60 ދުވަހަށް ޤަތުލްޢާއްމު މެދު ކަނޑާލަން އިސްރާއިލުން އެއްބަސްވެފައިވާ ކަމަށް އެމެރިކާއިން ބުނެފި

ޣައްޒާގައި އިސްރާއިލުން ހިންގަމުންދާ ޤަތުލްޢާައްމު 60 ދުވަހުގެ މުއްދަތަށް ހުއްޓާލުމަށް އިސްރާއީލުން އެއްބަސްވެފައިވާ ކަމަށް އެމެރިކާއިން ބުނެފިއެވެ.

މި އެއްބަސްވުމުގެ ދަށުން، ފުރަތަމަ ހަފްތާގައި އިސްރާއީލުގެ 28 ގައިދީން ދޫކޮށްލުމާއި، އޭގެ ބަދަލުގައި ފަލަސްތީނުގެ 1،236 ފަލަސްތީނު ގައިދީން ދޫކޮށްލައި، ޝަހީދުވެފައިވާ ފަލަސްތީނުގެ 180 މީހުންގެ ހަށިގަނޑު ރައްދުކުރުން ހިމެނެއެވެ.

އެމެރިކާގެ ރައީސް ޑޮނަލްޑް ޓްރަމްޕް އަދި މެދުވެރިންގެ ގޮތުގައި މިސްރާއި ޤަތަރުގެ ހިމެނިގެން ހުށަހަޅާފައިވާ މި ޕްލޭންގައި، ހަމާސްއިން ހަނގުރާމަ ހުއްޓާލުމުގެ އެއްބަސްވުމުގައި ސޮއިކުރުމާއެކު ޣައްޒާއަށް އިންސާނީ އެހީ ފޯރުކޮށްދިނުން ހިމެނެއެވެ. މި އެހީތައް ފޯރުކޮށްދޭނީ އދ އާއި ރެޑް ކްރެސެންޓް އަދި އެއްބަސްވެފައިވާ އެހެނިހެން ފަރާތްތަކުންނެވެ.

އިސްރާއީލުގެ މީޑިއާތަކުން ބުނާ ގޮތުގައި، އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ވަނީ ޓްރަމްޕްގެ ހުށަހެޅުން ގަބޫލުކުރިކަމަށް، ޣައްޒާގައި ހިފަހައްޓާފައިވާ އިސްރާއިލުގެ ރަހީނުންގެ އާއިލާތަކަށް އަންގާފައެވެ.

އަދި، މި ޕްލޭން މިހާރު ދިރާސާކުރަމުންދާ ކަމަށާއި، ހުކުރު ނުވަތަ ހޮނިހިރު ދުވަހު ޖަވާބުދޭނެ ކަމަށް ހަމާސް އިން ބުނެފައިވާ ކަމަށް ރޮއިޓާސްއިން ބުނެފައިވެއެވެ.

އެމެރިކާގެ ޕްލޭންގައި ހިމެނޭ ގޮތުން، ދާއިމީކޮށް ޤަތުލްޢާއްމު ހުއްޓާލެވުމުން، ބާކީ ތިބި 30 އިސްރާއީލްގެ ރަހީނުން ހަމާސްއިން ދޫކޮށްލަން ޖެހޭނެއެވެ. އަދި ގަތުލްއާއްމު މެދުކަނޑާލުމުގެ އެއްބަސްވުން ތަންފީޒުކުރަން ފެށުމާއެކު، އިސްރާއީލުން ޣައްޒާގައި ހިންގާ ހުރިހާ ހަނގުރާމަވެރި އަމަލެއް ހުއްޓާލަން ޖެހޭނެއެވެ. މީގެ އިތުރުން، އިސްރާއީލުގެ ސިފައިން މަރުހަލާތަކަކަށް ބަހާލައިގެން އަނބުރާ ގެންދަން ޖެހޭނެއެވެ.

އިސްރާއީލުން ބުނާ ގޮތުގައި، ގަތުލްއާއްމު އެއްކޮށް ހުއްޓާލުމަށް އެއްބަސްވުމުގެ ކުރިން، ހަމާސް އިން ފުރިހަމައަށް ހަތިޔާރު ދޫކޮށްލައި، ވެރިކަމުގެ ބާރުވެސް ހަމާސްއިން ދޫކޮށްލަންޖެހޭނެއެވެ. އަދި ޣައްޒާގައި ބާކީ ތިބި އިސްރާއީލުގެ 58 ރަހީނުން ދޫކުރަން ޖެހޭނެއެވެ.

ނަމަވެސް ހަމާސްއިން މި ޑިމާންޑްތައް ދަނީ ދެކޮޅުހަދަމުންނެވެ. އެ ޖަމާޢަތުން ބުނާ ގޮތުގައި، އިސްރާއީލުންވެސް ޣައްޒާއިން އެމީހުންގެ ސިފައިން އަނބުރާ ގެންދަންޖެހޭނެއެވެ. އަދި ޤަތުލްޢާއްމު އެއްކޮށް ހުއްޓާލުމަށް އެއްބަސްވާން ޖެހޭނެއެވެ.

ައިސްރާއީލުން ޣައްޒާގައި މި ޤަތުލުޢާއްމު ފެށީ 2023 ވަނަ އަހަރުގެ އޮކްޓޯބަރު 7 ވަނަ ދުވަހުއެވެ. މި ޤަތުލްއާއްމުގައި54،000 އަށްވުރެ ގިނަ ފަލަސްތީނުގެ ރައްޔިތުން ޝަހީދުވެފައުވެއެވެ.