އިންތިޚާބުން ލިބުނު ނާކާމިޔާބީއާއެކު ސްޓާމާގެ އިސްތިއުފާއަށް ގޮވާލާ އަޑުގަދަވަނީ

އިނގިރޭސިވިލާތުގެ ލޯކަލް އިލެކްޝަނުގައި ވެރިކަން ކުރާ ލޭބަރ ޕާޓީއަށް ކުރިމަތިވި ބޮޑު ނާކާމިޔާބީއާ ގުޅިގެން، ބޮޑުވަޒީރު ކިއަރ ސްޓާމަރ އިސްތިއުފާ ދެއްވުމަށް ގޮވާލާ އަޑުތައް ގަދަވެފައިވީ ނަމަވެސް، މަގާމުން އިސްތިއުފާނުދެއްވާނެ ކަމަށް އޭނާ ވިދާޅުވެއްޖެއެވެ.

އަންގާރަ ދުވަހު ބޭއްވި ކެބިނެޓް ބައްދަލުވުމުގައި ސްޓާމަރ ވިދާޅުވީ، ގައުމުގެ ރައްޔިތުން އެދެނީ ސަރުކާރުން މަސައްކަތްތަކާއިގެން ކުރިއަށް ދިއުމަށް ކަމަށާއި، އޭނާ ކުރައްވަމުން ގެންދަވަނީ އެ މަސައްކަތް ކަމަށެވެ. އަދި ޕާޓީގެ ލީޑަރުކަމުން ވަކިކުރުމުގެ ރަސްމީ މަރުހަލާއެއް އަދި ފެށިފައި ނުވާކަންވެސް ބޮޑުވަޒީރު ފާހަގަކުރެއްވިއެވެ.

މިދިޔަ ހަފުތާގައި ބޭއްވި އިންތިޚާބުގައި ލޭބަރ ޕާޓީއަށް 1,400 އަށްވުރެ ގިނަ ގޮނޑި ގެއްލި، ވޭލްސްގެ ކޮންޓްރޯލްވެސް ވަނީ ގެއްލިފައެވެ. މިއާއެކު ލޭބަރ ޕާޓީގެ ގާތްގަނޑަކަށް 80 މެންބަރަކު ވަނީ ސްޓާމަރ އިސްތިއުފާ ދެއްވުމަށް ގޮވާލާފައެވެ.

ޚަބަރުތައް ބުނާގޮތުން ސްޓާމަރގެ ކެބިނެޓް މިހާރު އޮތީ ދެބައިވެފައެވެ. މީޑިއާ ރިޕޯޓްތަކުން ހާމަވާގޮތުގައި ކެބިނެޓްގެ ހަ މެންބަރަކު ވަނީ ބޮޑުވަޒީރު އިސްތިއުފާ ދެއްވުމަށް ބާރުއަޅުއްވާފައެވެ. އޭގެ ތެރޭގައި ފޮރިން ސެކްރެޓަރީ އިވެޓް ކޫޕަރ، ހޯމް ސެކްރެޓަރީ ޝަބާނާ މަހްމޫދު އަދި ހެލްތު ސެކްރެޓަރީ ވެސް ސްޓްރީޓިންގ ހިމެނެއެވެ.

މި މައްސަލައިގައި ސަރުކާރުގެ ބައެއް އިސް ބޭފުޅުން މިހާރު ވަނީ އިސްތިއުފާ ދެއްވަން ފައްޓަވާފައެވެ. އޭގެ ތެރޭގައި މިނިސްޓަރު ޒުބައިރު އަހުމަދާއި، އެލެކްސް ޑޭވިސް-ޖޯންސް އަދި ޖެސް ފިލިޕްސް ހިމެނެއެވެ. ޒުބައިރު އަހުމަދު ވިދާޅުވީ ސްޓާމަރގެ ލީޑަޝިޕްގައި ހަރުދަނާ އުސޫލުތަކެއް ނެތުމުގެ ސަބަބުން ސަރުކާރުގެ ކުރިއެރުމަށް ހުރަސްއެޅެމުންދާ ކަމަށެވެ.

ނަމަވެސް ބޮޑުވަޒީރުގެ ދިފާއުގައި ބައެއް ވަޒީރުން ވަނީ ވާހަކަ ދައްކަވާފައެވެ. ލިޒް ކެންޑަލް އާއި ޕީޓާ ކައިލް ވިދާޅުވީ ބޮޑުވަޒީރަށް ފުރިހަމަ ތާއީދު އެބައޮތް ކަމަށާއި، ލީޑަޝިޕާ ގޮންޖަހާނެ މީހެއް ނެތް ކަމަށެވެ.

މި ސިޔާސީ ހަލަބޮލިކަމުގެ ސަބަބުން އިނގިރޭސިވިލާތުގެ އިގްތިސާދަށްވެސް ވަނީ ނޭދެވޭ އަސަރުތަކެއް ކޮށްފައެވެ. ޕައުންޑުގެ އަގު ވެއް ގޮސްފައިވާއިރު، ސަރުކާރުން ފައިސާ ދަރަންޏަށް ހޯދާ ރޭޓްތައް ވަނީ ފާއިތުވި 30 އަހަރު ތެރޭގައި މައްޗަށް ނުދާވަރަށް އުފުލިފައެވެ.

ސްޓާމަރގެ މަގުބޫލުކަން ދަށަށް ދިއުމަށް މެދުވެރިވި ސަބަބުތަކުގެ ތެރޭގައި، ދިރިއުޅުމުގެ ޚަރަދު ބޮޑުވެފައިވާ ދަނޑިވަޅެއްގައި "ވިންޓަރ ފިއުލް އެލަވަންސް" ކަނޑާލުމާއި، ފަލަސްތީނުގެ ގާޒާގައި އިސްރާއީލުން ހިންގަމުންދާ ލާއިންސާނީ އަމަލުތަކާ މެދު ސަރުކާރުން ގެންގުޅޭ ސިޔާސަތު ހިމެނެއެވެ.