މިއަހަރު ތެރޭ އައު ފިނޭންސް މިނިސްޓަރެއް އައްޔަންކުރާނެ: އަމީރު
މިއަހަރު ތެރޭގައި އައު ފިނޭންސް މިނިސްޓަރެއް މި ސަރުކާރުން އައްޔަންކުރާނެ ކަމަށް ނިމިދިޔަ އެމްޑީޕީ ސަރުކާރުގައި ފިނޭންސް މިނިސްޓަރުކަން ކުރެއްވި އިބްރާހީމް އަމީރު ވިދާޅުވެއްޖެއެވެ.
އަމީރު މިގޮތަށް ވިދާޅުވީ ރޭ އެމްޑީޕީން ބޭއްވި ހަވަރު ބެރު ޕެނަލްގައި ރާއްޖޭގެ އިގްތިސާދީ ހާލަތާއި ގުޅޭގޮތުން ވާހަކަދައްކަވަމުންނެވެ.
މި ޕެނަލްގައި ވާހަކަދައްކަވަމުން އަމީރު ވިދާޅުވީ މިދިޔަ އަހަރާ އަޅާ ބަލާއިރު މި އަހަރުގެ ޖެނުއަރީ މަހު ސިނގިރެޓް ޑިއުޓީން 5 މިލިއަން ރުފިޔާ ލިބިފައިވާ ކަމަށެވެ. މިދިޔަ އަހަރުގެ ޖެނުއަރީ މަހުގައި ޑިއުޓީގެ ގޮތުގައި ސިނގިރެޓުން 100 މިލިއަން ރުފިޔާ ލިބުނުކަން އަމީރު ފާހަގަކުރެއްވިއެވެ. އަމީރު ވިދާޅުވީ ދައުލަތަށް ލިބޭނޭ ކަމަށް ސަރުކާރުން ޖައްސަވާ ހިސާބު ދިމާނުވާކަމަށެވެ. އެހެންކަމުން ދައުލަތުގެ އާމްދަނީ މިހާރު ހުރިގޮތަށް ބަލައި، ސަރުކާރުން ސިނގިރެޓް ޑިއުޓީގެ ގޮތުގައި ލިބޭނެ ކަމަށް ލަފާކުރި 1.1 ބިލިއަން ރުފިޔާއާއި ގާތަށްވެސް އާމްދަނީއެއް ނުލިބޭނެ ކަމަށް އަމީރު ވިދާޅުވިއެވެ.
2025 ވަނަ އަހަރުގެ ބަޖެޓުގައި 10 ބިލިއަން ރުފިޔާގެ ޑެފިސިޓެއް އޮތްއިރު، ސަބްސިޑީ ރިފޯމް ގެނެސްގެން ސަލާމަތްވާނެ ކަމަށް ސަރުކާރުން ބުނި 7.7 ބިލިއަން ރުފިޔާވެސް ސަލާމަތްނުވާނެ ކަމަށް އަމީރު ވިދާޅުވިއެވެ. ގާތްގަނޑަކަށް 29.2 ބިލިއަން ރުފިޔާގެ އާމްދަނީއެއް ޑިއުޓީއާއި ޓެކްސްފަދަ އެކި ގޮތްގޮތުން ލިބޭނެ ކަމަށް ސަރުކާރުން އަންދާޒާ ކުރި ނަމަވެސް އެއިން 5 ބިލިއަނެއްހާ ރުފިޔާވެސް ދައުލަތަށް ނުލިބޭނެ ކަމަށް އަމީރު އަންދާޒާކޮށްފައި ވެއެވެ.
އެހެންކަމުން، ނިމިދިޔަ އަހަރަށްވުރެ މިއަހަރުގެ ޑެފިސިޓްވެސް ބޮޑުވާނެ ކަމަށް އަމީރު ވިދާޅުވެފައި ވެއެވެ. ދައުލަތުގެ މާލީ ނަތީޖާތައް މިހާރު ފެންނަގޮތުން ކުރިއަށްއޮތް ތަނުގައި މާލީ ވަޒީރުކަމަށް އެހެން ބޭފުޅަކު އައްޔަނުކުރާނޭކަމަށް އަމީރު ވަނީ ފާހަގަކުރއްވާފައެވެ.
މިއަހަރު ނިމުމުގެ ކުރިން މިހާރު ހުރި ފިނޭންސް މިނިސްޓަރވެސް ބަދަލުކުރާނެ ކަމަށް އަޅުގަނޑު ގަބޫލުކުރަނީ
ކުރީގެ ފިނޭންސް މިނިސްޓަރ އިބްރާހީމް އަމީރު
އަމީރު މިފަދައިން ވިދާޅުވެފައިވާއިރު ޒަމީރަކީ ކުރީގެ ރައީސް ޔާމީން ޢަބްދުލްޤައްޔޫމްގެ ވެރިކަމުގައި ޓޫރިޒަމް މިނިސްޓަރުކަން ކުރެއްވުމަށްފަހު މި ސަރުކާރުގެ ކެބިނެޓް އެކުލެވިއިރު ހާރިޖީ ވުޒާރާގެ ވަޒީރުކަން ކުރެއްވި ބޭފުޅެކެވެ. ޒަމީރު ފިނޭންސަށް އައްޔަނުކޮށްފައިވަނީ، މި ސަރުކާރުން އެންމެ ފުރަތަމަ ފިނޭންސް މިނިސްޓަރުކަމަށް އައްޔަންކުރެއްވި ޑރ. މުޙައްމަދު ޝަފީގު މަގާމުން އިސްތިއުފާ ދެއްވުމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
