މަތިވެރި ކައުންސިލުން ގެނައި އައު ވައްތަރެއްގެ ޕިކަޕަކުން ބޮޑު ގެއްލުމެއް

އއ.މަތިވެރި ކައުންސިލުން އެރަށުގައި ކުނިއުކާލުމަށް ގެނައި އައު ބްރޭންޑެއްގެ ޕިކަޕެއްގެ ސަބަބުން ކައުންސިލަށް މާލީގޮތުން ގެއްލުންތަކެއް ލިބެމުންދާކަމަށް އޮޑިޓަރ ޖެނެރަލް ވިދާޅުވެއްޖެއެވެ.

އޮޑިޓަރ ޖެނެރަލް ނެރުއްވާފައިވާ މަތިވެރި ކައުންސިލްގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓްގައި ބުނެފައިވަނީ، ކައުންސިލުން ގެނައި އެ ޕިކަޕް ހަލާކުވެ ސްޕެއާ ނުލިބުމުގެ ސަބަބުން އޭގެ ބޭނުން ނުހިފި ގެއްލުންވަމުންދާކަމަށެވެ. މަތިވެރި ކައުންސިލުން ސޮޖެން ނަމަކަށް ކިޔާ ބްރޭޑްގެ އެ ޕިކަޕް ގެނެސްފައިވަނީ، 2022 ވަނަ އަހަރެވެ. ޕިކަޕް ގަތުމަށް 371،000 ރުފިޔާ ހަރަދުކޮށްފައިވާއިރު، މިއަހަރުގެ ފެބުރުއަރީމަހުގެ 19 ވަނަ ދުވަހުން ފެށިގެން އޭގެ ބޭނުން ހިފެމުން ނުދާކަމަށް އޮޑިޓް ރިޕޯޓްގައި ބުންޏެވެ.

ކައުންސިލް އިދާރާގެ ފަރާތުން އޮޑިޓަށް މައުލޫމާތު ދީފައިވާ ގޮތުގައި ޕިކަޕް ބޭނުންކުރަން ފެށިތާ ދެ މަސްދުވަސް ތެރޭގައި ޕިކަޕްގެ ބެޓެރި އަދި ސްޓީރިންގ ވީލްގެ މައްސަލަ ޖެހުނެވެ. މި ބްރޭންޑުގެ ޕިކަޕަކީ އާއްމުގޮތެއްގައި ރާއްޖޭގައި ބޭނުންކުރާ ބްރޭންޑެއްގެ ޕިކަޕަކަށްނުވާތީ، ސްޕެއަރ ހޯދުމުގެ ދަތިތަކެއް ދިމާވެފައިވާ ކަމަށްވެސް ކައުންސިލުން ވަނީ ފާހަގަކޮށްފައެވެ.

އޮޑިޓް ރިޕޯޓްގައި ބުނެފައިވަނީ ޕިކަޕް ހަލާކުވެ، ކުނި މެނޭޖްކުރުމުގެ މަސައްކަތްތަކަށް ދަތިތަކެއް ކުރިމަތިވެފައި އޮތުމުގެ ސަބަބުން ކައުންސިލުން ފަހުން ބޭނުންކުރަމުންދިޔައީ، އެ އިދާރާއަށް ދައުލަތުގެ އިދާރާއަކުން ހަދިޔާކޮއްފައިވާ ޕިކަޕެއް ކަމަށެވެ. ނަމަވެސް އެޕިކަޕްގައި ކުނިއުކާލުމުގެ ކަންކަން ކުރަމުން ގެންގޮސްފައިވަނީ އުޅަނދު ރަޖިސްޓްރީ ނުކޮށްކަމަށް ވަނީ ފާހަގަކޮށްފައެވެ.

ދިގު މުއްދަތަކަށް ބޭނުންކުރެވޭނެ ގޮތަކަށް ނުބަލައި މިގޮތަށް އަގު ބޮޑުކޮށް ހޯދާ ހަރުމުދާތައް ހޯދާނަމަ، މިފަދަ ތަކެތީގެ މަންފާ އެކަށިގެންވާ ގޮތެއްގައި ނުލިބި މިފަދަ ވެހިކަލްތައް ބޭނުންކޮއްގެން ރައްޔިތުންނަށް ދެމުންގެންދާ މުހިންމު ޙިދުމަތްތައް ހުއްޓިގެން ދިއުމުގެ ފުރުސަތު އޮތްކަމަށްވެސް އޮޑިޓް ރިޕޯޓްގައި ވަނީ ފާހަގަކޮށްފައެވެ.

މިކަމާ ގުޅިގެން އޮޑިޓަރ ޖެނެރަލް ލަފާދެއްވަނީ ކައުންސިލްގެ އިދާރާއަށް ބޭނުންވާ ވެހިކަލްތައް ހޯދުމުގައި ރާއްޖޭގެ މާހައުލާއި ގުޅޭ އަދި ވެހިކަލްތައް މަރާމާތުކުރުމަށް ބޭނުންވާ ސްޕެއަރ ފަސޭހައިން ލިބޭނެގޮތަށް ރާއްޖޭގައި އާއްމު ގޮތެއްގައި ބޭނުންކުރާ ބްރޭންޑުތަކުގެ ވެހިކަލްތައް ހޯދުމަށެވެ. އަދި ޕިކަޕް ބޭނުންކުރަންފެށިތާ ކުރު މުއްދަތެއްގެ ތެރޭގައި ޕިކަޕަށް މައްސަލަތައް ދިމާވެފައިވާތީ ޕިކަޕް ސަޕްލައިކުރި ފަރާތާއި މަޝްވަރާކޮށްގެން މިކަން ހައްލުކުރުމަށްވެސް ވަނީ ކައުންސިލަށް ލަފާ ދީފައެވެ.