ރާއްޖޭގެ ވަޒީފާގެ ބާޒާރަށް ޒަމާނީ ހައްލެއް؛ ”މައި ކެރިއަރ ޕޯޓަލް“ އިފްތިތާޙުކޮށްފި

ވަޒީފާ ހޯދާ ފަރާތްތަކާއި ވަޒީފާ ދޭ ފަރާތްތައް އަދި ކެރިއަރ އެޑްވައިޒަރުން އެއް ޕްލެޓްފޯމަކުން ގުޅުވައިލުމަށް ފަރުމާކޮށްފައިވާ މައި ކެރިއަރ ޕޯޓަލް މިއަދު ރަސްމީކޮށް އިފްތިތާޙުކޮށްފިއެވެ.

މިޕޯޓަލް އިފްތިތާޙުކޮށްދެއްވީ ދާޚިލީ ވުޒާރާގެ ވަޒީރު ޢަލީ އިޙުސާނެވެ. ނޭޝަނަލް ކެރިއަރސް ސަރވިސް (އެންސީއެސް) އިން ތަރައްޤީކުރި މި ޕޯޓަލަށް ފައިސާ ހަމަޖައްސާފައި ވަނީ ވޯލްޑް ބޭންކުގެ އެހީގައި ހިންގާ ސެއިލްސް ޕްރޮޖެކްޓުންނެވެ.

މި ޕޯޓަލް މެދުވެރިކޮށް ތަމްރީނު ލިބިފައިވާ ކައުންސިލަރުންގެ އިރުޝާދު ލިބުމާއި ކެރިއަރުގެ ދުރު ރާސްތާ ލަނޑުދަނޑިތަކާ ހަމައަށް ވާސިލުވުމުގެ މަގުޗާޓެއް ކުރެހުމާއި ތަޢުލީމީ ފެންވަރާއި ތަޖުރިބާ އެއް ތަނަކުން ބެލޭ ޗާޓެއް ތައްޔާރުކުރުމުގެ ފުރުޞަތު ލިބެއެވެ. އެހެންމެ ބޭނުންކުރާ ފަރާތުގެ ހުނަރާ ގުޅޭ ވަޒީފާތައް އޮޓޮމެޓިކުން ހުށަހެޅޭ ނިޒާމެއް ވެސް އެ ޕޯޓަލްގައި ހިމެނެއެވެ.

"ދިވެހިރާއްޖޭގެ ވަޒީފާގެ ބާޒާރު ތަރުތީބުކޮށް ރައްޔިތުންނަށް ލުއިފަސޭހަ ޚިދުމަތްތަކެއް ފޯރުކޮށްދިނުމުގެ މަސްއޫލިއްޔަތު އަދާކުރާ ވުޒާރާގެ އިސްވެރިއެއްގެ ހައިސިއްޔަތުން އަޅުގަނޑުމެން އަބަދުވެސް އިސްކަންދެނީ މި ދާއިރާއަށް ހަލުވިކަމާއި ޒަމާނީ ހައްލުތައް ހޯދައިދިނުމަށް. އެގޮތުން ނޭޝަނަލް ކެރިއަރ ސަރވިސްގެ ފަރާތުން މިއަދު އިފްތިތާޙްކުރެވުނު 'މައިކެރިއަރ ޕޯޓަލް' އަކީ ވަޒީފާ ހޯދާ ފަރާތްތަކަށާއި ވަޒީފާދޭ ފަރާތްތަކަށް ކޮންމެވެސް ވަރެއްގެ ހައްލެއް ހަމަޔަގީނުންވެސް ގެނެސްދޭނެ ސޮލިއުޝަނެއް." ޕޯޓަލް އިފްތިތާޙުކުރެއްވުމުގެ ރަސްމިއްޔާތުގައި ވަޒީރު އިޙުސާން ވިދާޅުވިއެވެ.

މި މަސައްކަތަކީ ދިވެހިންނަށް އިސްކަންދޭ ވަޒީފާގެ ބާޒާރެއް ޤާއިމުކުރެއްވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެވަޑައިގެންނެވި ރިޔާސީ ވަޢުދުފުޅާ އެއްގޮތަށް މޯލްޑިވުސް 2.0 ގެ ތެރެއިން ކުރިއަށް ގެންދާ މަސައްކަތެއް ކަމަށް އެ ވުޒާރާއިން ބުނެއެވެ.

މި ޕޯޓަލްގެ ޚިދުމަތް މިހާރު www.mycareer.gov.mv މެދުވެރިކޮށް ލިބޭނެއެވެ.