ކުޅުދުއްފުށީގައި އެއާޕޯޓެއް އެޅިޔަނުދޭން އެމްޑީޕީން ވަރަށް މަސައްކަތްކުރި: މުއްތަލިބް

އިދިކޮޅު އެމްޑީޕީން ހދ.ކުޅުދުއްފުށީގައި އެއާޕޯޓެއް އެޅިޔަނުދޭން ވަރަށް މަސައްކަތްކުރިކަމަށް މި ސަރުކާރުގެ ކޮންސްޓްރަކްޝަން، ހައުސިން އެންޑް އިންފްރާސްޓަކްޗަރ މިނިސްޓަރު ޑރ.އަބްދުﷲ މުއްތަލިބް ވިދާޅުވެއްޖެއެވެ.

ކޮންގްރެސް ޕާޓީގެ ކުޅުދުއްފުށީ ސިޓީ އިންތިހާބް ކެމްޕެއިން ލޯންޗުކުރުމަށް ބޭއްވި ޖަލްސާގައި ވާހަކަދައްކަވަމުން މިނިސްޓަރު މުއްތަލިބް ވަނީ، ރައީސް ޔާމީނު ދައުރުގައި ކުޅުދުއްފުށީ އެއާޕޯޓް އެޅުމުގެ މަރުހަލާތައް ކުރިއަށްދިޔައިރު، އެމްޑީޕީގެ ފަރާތުން ކުރިމަތިވި ދުއްތުރާތަކުގެ ހަނދާންތައް އާކުރައްވާފައެވެ.

ކުޅުދުއްފުށީގައި އެއާޕޯޓް އެޅުމަށް އޭރު ކުރަމުންދިޔަ މަސައްކަތައް ހުރަސްއަޅައި ފިއްތުންތައް ކުރިމަތިކުރުވުމަށް ބައިނަލްއަޤްވާމީ ފެންވަރުގެ މަސައްކަތްތަކެއް އެމްޑީޕީން ކުރިކަން ފާހަގަކުރައްވަމުން މިނިސްޓަރު ވިދާޅުވީ، އެކަމުގައި އޭރު އެމްޑީޕީގެ އެކި ފަރާތްތަކުން ސަރުކާރުގެ މިނިސްޓަރުންގެ ފަސްފަހަތުން ގޮސްފައިވާކަމަށެވެ.

މިނިސްޓަރު ވިދާޅުވީ ކުޅުދުއްފުށިން މިއަދު މި ދެކޭ ތަރައްޤީ އައިސްފައިވަނީ އެކްސިޑެންޓަކުން ނޫން ކަމަށައި، މިއީ ކުޅުދުއްފުށީސިޓީ ރައްޔިތުންގެ މިންނަތް މަސައްކަތް ކަމަށެވެ. އެގޮތުން ތަރައްޤީ ގެނައުމަށް އޭރު ސަރުކާރާ އެއްކޮށް ކުޅުދުއްފުށީގެ ރައްޔިތުން ތިބީ ވަރުގަދަ ރޫހެއްގައި ކަމަށާއި، އެއާޕޯޓަކީވެސް އެގޮތުން ތަރައްޤީކުރެވިގެން ދިޔަ ތަނެއްކަމަށެވެ.

މިނިސްޓަރު މުއްތަލިބް ވިދާޅުވީ ކުޅުދުއްފުށީގައި އެއާޕޯޓެއް އަޅަން އުޅުނުއިރު، އެ މަޝްރުޢުގެ މަސައްކަތް ކުރިއަށް ގެންދެވޭނެމަގު ބަންދުކޮށްލުމަށް ގިނަ މަސައްކަތެއް ކުރިކަމަށެވެ.

އެމްޑީޕީގެ ބޭފުޅުން މަސައްކަތް ކުރެއްވީ ރާއްޖެއާ ރާއްޖޭން ބޭރުގައި އެ މަޝްރޫއު ކުރިއަށް ނުގެންދެވޭނެ ހުރިހާ މަގެއް ހޯދުމަށްޓަކައި. އަޅުގަނޑުމެންގެ ވަޒީރުންގެ ފަރާތުން ދުނިޔޭގެ އެކި ޖަމިއްޔާތަކުން މީހުން ހިންގާވަރު ކޮށްލި. ރާއްޖޭގެ އެކި ރަށްރަށުގެ ރައްޔިތުން އެކަމަށް ނަފްރަތު ކުރާވަރު ކޮށްލި.

މިނިސްޓަރު ޢަބްދުﷲ މުއްތަލިބް

އިދިކޮޅުން އޭރު އެ މަސައްކަތް ކުރިނަމަވެސް އެކަން ފުރިހަމަ ކުރެވުނީ ކުޅުދުއްފުށީސިޓީ ރައްޔިތުންނާއި ސަރުކާރާއެކު އެއް ފިކުރެއްގައި ތަރައްޤީ ގެނައުމަށް އެއް ރޫހެއްގައި ތިބުމުންކަމަށް މިނިސްޓަރު ވިދާޅުވިއެވެ. ކުޅުދުއްފުށީ އެއާޕޯޓް ތަރައްގީކޮށް ކުޅުދުއްފުށީ އެއާޕޯޓަކީ ރައްޔިތުންނަށް ކުރިއެރުމާއި ތަރައްގީ ގެނެސްދޭނެ އެއްޗަކަށް ހަދައިދިނީ މިހާރުގެ ވެރިކަމުގައި އޮތް ޕާޓީގެ ފިކުރުންކަން ފާހަގަކުރައްވަމުން މިނިސްޓަރު ވިދާޅުވީ، ކުރިއަށް އޮތްތަނުގައިވެސް ސަރުކާރު ހޮވައިފިނަމަ އިހު ލިބުނު ތަރައްޤީ ގެނައުމަށް ފަސޭހަވެގެންދާނޭކަމަށެވެ.

ކުޅުދުއްފުށީ ސިޓީއަކީ ބްލޮކް ގްރާންޓުން ވަރަށް ބޮޑު އަދަދެއް ލިބޭ ސިޓީއެއްކަމަށާއި، އުތުރުގެ އިގްތިސާދީ މައި ނާރެހުގެ ގޮތުގައި މި ރަށަކީ ކައުންސިލަށް ވަރަށް ގިނަ އާމްދަނީ ހޯދޭނެ ފަދަ މަގުތައް ފަހިވެފައިވާ ތަނެއްކަމަށް މިނިސްޓަރު ވިދާޅުވިއެވެ.  އެހެންނަމަވެސް އެކަން ކުރެވޭނީ އެކަމުގެ އިލްމާއި ގާބިލުކަން ހުރި ފަރާތްތަކަށް ކަމަށާއި، ކުރިއަށްއޮތް ލޯކަލް ކައުންސިލް އިންތިހާބުގައި ޕީއެންސީގެ ފަރާތުން ނިކުމެތިބި ޓީމުގައި ސަރުކާރާ ގުޅިގެން ކަންކަން ކުރުމުގެ ގާބިލްކަން އެބައޮތްކަމަށް މިނިސްޓަރު މުއްތަލިބް ވިދާޅުވިއެވެ.