ހެއްކާއެކު ތަރުޖަމާނު ދެއްކެވީ ނަޝީދުގެ ވެރިކަމުގައި އިސްރާއީލާއެކު ގުޅުން ބަދަހިކުރެއްވި ގޮތް

ކުރީގެ ރައީސް މުޙައްމަދު ނަޝީދުގެ ވެރިކަމުގައި އިސްރާއީލާއެކު އޮތް ގާތް ގުޅުން ހާމަކުރައްވައި، ރައީސް އޮފީހުގެ ތަރުޖަމާނު މުޙައްމަދު ޙުސައިން ޝަރީފް (މުންދު) ވަރުގަދަ ރައްދެއް ދެއްވައިފިއެވެ.

އެމްޑީޕީ ސަރުކާރުތަކުން އިސްރާއީލަށް ތާއީދުކުރާ ސިޔާސަތެއް ގެންގުޅުނު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްކެވި ވާހަކަފުޅުތަކަށް ރައްދު ދެއްވައި ރައީސް ނަޝީދު ރޭ ވަނީ އެމްޑީޕީ އަކީ އިސްރާއިލަށް ތާއީދު ކުރާ ޕާޓީއެއް ނޫން ކަމަށާ، އެ ޕާޓީން ތާއީދު ކުރާނީ ފަލަސްތީނަށް ކަމަށް ވިދާޅުވެފައެވެ.

"ކާކުތޯ އިޒްރޭލަށް ތާއީދު ކުރާނީ؟ ޓީވީތަކުން ފެންނަމުން އެ ގެންދާ މަންޒަރުތައް، އިޒްރޭލް ސަރުކާރުގެ ލާއިންސާނީ އަމަލުތައް، ކާކުތޯ ހަނދާން ނެތޭނީ؟ ކާކުތޯ އިޒްރޭލަށް ތާއީދު ކުރާނީ. އެމްޑީޕީން ނުކުރާނެ. އިޒްރޭލަށް އެމްޑީޕީ ވެސް ތާއީދު ނުކުރާނެ! އަޅުގަނޑުމެން އަބަދު ވެސް ތެދުވެ ތިބޭނީ މިނިވަންކަމަށްޓަކައި ތާ އަބަދު މަސައްކަތް ކުރާ ފަލަސްތީނުގެ ރައްޔިތުންނާ އެކީގައި."

ނަޝީދު ވިދާޅުވިއެވެ.

އެވާހަކަތަކަށް ރައްދު ދެއްވައި މުންދު އޭނާގެ ފޭސްބުކް ޕޯސްޓުގައި ވަނީ، ނަޝީދުގެ ވެރިކަމުގައި އިސްރާއީލާ ގުޅުން ބަދަހިކުރި މުހިންމު ތާރީޚީ ކަންތައްތަކެއް ތަރުތީބުން ހަނދާންކޮށްދެއްވާފައެވެ.

އެގޮތުން 1974 ވަނަ އަހަރުން ފެށިގެން މެދުކަނޑާލާފައި އޮތް ދިވެހިރާއްޖެއާއި އިސްރާއީލުގެ ގުޅުން 2009 ވަނަ އަހަރު އަލުން އިއާދަކުރިއިރު، ވެރިކަމުގައި ހުންނެވީ ރައީސް ނަޝީދު ކަމަށާއި، އޭރު އޮތީ އެމްޑީޕީގެ ސަރުކާރުކަން މުންދު ފާހަގަކުރެއްވިއެވެ.

ހަމައެހެންމެ، 2009 ވަނަ އަހަރު ރާއްޖޭގެ ޚާރިޖީ ވަޒީރަކު ފުރަތަމަ ފަހަރަށް ރަސްމީގޮތުން އިސްރާއީލަށް ޒިޔާރަތްކުރެއްވީވެސް އެމްޑީޕީގެ ވެރިކަމުގައެވެ.

މީގެ އިތުރުން، ފަތުރުވެރިކަމާއި، ސިއްހަތާއި، ތައުލީމު އަދި ސަގާފީ ގުޅުން ބަދަހިކުރުމުގެ އެއްބަސްވުންތަކުގައި އިސްރާއީލާއެކު 2009 ގައި ސޮއިކުރިއިރު، 2010 ވަނަ އަހަރު އިސްރާއީލުގެ 'އައި ފްރޮމް ޒަޔޯން' ގެ ޑޮކްޓަރުންގެ ޓީމެއް ރާއްޖެ ގެނެސް ކްލިނިކް ހިންގާފައިވެއެވެ.

އަދި އެ މީހުން ރައީސް އޮފީހަށް ގެންގޮސް ސައިދީ، ބައްދަލުކޮށް ސަނާ ކިޔާފައިވަނީވެސް ރައީސް ނަޝީދުގެ ވެރިކަމުގައި ކަމަށް މުންދު ވިދާޅުވިއެވެ.

ފަލަސްތީނުގެ މައްސަލައިގައި އެމްޑީޕީ ސަރުކާރުން ގެންގުޅުނު ދެފަންތީގެ ސިޔާސަތު ހާމަކުރައްވަމުން މުންދު ވިދާޅުވީ، 2011 ވަނަ އަހަރު ޔުނެސްކޯގައި ފަލަސްތީނަށް މެންބަރުކަން ދިނުމަށް ވޯޓަށް އެހި ވަގުތު، އެ ވޯޓުގައި ބައިވެރިނުވުމަށްޓަކައި ރާއްޖޭގެ ވަފުދު އަވަސްއަރުވާލައިގެން މާލެ ގެނައީވެސް ރައީސް ނަޝީދުގެ އަމުރަށް ކަމަށެވެ.

މުންދުގެ ޕޯސްޓާއެކު އޭނާ ވަނީ ރައީސް ނަޝީދުގެ ވެރިކަމުގައި، ޖަލްސާއެއްގައި އިސްރާއީލާއެކު ގުޅުން ބޭއްވުމާ ބެހޭގޮތުން އެމަނިކުފާނު ދެއްކެވި ވާހަކަފުޅުގެ ވީޑިއޯއެއްވެސް ހިއްސާކުރައްވާފައެވެ.

އޭގައި ނަޝީދު ވަނީ ފަލަސްތީނުންވެސް އިސްރާއީލް ގަބޫލު ކުރާ ކަމަށާ، އެހެންކަމުން ދިވެހިރާއްޖެއިން ނުކުރަންވީ ކީއްވެތޯ ސުވާލުކުރައްވާފައެވެ.

”ފަލަސްތީން އިސްރާއީލް ގަބޫލުކުރޭ. ދެން އަޅުގަނޑުމެން އެކަން ނުކޮށް ކީއްކުރައްތޯ އުޅެންވީ. ފަލަސްތީން އިސްރާއީލް ގަބޫލުކުރޭ. ދެން އަޅުގަނޑުމެންނަށް އެބަ އޮތްތޯ އިސްރާއީލް ގަބޫލުނުކޮށް އުޅުމުގެ މާބޮޑު ވިސްނުމެއް، ބުއްދިވެރިކަމެއް. ބޭނުމެއް. ނެތް“

ރައީސް ނަޝީދު

މީގެ އިތުރުން ނަޝީދު ވަނީ އެމަނިކުފާނުގެ ސަރުކާރުން އިސްރާއީލާ ގުޅުން ބަދަހި ކުރާ ސަބަބުވެސް ހާމަކުރައްވާފައެވެ. އެގޮތުން ވިދާޅުވީ އެއްވެސް ގައުމަކާ ގުޅުން ބަދަހިނުކޮށް ބޭއްވުމަކީ ވަރަށް ހައްދުފަހަނައެޅި ވިސްނުމެއް ކަމަށެވެ. އަދި ގައުމެއްގެ ސިޔާސަތުގައި އެ ވިސްނުން ގެންގުޅުމަކީ ރަނގަޅު ކަމެއް ނޫން ކަމަށްވެސް ވިދާޅުވިއެވެ.

”އަޅުގަނޑަށް ފެންނަ ފެނުމުގައި އަޅުގަނޑުމެންނަށް ލިބޭނެ އެންމެ ބޮޑު ފައިދާއަކީ އަޅުގަނޑުމެންގެ ހިތް ހަލާލުވުން.“ ނަޝީދު ވިދާޅުވިއެވެ.

ނަޝީދު ވިދާޅުވީ އަރަބި މުސްލިމު ގައުމުތަކުގެ ވެރިންނާވެސް އެ މަޝްވަރާ ކުރައްވައި ރާއްޖޭގެ ވިސްނުން ހާމަކުރެއްވި ކަމަށެވެ. އަދި ގައުމުގައި އުޅޭ މަދު ބައެއްގެ ސަބަބުން ގުޅުން ބަދަހި ނުކުރައްވައި ފަހަތަށް ނުޖެހުމަށް އެންގެވި ކަމަށެވެ.