އެމްޑީޕީން މަޖިލީހަށް ވަކިން ނިކުންނަން ނިންމައިފި

އަންނަ އަހަރުގެ ރައްޔިތުންގެ މަޖިލީހުގެ އިންތިހާބުގައި، އެމްޑީޕީން މަޖިލީހުގެ 87 ދާއިރާއަކަށް ވަކިން ވާދަކުރަން ނިންމައިފިއެވެ.

މިގޮތަށް ނިންމާފައިވަނީ މިހާރު ކުރިއަށްދާ އެޕާޓީގެ ގައުމީ މަޖިލީހުގެ ބައްދަލުވުމުގައެވެ.

ރައްޔިތުންގެ މަޖިލީހުގެ އިންތިހާބުގައި އެމްޑީޕީން މިގޮތަށް ވާދަކުރުމަށް އެދި ފާސްކުރީ، އެޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ހުށަހެޅުއްވި ގަރާރެއްގެ މައްޗަށް ބިނާކޮށެވެ.

މާބްލް ހޮޓެލްގައި މިރޭ އޮތް ގައުމީ މަޖިލީހުގައި ވާހަކަފުޅު ދައްކަވަމުން ކުރީގެ ރައީސް މުހައްމަދު ނަޝީދު ވިދާޅުވީ، އަދާލަތު ޕާޓީއާއި އެމްއާރްއެމްއިން ދެކެނީ އެމްޑީޕީއަށް މަޖިލީހުން ލިބެން ޖެހޭނީ 35 ގޮނޑި ކަމަށާއި މިއީ ބަލައިގަނެވޭނެކަމެއް ނޫންކަމަށެވެ.

އަދި އެ ޖަލްސާއަށް އެންމެ ފުރަތަމަ ހުށަހެޅި އެމްޑީޕީއަށް 60 ގޮނޑި ލިބުމުގެ ގޮތާއި މެދު ހިތްހަމަޖެހިފައިވަނީ ހަމައެކަނި ޖުމްހޫރީ ޕާޓީ ކަމަށްވެސް ރައީސް ނަޝީދު ވަނީ ފާހަގަކުރައްވާފައެވެ.

މިރޭގެ ގައުމީ މަޖިލީހުގައި ވާހަކަފުޅު ދެއްކެވި ގިނަ މެންބަރުން ވަނީ ގޮނޑިތައް ބެހިގޮތާއި މެދު ސުވާލުއުފައްދަައި، ވަކި ވަކިން ވާދަކުރުމަށް ގޮވާލައްވާފަައިވެސްމެއެވެ. އަދި އިންތިހާބުގައި ވަކިވަކިން ވާދަކޮށް، މަޖިލީހުގެ މެޖޯރިޓީ ކޯލިޝަނަށް ލިބިދާނެކަމަށްވެސް ވަނީ ބުނެފައެވެ.

އެމްޑީޕީގެ މި ނިންމުމާއި ގުޅިގެން ސޯޝަލް މީޑިޔާގައި އެޕާޓީގެ ގިނަ އެކްޓިވިސްޓުން ދަނީ ތަބަކަށްލާފައި ޓިކެޓް ދިނުން ހުއްޓުވިއްޖެކަމަށްބުނެ އުފާ ފާޅުކުރަމުންނެވެ.