އާޓެމިސް 2 ކާމިޔާބުކަމާއެކު އެނބުރި ދުނިޔެއަށް އަތުވެއްޖެ

ނާސާގެ އާޓެމިސް 2 މިޝަންގެ އުޅަނދު ހަނދު ވަށައިގެން ދަތުރުކުރުމަށްފަހު، ކާމިޔާބުކަމާއެކު އިއްޔެ އެނބުރި ދުނިޔެއަށް އަތުވެއްޖެއެވެ.

މި ތާރީޚީ ދަތުރަށްފަހު އޮރަޔަން ކެޕްސޫލް ޕެސިފިކް ކަނޑަށް ޖެއްސީ އެމެރިކާގެ ހުޅަނގު އައްސޭރީގެ ގަޑިން މެންދުރުފަހުގެ ވަގުތެއްގައެވެ. މި އުޅަނދު ކަނޑަށް ތިރިކޮށްފައިވަނީ ކެލިފޯނިއާގެ ސެން ޑިއޭގޯގެ އައްސޭރިފަށާ ދުރު ސަރަހައްދަކަށެވެ.

މި މިޝަންގައި ބައިވެރިވި ހަތަރު އެސްޓްރޮނޯޓުން ކަމަށްވާ ކޮމާންޑަރު ރީޑް ވައިޒްމަން، ޕައިލެޓް ވިކްޓަރ ގްލޯވާ، މިޝަން ސްޕެޝަލިސްޓް ކްރިސްޓީނާ ކޮކް އަދި ކެނެޑާގެ އެސްޓްރޮނޯޓް ޖެރެމީ ހެންސަންގެ ހާލު ރަނގަޅުކަމަށް ނާސާއިން ވަނީ ކަށަވަރުކޮށްދީފައެވެ. އުޅަނދު ކަނޑަށް ތިރިކުރުމާއެކު، އެމެރިކާގެ ކަނޑުގެ ސިފައިންގެ މަނަވަރު "ޔޫއެސްއެސް ޖޯން ޕީ. މާރތާ" އިން ވަނީ އެސްޓްރޮނޯޓުންނަށް އެހީތެރިކަން ފޯރުކޮށްދީ މަނަވަރަށް ނަގާފައެވެ.

މިއީ ފާއިތުވި 50 އަހަރަށްވުރެ ގިނަ ދުވަހުގެ ތެރޭގައި އިންސާނުން ހަނދާ ހަމައަށް ދަތުރުކުރުމަށްފަހު އެނބުރި އައި ފުރަތަމަ ފަހަރެވެ.

އާޓެމިސް 2 މިޝަންގެ މި ދަތުރުގައި ޖުމްލަ 10 ދުވަސް ހޭދަވެފައިވާއިރު، އުޅަނދު ވަނީ ގާތްގަނޑަކަށް 694,481 މޭލުގެ ރާސްތާއެއް ކަނޑަތުކޮށްފައެވެ. މި ދަތުރު ފެށިފައިވަނީ، މިހިނގާ އޭޕްރިލްމަހުގެ އެއްވަނަ ދުވަހު ފްލޮރިޑާގެ ކެނެޑީ ސްޕޭސް ސެންޓަރުންނެވެ. އުޅަނދު ދުނިޔޭގެ ޖައްވަށް ވަދެފައިވަނީ ގަޑިއަކު ގާތްގަނޑަކަށް 25,000 މޭލުގެ ބާރުމިނުގައެވެ. ޖައްވަށް ވަނުމުގެ ތެރޭގައި އުޅަނދުގެ ބޭރުގެ ހޫނުމިން ގާތްގަނޑަކަށް 2,700 ޑިގްރީ ސެލްސިއަސްއަށް މައްޗަށް ދިޔަކަމަށް ރިޕޯޓުތައް ބުނެއެވެ.

މި މިޝަންއަކީ އިންސާނުން އަލުން ހަނދަށް ފޮނުވުމަށް ނާސާއިން ކުރިއަށްގެންދާ އާޓެމިސް ޕްރޮގްރާމްގެ ދަށުން ކުރެވުނު ފުރަތަމަ  ޓެސްޓު ދަތުރެކެވެ. މި ދަތުރުގައި އެސްޓްރޮނޯޓުން ވަނީ ދުނިޔެއާ އެންމެ ދުރަށް ދަތުރުކޮށް، ކުރިން އެޕޯލޯ 13 މިޝަނުން ގާއިމުކޮށްފައިވާ ރެކޯޑު މުގުރާލާފައެވެ. ދަތުރުގެ ތެރޭގައި އުޅަނދުގެ ލައިފް ސަޕޯޓް ސިސްޓަމްތަކާއި، މުވާސަލާތީ ނިޒާމުތައް އަދި ނެވިގޭޝަން ސިސްޓަމްތައް ވަނީ ފުރިހަމައަށް ޓެސްޓުކޮށްފައެވެ.

އާޓެމިސް 2 ގެ ކާމިޔާބީއާއެކު، ދެން ނާސާއިން ތައްޔާރުވާނީ އާޓެމިސް 3 މިޝަންގައި އިންސާނުން ހަނދުގެ ގެންދިއުމަށެވެ. މިހާރު އެސްޓްރޮނޯޓުން ތިބީ މަނަވަރުގައި ސިއްހީ ތަހުލީލުތައް ހެދުމަށް މަޑުކޮށްގެން ކަމަށާއި، އެމީހުން ވަރަށް އަވަހަށް ހިއުސްޓަންގައި ހުންނަ ޖޯންސަން ސްޕޭސް ސެންޓަރަށް ގެންދެވޭނެ ކަމަށް ނާސާއިން ބުނެއެވެ. މިއީ އިންސާނުން ހަނދުގައި ދާއިމީ މަރުކަޒެއް ގާއިމުކުރުމަށް ކުރާ މަސައްކަތުގައި ލިބުނު ވަރަށް ބޮޑު ކުރިއެރުމެއްކަމަށް ނާސާއިން ވަނީ ބުނެފައެވެ.