'އިންޑިއާއައުޓް' ހަރަކާތާއި ގުޅިގެން ފަތުރާހާ ހަބަރެއް ޤަބޫލް ނުކުރަން ޖެއިޝަންކަރު އެދިވަޑައިގެންފި!

އިންޑިއާ އައުޓް ހަރަކާއި ގުޅޭގޮތުން ފަތުރާހާ ހަބަރެއް އަދި ލިޔާހާ އެއްޗެއް ޤަބޫލް ނުކުރުމަށް އިންޑިއާގެ އެކްސްޓާނަލް އެފެއާޒް މިނިސްޓަރ ޖައިޝަންކަރު ގޮވާ ލައްވައިފިއެވެ.

ޖައިޝަންކަރު މިގޮތަށް ގޮވާލައްވާފައި މިވަނީ އިންޑިޔާގެ އަވަށްޓެރި ދެ ޤައުމުކަމަށްވާ ދިވެހިރާއްޖޭގައާއި އަދި ބަގުލަދޭޝްގައި އިންޑިއާ އައުޓްކެމްޕެއިނެއް ކުރިއަށް ގެންދިއުމާއި ގުޅިގެންނެވެ.

އިންޑިޔާ ވިޔަފާރީގެ މައި މަރުކަޒުކަމުގައިވާ މުމްބާއީގައި ކުރިއަށްދިޔަ ބައްދަލުވުމެއްގައި ނޫސްވެރިޔަކު ކުރެއްވި ސުވާލަކަށް ޖަވާބު ދެއްވަމުން ޖައިޝަންކަރު ވިދާޅުވީ އަވަށްޓެރި ޤައުމުތަކަކީ ހުރިހާ ގޮތަކުން ބެލިކަމުގައި ވިޔަސް ވަރަށް ގާތް ރަޙްމަތްތެރި ޤައުމުތަކެއް ކަމަށާއި ، ބައެއް ފަހަރަށް ދޭދޭ ޤައުމުތަކުގެ މެދުގައި މައްސަލަތައް ދިމަވާ ވަގުތުތައްވެސް އަންނާނެ ކަމަށެވެ.

އޭގެ އިތުރުން އޭނާ ވިދާޅުވީ އެފަދަ ދަނޑިވަޅުތަކުގައި އިވޭހާ އަޑުތަކެއް ޤަބޫލުކޮށް އެކަމަށް ރައްދުދީ ފިޔަވަޅު އެޅުމަކީ ރަނގަޅުކަމެއް ނޫން ކަމަށާއި އެންމެ ރަނގަޅު ގޮތަކީ އެންމެން އެއްތަންވެ ވާހަކަ ދައްކައިގެން އެފަދަ ކަންތައްތައް ހައްލުކުރުން ކަމުގައެވެ.

"ވަރަށް ހަރުކޮށް އެއްޗެއް ބުނީމައި، ވާހަކަ ދައްކަން އިށީންނަން ދައުވަތު ދޭންވީ، މަށަށް ޔަގީން، ވާހަކަ ދައްކަން އިށީނީމައި ދުރުގައި ހުރެ ބޭނުން ކުރާ ބަހުރުވައަށް ވުރެ މާ ބޮޑަށް ވެސް ބޭނުން ކުރާ ބަހުރުވަ 'ސޮފްޓް] ލުއި ވާނެ، އެއީ ގެރެންޓީ ކަމެއް" ޖައިޝަންކަރު ވިދާޅުވިއެވެ.

ޖައިޝަންކަރު މިފަދައިން ވިދާޅުވެފައި ވާއިރު ދިވެހިރާއްޖޭގައި މިހާރު މިއޮތް ރައީސް ޑރ.މުހައްމަދު މުއިއްޒުގެ ސަރުކާރު ވެރިކަމަށް އައުމަށް ވަނީ ރާއްޖެގައި ތިބި އިންޑިޔާ މިލިޓަރީ ސިފައިން ބޭރުކުރުމަށް ބާރުއަޅައި "އިންޑިއާ އައުޓް" ހަރަކާތެއް ކުރިއަށް ގެންގޮސްފައެވެ.

މިހާރު ބަންގްލަދޭޝްގެ އިދިކޮޅު ފަރާތްތަކުން ވަނީ އިންޑިއާގެ އުފެއްދުންތައް ބޮއިކޮޓު ކުރުމަށް ގޮވާލައި "އިންޑިއާ އައުޓް" ކެންޕެއިނެއް ފަށަފައެވެ.

އިންޑިއާގެ އެކްސްޓާނަލް އެފެއާޒް މިނިސްޓަރު މިފަދައިން ވިދާޅުވެފައިވާއިރު ރައީސް ޑރ. މުހައްމަދު މުއިއްޒު ސަރުކާރުން މިހާރުވަނީ ރާއްޖޭގައި ތިބި އިންޑިއާ ސިފައިން ރާއްޖެއިން އަބުރާ ގެންދިއުމަށް އިންޑިއާ ސަރުކާރުގައި ރަސްމީކޮށް އެދިފައެވެ. އަދި ރާއްޖެ އާއި އިންޑިއާ އާއި ދެމެދު މިހާރު ވަނީ މިކަމުގެ ރަސްމީ މަޝްވަރާތައް މަތީފެންވަރުގެ ބޭފުޅުން ހިމެނޭ ކޮމެޓީއަކުން ކުރިއަށް ގެންދަން ފަށާފައެވެ.

މި ސަރުކާރުން އިންޑިއާގައި އެދިފައިވަނީ އަންނަ މާރޗުމަހުގެ 15 ގެ ކުރިން ރާއްޖޭގައި ތިބި އިންޑިއާ ސިފައިން އަބުރާ އެ ޤައުމަށް ގެންދިއުމަށެވެ.