ޔަހޫދީ ފައުޖުން ރަހީނުކުރި ޣައްޒާގެ 90 ރައްޔިތުން ދޫކޮށްލައިފި

ފާއިތުވި 15 މަސްދުވަހު މެދު ކެނޑުމެއްނެތި ޣައްޒާގައި ހިންގަމުންދިޔަ ގަތުލުއާއްމު ހުއްޓާލުމަށް އެއްބަސްވުމަށްފަހު، އެއަށް އަމަލުކުރަން ފެށި ފުރަތަމަ ދުވަހު ޔަހޫދީ ފައުޖުން ރަހީނު ކުރި ޣައްޒާގެ 90 ރައްޔިތުން މިނިވަން ކޮށްފިއެވެ.

އެއްބަސްވުމާއި އެއްގޮތަށް ހަމާސް އިން ވެސް ހައްޔަރުކޮށްފައިވާ 3 ޔަހޫދީ އަންހެނުން ދޫކޮށްލިއިރު، ހަމާސް ޖަމާއަތުގެ މެމްބަރުން އާއްމުންގެ ތެރެއަށް ނުކުތުމާއިއެކު ޣައްޒާގެ ރައްޔިތުން ވަނީ އުފާފާޅުކުރަން ފަށާފައެވެ.

މިއާއިއެކު، ޔަހޫދީން ރަހީނު ކުރި ފަލަސްތީނުގެ ރައްޔިތުން އެނބުރި ޣައްޒާއަށް އައުމާއިއެކު، އެމީހުންގެ އިންތިޒާރުގައި ތިބި އެތައް ހާސް ބަޔަކު ވަނީ އުފާފާޅުކޮށް ހަވާ އަރުވާފައެވެ. އިއްޔެ ޔަހޫދީ ފައުޖުގެ އަނިޔާވެރިކަމުގެ ދަށުގައި ބެހެއްޓުމަށްފަހު ދޫކޮށްލާފައިވަނީ 69 އަންހެނުންނާއި ފުރާވަރު އުމުރުފުރާގެ 21 ފިރިހެން ކުދިންނެވެ.

ހަނގުރާމް ހުއްޓާލުމުގެ އެއްބަސްވުުގެ ދަށުން ޣައްޒާއަށް ބޭނުންވާ އިންސާނީ އެހީތެރިކަން ވެސް ފޯރުކޮށްދިނުމުގެ މަސައްކަތް ފަށާފައިވާއިރު، މިއެއްބަސްވުމުގެ ދަށުން ފުރަތަމަ 6 ހަފްތާގެ ތެރޭގައި ހަމާސުން ހައްޔަރުކޮށްފައި ތިބި ޔަހޫދީންނާއި، އިސްރާއީލުން ރަހީނުކޮށްފައި ތިބި ޣައްޒާގެ ރައްޔިތުން ދޫކޮށްލުމަށް ވަނީ ހަމަޖެހިފައެވެ.

މި އެއްބަސްވުން ގާއިމުކުރުން ތިން ގަޑިއިރަށް ވުރެ ގިނަ ވަގުތަށް ލަސްވެގެން ދިޔައިރު، މި ވަގުތުކޮޅުގެ ތެރޭގައި ވެސް ނިރުބަވެރި ޔަހޫދީން ވަނީ ޣައްޒާއަށް އެތައް ހަމަލާތަކެއް ދީފައެވެ.

މިދިޔައަހަރުގެ އޮކްޓޫބަރު މަހުން ފެށިގެން ޔަހޫދީން މެދުކެނޑުމެއްނެތި ޣައްޒާގައި ކުރިއަށް ގެންދިޔަ ގަތުލުއާއްމު ހުއްޓާލުމަށް އެއްބަސްވިއިރު، 47,000 މީހުން ޝަހީދުވެ، 2.3 މިލިއަން މީހުންގެ ގެދޮރު ވަނީ ގެއްލިފައެވެ.