އައިޝަތު އަލީއަށް ކުރާ ތުހުމަތު އޭސީސީއަށް ވެސް ސާފެއް ނޫން: ވަކީލުން

މިދިޔަ ސަރުކާރުގެ ތަޢުލީމާއި ބެހޭ ވަޒީރު ޑރ. އައިޝަތު އަލީގެ މައްޗަށް އޭސީސީން ކުރާ ތުހުމަތު އެ ކޮމިޝަނުގެ އޮފިސަރުންނަށް ވެސް ސާފުނުވާ ކަމަށް އޭނާގެ ޤާނޫނީ ވަކީލުން ބުނެފިއެވެ.

މިދިޔަ ސަރުކާރުގައި އުފެއްދި ޑިސްޕިއުޓް ރިޒޮލިއުޝަން ކޮމިޓީން ބަދަލު ދިން މައްސަލައަކާއި ގުޅިގެން އައިޝަތު އަލީ މިއަދު އޭސީސީއަށް ވަނީ ހާޟިރުކޮށްފައެވެ. އެ ބައްދަލުވުމަށްފަހު އައިޝަތު އަލީގެ ޤާނޫނީ ވަކީލުން ވަނީ ނޫސްވެރިންނާއި ބައްދަލުކޮށްފައެވެ.

އެ ބައްދަލުވުމުގައި އައިޝަތު އަލީގެ ގާނޫނީ ވަކީލުންގެ ޓީމުގައި ހިމެނޭ އަހްމަދު މައުރޫފް ވަނީ އޭސީސީން އައިޝަތު އަލީގެ މައްޗަށް ކުރާ ތުހަމަތު ސާފުކޮށްދޭން ވަރަށް ގިނަ ވަގުތު ނެގިކަން ފާހަގަކުރައްވާފައެވެ.

މައުރޫފް ވިދާޅުވީ، އޭސީސީގެ ބައްދަލުވުމުގައި އެ ކޮމިޝަނުގެ އޮފިސަރުންނަށް ސުވާލެއް ވެސް ނުކުރެވޭ ކަމަށާއި، ކުރާ ތުހުމަތު ސާފުކޮށްދޭން ވެސް ވަރަށް ގިނަ ވަގުތު ނެގި ކަމަށެވެ. އަދި އެ ތުހުމަތު ސާފުކޮށްދިން އިރު އޭގައި އޮތީ ނުހައްގުން ބަދަލެއް ދޭން ނިންމިކަމަށް ބުނާ ވާހަކައެއް ކަމަށް މައުރޫފް ވިދާޅުވިއެވެ.

އެހެން ނަމަވެސް ޑިސްޕިއުޓް ރިޒޮލިއުޝަން ކޮމިޓީ އަކީ ބަދަލުދޭން އުފެއްދި ކޮމެޓީއެއް ނޫން ކަމަށާއި، އެ ކޮމެޓީ އަކީ ލަފާދޭ ކޮމެޓީއެއްކަން ފާހަގަކޮށްފައިވާނެ ކަމަށް މައުރޫފް ވިދާޅުވިއެވެ.

"އަޅުގަނޑުމެން ފާހަގަކުރިން މިނިސްޓަރު އޭރު ބައިވެރިވީކީ ގޮތް ނިންމާ ކޮމިޓީއެއްގައެއް ނޫނޭ. އެއީ ލަފާދޭ ކޮމިޓީއެކޭ. އެހެންވީމަ އެއީ ނިންމުން ނިންމާ ތަނެއް ނޫން،" މައުރޫފް ވިދާޅުވިއެވެ.

ފާހަގަކުރެވޭ ގޮތުގައި މިދިޔަ ހަފުތާއެއްގެ ތެރޭގައި އެމްޑީޕީގެ މިދިޔަ ވެރިކަމުގައި ކެބިނެޓުގެ ތިން އިސްވެރިޔަކު ވަނީ އޭސީސީއަށް ހާޟިރުކޮށްފައެވެ.

އެގޮތުން  ތިނަދޫ އުތުރު ދާއިރާގެ މެންބަރު ސައުދުﷲ ޙިލްމީގެ ސްވިފްޓް އިންޖިނިއަރިން ކުންފުންޏަށް އެކަށީގެންނުވާ ބަދަލެއް ދިނުމުގައި މަގާމުގެ ހައިސިއްޔަތު ނަހަމަގޮތުގައި ބޭނުންކުރުމުގެ ތުހުމަތާއި ގުޅިގެން ހިންގާ ތަހުގީގަށް އޭރުގެ އިކޮނޮމިކް މިނިސްޓަރު އަދި އެމްޑީޕީގެ މިހާރުގެ ޗެއާޕާސަން ފައްޔާޒު އިސްމައީލް މި ހަފުތާގެ ހޯމަ ދުވަހު ވަނީ އޭސީސީއަށް ހާޟިރުކޮށްފައެވެ.

އަދި ކުރީގެ ބަންޑާރަނައިބުކަން ކުރެއްވި އިބްރާހިމް ރިފްއަތު ވެސް އެސީސީއަށް ހާޒިރުކުރަން ނިންމައި ޗިޓު ވަނީ ފޮނުވާފައެވެ.