ހިތްވަރު ގަދަ ޝެއިހެެއް، އެކަމަކު މުޖްތަމައުން ކޮށް ދިނީ ކޮން ކަމެެއް؟

ދިވެހި ރައްޔިތުން ދީނީ ގޮތުން ހޭލުންތެރި ކުރުވާ ދިވެހި މުޖްތަމައުގައި ދީނީ އިލްމު ފެތުރުމުގައި އިލްމުވެރީން ކުރަމުން ގެންދަނީ ބުރަ މަސައްކަތްތަކެކެވެ. ތައުރީފު ހައްގު މަސައްކަތްތަކެވެ. ބައެއް އިލްމުވެރީން, އެ ބޭފުޅުންގެ ވަރަށް ގިނަ ވަގުތު ހޭދަ ކުރައްވަނީ ދައުވަތު ފެތުރުމުގަ އެވެ. އާންމުންނަށް ނޭންގޭ ކަންކަން އޮޅުންފިިލުވައި ދިނުމުގަ އެވެ. އާންމުން ފޮނުވާ އެކި ސުވާލުތަކަށް ޖަވާބު ދިނުމުގަ އެވެ.

އެފަދަ އެއް ބޭފުޅަކީ އައްޝައިޚް މުހައްމަދު އިބްރާހީމް (ނައިފަރީ) އެވެ. އެއީ އާދަޔާ ހިލާފު ޝަހުސިއްޔަތެކެވެ. ދިރިއުޅުމުގެ ހާލަތު ކޮންމެ ގޮތަކަށް ބަދަލުވީ ނަމަވެސް ދައުވަތުގެ މައިދާނުގައި ސާބިތުވެ ހުންނެވި ހިތްވަރު ގަދަ އިލްމުވެރި އެކެވެ.

ދާދި ފަހަކާ ޖެހެން ޝެއިހް މުހައްމަދު އިބްރާހިމަކީ ނައިފަރުގެ ފަހުރު ކަމުގައިވި މަދްރަސަތުލް އިފްތިތާހްގެ އިސްލާމް މުދައްރިސެކެވެ.  އެ ވަޒީފާގައި 17 ވަރަކަށް އަހަރު ހޭދަ ކުރެއްވި އެވެ. ނަމަވެސް ޝެއިހްގެ ލޮލަށް ސިއްހީ މައްސަލަތަކެއް ދިމާވެ ދެ ލޮލުގެ ފެނުން ގެއްލުނެވެ.

އެހެން ކަމުން ވަޒީފާއާ ދުރަށް ދިއުމަށް މަޖުބޫރުވި އެވެ. ލޮލުގެ ފަރުވާއަށް މިދިޔަ ދެ އަހަރު ޝެއިހް ހުންނެވީ މުސާރަ ނުލިބޭ ގޮތަށް ވަޒީފާއާ ދުރުގަ އެވެ.

ނަމަވެސް ޝެއިހްގެ އިލްމީ މަސައްކަތަށް ވީ މިންވަރަކުން ވަގުތު ދެއްވަ އެވެ. ރަށުގައި ހުންނަނަމަ ކޮންމެ ހަފްތާއަކު އެންމެނަށް ބައިވެރިވެވޭނެ ހެން ކުރިއަށް ގެންދާ "މަގޭ ސުވަލަކީ" ޕްރަގްރާމްގައި ބައިވެރިވެ އެވެ. ދީނީ އެކި މައުލޫމާތުތައް ހިއްސާކޮށް އާންމުންގެ ސުވާލުތަކަށް ޖަވާބު ދެ އެވެ.

ވަރަށް ގިނަ ބަޔަކު އެ ޕްރަގްރާމަށް އިންތިޒާރު ކުރެ އެވެ. ތަފާތު އެކި ސުވާލުތައް ފޮނުވަ އެވެ. އަދި ދަރުސްތައް ވެސް ކުރިއަސް ގެންދެ އެވެ.

ދަރުސްތައް ދެނީ ޝައިޚްގެ ދަރިވަރެއް ގެންގޮސް އޭނާ ލައްވާ ޝައިޚަށް ފޮތް ކިޔާދީ، ދެން އެ އަޑުއެހި ބައިތައް ހިތަށް ނަގައިގެންނެވެ. އެ ހިތްވަރު ކޮށްގެން ވެސް އެ މަސައްކަތް ދޫކޮށް ނުލަ އެވެ.

ޝައިޚް މުހައްމަދު އިބްރާހީމް, ދީނީގޮތުން މުޖްތަމައު ކުރިއެރުވުމަށް ކުރައްވާފައިވާ މަސައްކަތްތައް ގިނަގުނަ އެވެ. ދެއްވާފައިވާ ދަރުސްތައް އެހާ ގިނަ އެވެ. ލިޔުއްވާފައިވާ ފޮތްތައް ވެސް އެހާމެ ގިނައެވެ.

ނަމަވެސް ޝެއިހަށް އެންމެ އެހީތެރިކަން ބޭނުންވީ ވަގުތު ދައުލަތުގެ މުއައްސަސާތަކުން އަގު ވަޒަން ނުކުރުމާއި އެހީތެރިވެ ނުދިނުމުގެ ޝަކުވާ ޝެއިހްގެ ދަރިވަރުންނާއި ޝެއިހްގެ އިލްމީ މަސައްކަތުން ފައިދާ ލިބުނު އެތައް ބަޔަކު ދަނީ ކުރަމުންނެވެ.

އެ މީހުން ދެކޭ ގޮތުގައި ޝެއިހާމެދު ކަންތައްތައް ވަމުންދާ ގޮތަކީ ތައުލީމީ ދާއިރާއިން މުދައްރިސުންގެ އަގު ވަޒަން ނުކުރާ ކަމުގެ ހެތްކެކެވެ. އެނގިފައިވާ ގޮތުގައި ޝެއިހަށް ވަޒީފާއަށް ނިކުތުމަށް މިހާރު އޮތީ ފަހުގެ ފުރުސަތު ދީފަ އެވެ. އެއީ އޯގަސްޓް މަހުގެ ނިޔަލަށެވެ. އެ ހިސާބުން މުސާރަނެތް ވަޒީފާ ވެސް ގެއްލޭނެ އެވެ.

ޝެއިހަށް ކުރިމަތިވެފައިވާ ހާލަތުން އިސްލާމީ ވުޒާރާއިން މި އިލްމުވެރިޔާގެ އަގު ވަޒަންނުކުރާ ކަން ހާމަވާ ކަމަށް ވެސް އެ މީހުން ދެކެ އެވެ. ޝެއިހަށް ކުރިމަތިވި ހާލަތާއި ގުޅިގެން މީގެ ކުރީން ވެސް އިލްމުވެރީން އެ ވާހަކަ ދައްކާފައިވެ އެވެ. އެ ވާހަކަތަކާއި ގުޅިގެން އުޖާުރައެއް ލިބޭ ގޮތަށް ވާއިޒެެއްގެ މަގާމު ދެއްވާނެ ކަމަށް ބޭފުޅަކު ވިދާޅުވިތާ އެތައް ދުވަހެއް ވެއްޖެ އެވެ. ނަމަވެސް މިހާތަނަށް އެކަން އަދި ހަމަޖެހިފަ އެއް ނުވެ އެވެ.

"މިފަދަ ކަމެއްގައި ތައުލީމީ ވުޒާރާއަކުން ވެސް އިސްލާމީ ވުޒާރާއަކުން ވެސް ކުރެވޭނެ ކަމެއް ނެތުމީ އަހަރެން މިއަދު ލަދު ގަންނަ ކަމެވެ. އާރާއި ބާރު ދެއްވި ދުވަހު، މިފަދަ ފަރާތްތަކުގެ އަގު ވަޒަންކުރެވޭނެ ގޮތެއްވުމީ އަހަރެންކުރާ އުންމީދެކެވެ," ކަންބޮޑުވުން ފާޅުކޮށް މީހަކު ލިޔެފައިވެ އެވެ.

އެ މީހުން ބުނާ ގޮތުން ކަންކަން ދިމާވެފައިވާ ގޮތާމެދު ދުވަހަކު ވެސް ޝެއިހް ޝަކުވާއެއް ކުރެއްވި އަޑެއް ނާހަ އެވެ. އެކަމަކު އެ މީހުން އެ ޝަކުވާ ކުރަން ބޭނުމެވެ.

އެ ވާހަކަތައް ހިއްސާކޮށް އާންމުކޮށްފައިވާ ޕޯސްޓްތައް ވަރަށް ބޮޑަށް ވަނީ ވައިރަލް ވެފަ އެވެ. އެ މީހުން އުންމީދު ކުރަނީ ދައުވަތުގެ މައިދާނުަގައި ޝެއިހް އެ ކުރާ މަސައްކަތުގެ އަގު ވަޒަން ކުރުމެވެ.