވެސް ދީފިން އިނގޭތޯ.
ބްރިޖުގެ މަސައްކަތް ލަސްވަމުންދާކަން ފާހަގަކުރައްވައި ރައީސް ވިދާޅުވިއެވެ.
ރައީސް އިތުރަށް ވިދާޅުވީ ބްރިޖުގެ ދުވެއްޔާމެދު ހިތްހަމަޖެހޭ އެއްވެސް ރައްޔިތަކު ހުންނާނެ ކަމަށް ގަބޫލުފުޅު ނުކުރެއްވޭ ކަމަށެވެ.
މި މަޝްރޫޢު ނިންމުމަށް ކުރިން ކަނޑައަޅާފައިވާ ތާރީޚުތަކަށް ބަދަލު އައިސްފައިވާކަން ފާހަގަކުރައްވަމުން، ރައީސް ވިދާޅުވީ ކުރިން މި މަޝްރޫޢު ނިންމަން އޮތީ މިއަހަރަށް ކަމަށެވެ.
މިހާރު ދީފަ ހުރި ޑޭޓް އެބަ ދޭ 2027 އަށް. ކުރިން އޮތީ 2026، މި އަަހަރު.
ރައީސް ވިދާޅުވިއެވެ.
އަދި މިދިޔަ އަހަރުގެ ރިޔާސީ ބަޔާނުގައި ދެއްވި ތާރީޚާ އެއްގޮތަށް މަސައްކަތް ކުރިއަށް ނުދިއުމުގެ ސަބަބުން، މިއަހަރުގެ ރިޔާސީ ބަޔާނުގައި އެ ބައި ހިމަނުއްވާފައި ނުވާނެ ކަމަށްވެސް އެމަނިކުފާނު ވަނީ ވިދާޅުވެފައެވެ.
މަސައްކަތް ލަސްވި ނަމަވެސް، މަޝްރޫޢު ހުއްޓުމެއް ނެތި ކުރިއަށްދާކަން ރައީސް ފާހަގަކުރެއްވިއެވެ. އެގޮތުން ސަރުކާރުން ފޯރުކޮށްދޭންޖެހޭ ހުރިހާ އެއްބާރުލުމެއް ދެމުންދާ ކަމަށާއި، މަޝްރޫޢު ނިމުމުން އެކަމުގެ އުފާވެރިކަން ލިބޭނެ ކަމަށް ރައީސް ނިންމާލުމުން ވިދާޅުވިއެވެ.
ތިލަމާލެ ބްރިޖު މަޝްރޫއު އަކީ، އިންޑިއާގެ ކުންފުންޔެއް ކަމަށްވާ "އެފްކޮންސް އިންފްރަސްޓްރަކްޗަރ ލިމިޓެޑް" އާއި ހަވާލުކޮށްގެން 2022 ވަނަ އަހަރު ކުރީ ސަރުކާރުން ފެށި މަޝްރޫއުއެކެވެ. މި މަޝްރޫއު ނިމެން ފުރަތަމަ ތާވަލުކޮށްފާ އޮތީ 2024 ވަނަ އަހަރުގެ ނޮވެމްބަރު މަހަށެވެ. ނަމަވެސް، އެ ތާރީހު މިހާރު ވަނީ އަނެއްކާވެސް 2027 ވަނަ އަހަރަށް ފަސްކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
