ކާގޯ ޓާމިނަލް ހުރީ ނިމިފަ، އެތަން ބޭނުން ކުރުން ލަސްކުރީ ކުރީ ސަރުކާރުން: ޝަރީފް

ވެލާނާ އިންޓަރނޭޝަނަލް އެއަރޕޯޓް (ވީއައިއޭ)ގެ އައު ކާގޯ ޓަރމިނަލްގެ އޮތީ މީގެ އެތައް ދުވަހެއް ކުރިން ނިމިފައިކަމަށާއި އެތަން ބޭނުންކުރުން ލަސްކުރީ ކުރީގެ ރައީސް އިބްރާހިމް މުޙައްމަދު ޞާލިހުގެ ސަރުކާރުން ކަމަށް މޯލްޑިވްސް އެއަރޕޯޓްސް ކޮމްޕެނީ (އެމްއޭސީއެލް) ގެ މެނޭޖިން ޑިރެކްޓަރ އިބްރާހިމް ޝަރީފް ވިދާޅުވެއްޖެއެވެ.

އިބްރާހިމް ޝަރީފް  މިފަދައިން ވިދާޅުވީ ވެލާނާ އިންޓަރނޭޝަނަލް އެއަރޕޯޓްގެ އައު ކާގޯ ޓަރމިނަލް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

މިގޮތުން ޝަރީފް ވިދާޅުވީ 2018 ވަނަ އަހަރު މަސައްކަތް ފެށިގެންދިޔަ ކާގޯ ޓަރމިނަލް 2022 ވަނަ އަހަރު ނިމުނު ނަމަވެސް އެތަން ބޭނުންކުރުމަށް އޭރުގެ ސަރުކާރުން އެއްވެސް އިސްކަމެއް ދެއްވާފައި ނުވާކަމަށެވެ. ޤައުމު ތަރައްޤީއަށް ހިންގާ މިފަދަ މަޝްރޫޢުތައް ނިމުމުންވެސް، އެ ތަންތަނުގެ ބޭނުން ނުހިފުމަކީ ރައްޔިތުންގެ ފައިސާ އިސްރާފުކުރުންކަމަަށް ޝަރީފް ވަނީ ވިދާޅުވެފައެވެ.

""މި އިމާރާތް ޓެކްނިކަލީ 2022 ވަނަ އަހަރު ނިމުކަމުގައިވިޔަސް ބޭނުންކުރުމަށް އެހާބޮޑު އިސްކަމެއް ނުދީ ގިނަ ދުވަސްވެ، 2023 ވަނަ އަހަރާއި ހަމައަށް ދިގުލައިގެން ވަނީ ގޮސްފައި. ތަން ރަސްމީކޮށް ހަވާލުކޮށްފައިވެސް އޮޕަރޭޝަނަށް ނުގެނެސް ގިނަ ދުވަސްތަކެއް ދިޔަ. މި ފަދަ ތަނެއް ޤާއިމްކޮށް، އެތަނުގެ ބޭނުން ނުހިފި ފާއިތުވާ ކޮންމެ ދުވަހަކީ ދިވެހި ރައްޔިތުންގެ ފައިސާތަކެއް އެއްވެސް ފައިދާއެއް ނެތި ބޭކާރުވެގެންދާ ދުވަހެއް""

ޝަރީފް ވިދާޅުވިއެވެ.

މީގެ އިތުރުންވެސް ޝަރީފް ވިދާޅުވީ ރައީސް ޑރ.މުއިއްޒު ވެރިކަމާއި ހަވާލުވެވަޑައިގަތުމަށްފަހު އެ މަނިކުފާނުގެ ސަރުކާރުގެ އަމާޒަކަށްވީ ވީ އެންމެ އަވަހަކަށް ކާގޯ ޓަރމިނަލް ހުޅުވައި ކާގޯގެ ހިދުމަތް އައު ޓަރމިނަލަށް ބަދަލުކުރުންކަމަށެވެ.

އެންމެ 27 ދުވަސް ތެރޭ އެމަސައްކަތް ނިންމޭނެތޯ ގިނަ ބަޔަކު ސުވާލު އުފެއްދި ކަމަށާއި ނަމަވެސް އެއަރޕޯޓްގެ އައު މެނޭޖްމަންޓުން އެ މުއްދަތުގެ ތެރޭގައި މަސައްކަތް ނިންމައި ހިދުމަތަށް ތަން ހުޅުވާލެވުނީ އެމްއޭސީއެލްގެ މުވައްޒަފުން ރެއާއި ދުވާލު ކުރި ބުރަ މަސައްކަތުންކަން ޝަރީފް ފާހަގަ ކުރެއްވިއެވެ.

ޝަރީފު އިތުރަށް ވިދާޅުވީ އައު ކާގޯ ޓަރމިނަލާއެކު މިހާރު ދިމާވާ ދަތިތަކަށް ހައްލުވެގެންގޮސް، ކާގޯގެ ހިދުމަތް ވަރަށް ބޮޑަށް ފަސޭހަވެގެންދާނެކަމަށެވެ.

މި އައު ޓާމިނަލަކީ މިހާތަނަށް އެއާޕޯޓުގައި ބޭނުންކުރަމުން އައި މީގެ 40 ވަރަކަށް އަހަރު ކުރިން ހެދި ޓަރމިނަލަށް ވުރެ  2 ގުނަ ބޮޑުކޮށް، ޒަމާނީ ވަސީލަތްތަކާއެކު ތަރައްޤީކޮށްފައިވާ ޓަރމިނަލެކެވެ.