މުދަލު ޒަކާތުން ކުރި ހޭދަ 34.8 އިންސައްތަ އިތުރުވެއްޖެ: އެންމެ ބޮޑު ހޭދައެއް ފީސަބީލިالله މަޝްރޫޢުތަކަށް
2026 ވަނަ އަހަރުގެ އެޕްރީލު މަހު މުދަލު ޒަކާތުން ކޮށްފައިވާ ހޭދަތައް އޭގެ ކުރީ އަހަރާ އަޅާބަލާއިރު ބޮޑުތަނުން އިތުރުވެއްޖެއެވެ.
ޒަކާތު ހައުސްގެ ތަފާސްހިސާބުތައް ދައްކާގޮތުން، 2025 ވަނަ އަހަރުގެ އެޕްރީލު މަހު ޒަކާތުން ހޭދަކޮށްފައިވަނީ 2,828,118.28 (ދެ މިލިއަން އަށް ލައްކަ އަށާވީސް ހާސް އެއްސަތޭކަ އަށާރަ) ރުފިޔާއެވެ. ނަމަވެސް، 2026 ވަނަ އަހަރުގެ އެޕްރީލު މަހު މި ޢަދަދު ވަނީ 3,811,259.91 (ތިން މިލިއަން އަށް ލައްކަ އެގާރަ ހާސް ދުވިސަތަ ފަންސާސް ނުވަ) ރުފިޔާއަށް އިތުރުވެފައެވެ. މިއީ ގާތްގަނޑަކަށް 34.8 އިންސައްތައިގެ ކުރިއެރުމެކެވެ.
މިދިޔަ އެޕްރީލު މަހުގެ ހޭދަތަކަށް ބަލާއިރު، އެންމެ ބޮޑު އިސްކަމެއް ދީފައިވަނީ ފަޤީރުންނާއި މިސްކީނުންނަށް އެހީވުމަށާއި، ތަޢުލީމީ ދާއިރާއަށާއި، ކީރިތި ޤުރުއާނާ ގުޅުންހުރި ޕުރޮގުރާމުތަކުގެ އިތުރުން އިޖުތިމާޢީ ފައިދާއަށް ހިންގާ ތަފާތު ހަރަކާތްތަކަށެވެ.
ފަޤީރުންނާއި މިސްކީނުންނަށް ދިން އެހީ އިތުރުވުން
ފަޤީރުންނާއި މިސްކީނުންގެ ބައިން ކުރި ހޭދަ 2025 އެޕްރީލު މަހު ހުރީ 1,179,397.99 ރުފިޔާގައެވެ. ނަމަވެސް 2026 އެޕްރީލު މަހު މި ޢަދަދު ވަނީ 1,449,239.39 ރުފިޔާއަށް އިތުރުވެފައެވެ. މީގެ ތެރޭގައި ޟަރޫރީ ބޭނުންތަކަށް ދިން އެހީ 42,500 ރުފިޔާއިން 182,731 ރުފިޔާއަށް އިތުރުވެފައިވާއިރު، ބޭސްފަރުވާގެ އެހީއަށް ކުރި ހޭދަ ވަނީ 1.1 މިލިއަން ރުފިޔާއިން 1.2 މިލިއަން ރުފިޔާއަށް އިތުރުވެފައެވެ.
އިދާރީ ހޭދަތައް ކުޑަވުން
ޒަކާތުގެ މަސައްކަތްތަކުގައި އުޅޭ މުވައްޒަފުންގެ މުސާރައާއި އިދާރީ ހިންގުމުގެ "ޢާމިލުން"ގެ ބައިން ކުރި ހޭދަ ވަނީ ބޮޑުތަނުން ދަށްވެފައެވެ. 2025 ވަނަ އަހަރުގެ އެޕްރީލު މަހު މި ބައިން 483,077.82 ރުފިޔާ ހޭދަކޮށްފައިވީ ނަމަވެސް، މިއަހަރު އެ ޢަދަދު ވަނީ 195,003.79 ރުފިޔާއަށް ތިރިވެފައެވެ. މިއީ ގާތްގަނޑަކަށް 60 އިންސައްތައިގެ ދަށްވުމެކެވެ.
ފީސަބީލިالله މަޝްރޫޢުތަކަށް ބޮޑު ކުރިއެރުމެއް
އެންމެ ފާހަގަކޮށްލެވޭ ކުރިއެރުމެއް އައިސްފައިވަނީ "ފީސަބީލިالله" ބައިން ކުރި ހޭދަތަކަށެވެ. އިސްލާމީ ތަޢުލީމާއި ޤުރުއާނުގެ ޢިލްމު ކުރިއެރުވުމުގެ މަސައްކަތްތައް ފުޅާވުމާ ގުޅިގެން، މި ދާއިރާއަށް ކުރި ހޭދަ ވަނީ 1.1 މިލިއަން ރުފިޔާއިން 2.1 މިލިއަން ރުފިޔާއަށް އިތުރުވެފައެވެ. މީގެ ތެރޭގައި ހިމެނެނީ:
މަތީ ތަޢުލީމަށް ދިން އެހީ: 290,274.76 ރުފިޔާ
ޙާފިޛުން އުފެއްދުމާއި ޤުރުއާނުގެ ޢިލްމު ފެތުރުން: 1,093,749.47 ރުފިޔާ
އަތޮޅުތަކުގައި ޤުރުއާން ސެންޓަރުތައް ބިނާކުރުން: 782,992.50 ރުފިޔާ
ދަތުރުވެރިންނަށް އެހީދޭ "އިބްނުއްސަބީލް"ގެ ބައިން މިދިޔަ އަހަރު ޚަރަދުތަކެއް ކޮށްފައިވީ ނަމަވެސް، މިއަހަރުގެ އެޕްރީލް މަހު އެ ބައިން އެއްވެސް ހޭދައެއް ކޮށްފައެއް ނުވެއެވެ.
މޯލްޑިވްސް ޒަކާތު ހައުސްއިން ހާމަކުރި ގޮތުގައި، 2026 ވަނަ އަހަރުގެ އެޕްރީލް މަހު މުދަލުޒަކާތުގެ ގޮތުގައި ޖުމްލަ 5,434,893 ރުފިޔާ ލިބިފައިވެއެވެ. މިއީ އޭގެ ކުރީ މަހާ އަޅާބަލާއިރު ދަށްވުމެއް ނަމަވެސް، 2025 ވަނަ އަހަރުގެ އެޕްރީލް މަހާ އަޅާބަލާއިރު މިއީ 8.9 އިންސައްތައިގެ ކުރިއެރުމެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
