ޔާމީންގެ ފާޑު ވިދާޅުވުން؛ މަގާމަށް ހޮވުނީމަވެސް މުންޑު އަނދެގެން ނަޝީދު އޮތީ ގޭގައި
ކުރީގެ ރައީސް މުހައްމަދު ނަޝީދު, ޗެއާޕާސަން ކުރައްވާ އިދިކޮޅު މައި ޕާޓީ އެމްޑީޕީން ސަރުކާރު ޒިންމާދާރު ކުރުމުގައި ނުކުޅެދިފައިވާ ކަމަށް ވިދާޅުވެ ކުރީގެ ރައީސް ޔާމީން ވަރަށް ބޮޑަށް ފާޑުވިދާޅުވެއްޖެ އެވެ.
ޔާމީންގެ ފާޑުވިދާޅުވުން ނަޝީދަށް އަމާޒުކުރައްވާފައި މިވަނީ އިދިކޮޅު ތިން ރައީސުން އެކުގައި ސަރުކާރު ޒިންމާދާރު ކުރުވުމަށް މަސައްކަތްތަކެއް ކުރައްވާނެ ކަމަށް ވިދާޅުވެ އެކަން އިއުލާނު ކުރައްވާފައިވަނިކޮށެވެ. ރައީސް ޔާމީންގެ ގެކޮޅުގައި އެމަނިކުފާނުގެ ޕީއެންއެފުން އެންމެ ފަހުން ބޭއްވި ބައްދަލްވުމުގައި ވާހަކަ ދައްކަވަމުން ޔާމީން ވަނީ ހަގީގީ އިދިކޮޅު ޕާޓީއެއް ނެތް ކަމަށް ރައީސް މުޙައްމަދު މުޢިއްޒު ވިދާޅުވުމުން އެކަމާއި ގުޅޭގޮތުން ވާހަކަ ދައްކަވާފަ އެވެ.
ރައީސް މުޢިއްޒުގެ އެ ވާހަކަފުޅު ދިރާސާކޮށްލެއްވި ކަމަށް ވިދާޅުވެ ޔާމީން ވިދާޅުވީ އިދިކޮޅު ޕާޓީއެއްގެ ދައުރު ޕީއެންއެފުން އަދާކުރަމުންދާ ކަމަށާ އެހެން ކަމުން އެއްކޮޅާއި ދެކޮޅު އެބަ އޮތް ކަމަށެވެ. ނަމަވެސް ރައީސް މުޢިއްޒު އެ ވިދާޅުވަނީ އެމްޑީޕީގެ ވާހަކަ ކަމަށާ ރައީސް ވިދާޅުވަނީ އެމްޑީޕީން ސަރުކާރު ޒިންމާދާރު ކުރުމުގައި ނުކުޅެދިފައިވުން ކަމުގައި ޔާމީން ވިދާޅުވި އެވެ.
".. [ރައީސް] މުޢިއްޒު އެ ދައްކާ ވާހަކައަކީ ހަގީގަތުގައި ރަނގަޅު ވާހަކައެއް އެނގޭތޯ. [ރަައީސް] މުޢިއްޒު އެ ވިދާޅުވަނީ ތިމަންނަ ހާސްކޮށްލާވަރުގެ, އެވަރުގެ ކަމެއް އިދިކޮޅު ސިޔާސީ ފަރާތަކުން ނުކުރޭ,"
ޔާމީން ވިދާޅުވީ އެމްޑީޕީގެ އަސްލު ސޫރަ ނުފެންނަ ކަމަށެވެ. އެގޮތުން މަގުމަތީގެ ހަރަކާތްތަކާއި އިދާރާތަކަށް ގޮސް ސަރުކާރު ޒިންމާދާރު ކުރުވަން އެއްވެސް މަސައްކަތެއް އެމްޑީޕީން ނުކުރާ ކަމަށް ވިދާޅުވި އެވެ. ޕީއެންއެފަކީ އެއްވެސް އިރަކު މަގުމައްޗަށް ނިކުމެ މުޒާހަރާކުރި ބައެއް ނޫން ކަމަށާ އެ ޕާޓީގެ މަސައްކަތް ބިނާވެފައި ވަނީ އިލްމީ ބަހުސާއެކު ކަންކަން އޮންނަ ގޮތް ބުނެދިނުމުގެ މައްޗަށް ކަމަށެވެ.
ޔާމީން ވިދާޅުވީ އެމްޑީޕީގެ ޗެއާޕާސަން ހޯއްދެވުމަށް, އެ މަގާމު ލިބިވަޑައިގެންފި ނަމަ ރަައީސް މުޢިއްޒު އޮންނަވަން ޖެހިވަޑައިގަންނަވާނީ މުންޑުލައިގެން ގޭގައި ކަމަށް ނަަޝީދު ވިދާޅުވި ކަމަށެވެ. ނަމަވެސް މަގާމަށް ހޮވިވަޑައިގަތުމުން މިއަދު މުންޑު އަނދެގެން ގޭގައި އޮތީ ކޮން ބޭފުޅެއްތޯ ސުވާލުކުރަން ޖެހޭ ކަމަށް ވިދާޅުވެ ނަޝީދަށް ނުސީދާކޮށް ފާޑު ވިދާޅުވި އެވެ.
"ރައީސް ނަޝީދު އެމްޑީޕީގެ ޗެއާމަން ކަމަށް ކުރިމަތިލައިގެން އުޅުނުއިރު ވިދާޅުވި ތިމަންނަ މިކަން ކުރީމަ ދެން [ރައީސް] މުޢިއްޒު އޮންނަން ޖެހޭނީ މުންޑު އަނދެގެން ގޭގަ އޭ. ދެން މިއަދު އަޅުގަނޑު ސުވާލުކޮށްލަން ކާކުތޯ މުންޑު އަނދެގެން އޮތީ ގޭގައި," ޔާމީން ވިދާޅުވި އެވެ.
ޔާމީން މިމޭރުމުން ނަޝީދަށް ފާޑުވިދާޅުވުމުން ނަޝީދުގެ ސަޕޯޓަރުން ވަނީ ވަރަށް ބޮޑަށް ރުޅިގަދަވެފަ އެވެ. އަދި ޔާމީނަށް ވަރަށް ބޮޑަށް ގެންދަނީ ފާޑުކިޔަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
