ލޯކަލް މާރުކޭޓުގައި ބިދޭސީންނަށް ނުތިބެވޭންވީ ސަބަބެއް ނުފެނޭ: އާޒިމް

ލޯކަލް މާރުކޭޓްތަކުގައި ބިދޭސީން ބައިތިއްބަނީ ދިވެހިން ނުލިބޭތީ ކަމަށާ، އެތަންތަނުގައި ބިދޭސީންނަށް ނުތިބެވެންވީ ސަބަބެއް ނެތް ކަމަށް މާލޭ މޭޔަރު އާދަމް އާޒިމް ވިދާޅުވެއްޖެއެވެ.

ސިޓީ ކައުންސިލުގެ 5 ވަނަ ދައުރުގެ ދެވަނަ ރަސްމީ އާންމު ޖަލްސާގައި މާފަންނު ދެކުނު ދާއިރާގެ މެމްބަރު އިބްރާހިމް ލަބާން ޝަރީފް ވަނީ މާލޭގެ މާރުކޭޓުތަކުގައި ބިދޭސީން ތިބޭކަން ފާހަގަކުރައްވައި އެފަދައިން ތިބުމަކީ ހުއްދަކަމެއް ނޫންކަމަށް ވިދާޅުވެފައެވެ.

އާޒިމް ވިދާޅުވީ، މާރުކޭޓުގައި ވަރަށް ދުވަސްވީ މީހުން ތިބޭ ކަމަށެވެ. އަދި އެމީހުންނަށް ދިވެހި މުވައްޒަފުން ނުލިބޭ ކަމަށާ ލިބޭ މުވައްޒަފުންވެސް ހަރުނުލާތީ ވިޔަފާރި ރަނގަޅަށް ނުކުރެވޭ ކަމަށެވެ. އެހެންކަމުން އެތަންތަނަށްވެސް ހޯމް މިނިސްޓްރީ މެދުވެރިކޮށް ކޯޓާ ހަމަޖައްސާކަން އާޒިމް ފާހަގަކުރެއްވިއެވެ.

ލޯކަލް މާރުކޭޓުގައި ބޭރު މީހުންނަށް ނުތިބެވޭންވީ ސަބަބެއް އަޅުގަނޑަކަށް ނުފެނޭ. ކޮންތަނަކުތޯ ބޭރުމީހުން ވަޒީފާގައި ނެތީ. މިހާރު މިޖެހޭ މައްސަލައަކީ ހަމައެކަނި ލޯކަލް މާރުކޭޓުގައި އިންނަ މީހާ އެތަނުގައި ބޭރު މީހެއް ބަހައްޓައިގެން މައްސަލަ ޖެހޭ. އެކަމަކު މާލޭގެ ކޮންމެ ކެފޭއެއްގައި، ރެސްޓޯރެންޓެއްގައި، ބޮޑެތި ރިސޯޓް ތަކުގައި، ކުންފުނި ތަކުގައި، ފިހާރަތަކުގައި (ބިދޭސީން) ނެތް ތަނެއް ނެތް. މިޖެހޭ މައްސަލައަކީ މުވައްޒަފުން ނުލިބެންޏާ ބޭރުމީހުން ގެނެސްގެން ދެއްތޯ މަސައްކަތް ކުރެވޭނީ. އެހެންވީމާ އެމީހުންނަށްވެސް އެ ފުރުސަތު އޮންނަ ގޮތަށް މިހާރު މިއޮތީ.

ޢާޒިމް

އާޒިމް ވިދާޅުވީ، އިންސާފުވެރި ކަމާ، ހަމަހަމަ ކަމާއެކު ކަންކަން ކުރިއަށް ދާނީ، މާރުކޭޓްތަކުގައި ވެސް ބިދޭސީންނަށް ވަޒީފާ އަދާކުރެވޭ ގޮތަށް އޮވެގެން ކަމަށެވެ.

އަދި މާރުކޭޓުތަކުގައި ބިދޭސީން ތިބެނީ އެތަން ހިންގަން ކަމަށާ، ފިހާރަތަކުގެ ސޭޓުންނަށް ބިދޭސީންނަށް ތިބެވޭއިރު، ”ގާނޫނު އިމްޕްލަމަންޓް ކުރާއިރު، ހުރިހާ ތަނަކަށް އެއްގޮތްކޮށް“ ޢަމަލުކުރަންޖެހޭނެ ކަމަށް އާޒިމް ވިދާޅުވިއެވެ.

އާޒިމް އިތުރަށް ވިދާޅުވީ، ފިހާރަތަކާއި މާރުކޭޓުގައިވެސް ބިދޭސީން ތިބެނީ ދިވެހިން ނުލިބޭތީ ކަމަށާ، ދިވެހިން ލިބޭނަމަ އެގޮތަށް ނުތިބޭނެ ކަމަށެވެ. އަދި ދާދިފަހުން ގުރައިދޫގައި އެފަދައިން ތިބޭ ބިދޭސީން ނެގުމުން، ވިޔަފާރިތައް ހުއްޓިގެން ދިޔަކަމަށާ، ކަންކަން ތަންފީޒުކުރަންވާނީ ގައުމު ހިނގާނެ ގޮތަކާމެދު ވިސްނުމަށް ފަހުގައި ކަމަށްވެސް އޭނާ ވިދާޅުވިއެވެ.