ތިމަރަފުށީ ޓެރަރިޒަމްގެ މައްސަލަ: ޝަރީޢަތުގެ އަޑުއެހުންތައް ނިންމާލައިފި

ތ. ތިމަރަފުށީގައި އިސްލާމް ދީން ކުރިއެރުވުމުގެ ނަމުގައި ޓެރަރިސްޓް ޖަމަޢަތްތަކަކަށް ތާޢީދުކޮށް ޓެރަރިޒަމްގެ ޢަމަލުތަކަށް ހިތްވަރުދިން ކަމުގެ ތުހުމަތުގައި ހައްޔަރު ކުރި 8 މީހުންގެ ޝަރީއަތުގެ އަޑުއެހުން ނިންމާލައޮފިއެވެ.

މި މައްސަލާގައި 2021 ވަނަ އަހަރު ހައްޔަރި ކުރުވުނު މީހުންގެ މައްޗަށް ގިނަ ތުހުމަތުތަކެއް ކުރެވުނެވެ.

އެގޮތުން، ޓެރެރިސްޓް ޖަމާޢަތްތަކުގެ ޢަމަލުތަކަކީ ސަބަބުވެރި ޢަމަލުތަކެއްކަމަށް ދައްކައި، ޓެރަރިސްޓް ޖަމާޢަތެއްކަމަށްވާ އިސްލާމިކް ސްޓޭޓް ޖަމާޢަތުގެ އިރުސާދުގެ ދަށުން ދިވެހިރާއްޖޭގައި ޓެރަރިޒަމްގެ ޢަމަލުތައްކުރުމަށް ރާވައި އެކަމަށް ހިތްވަރުދީ، އިމްޕްރޮވައިޒްޑް އެކްސްޕްލޯސިވް ޑިވައިސް (އައި.އައި.ޑީ) އެއް ތައްޔާރުކުރުމަށްފަހު ދިވެހިރާއްޖޭގެ ސަރަޙައްދެއްގައި ގޮއްވާލައި، ދިވެހިރާއްޖޭގެ ޤައުމީ ސަލާމަތަށް ނުރައްކަލެއް ކުރިމަތިކުރުވުމަށް ތައްޔާރުވަމުންދިއުން ހިމެނެއެވެ.

އަދި، ދަތުރު ދިޔުމުގެ ނަމުގައި ފަޅުރަށްރަށަށްގޮސް ތަމްރީންތައް ހަދަމުންދިޔުމާއި ތ.ތިމަރަފުށީގައި ދީނުގެ ނަމުގައި ހަރުކަށި ފިރުކު ފެތުރުމުގެ ގޮތުން ރަށުގެ ބައެއްގޭގޭގައި ހަރުކަށި ފިކުރުތަކުގެ ކްލާސްތައް ހިންގައި އޮންލައިންކޮށް ހަރުކަށި ފިކުރުގެ ދަރުސްތައް ބޭއްވުންވެސް ހިމެނެއެވެ.

މީގެ އިތުރުން، ސަރުކާރުން މިސްކިތްތަކަށް ކަނޑައަޅާފައިވާ އިމާމުންގެ ފަހަތުގައި ނަމާދު ނުކޮށް ވަކި ޖަމާޢަތް ހަދައިގެން ނަމާދުކުރަމުން ދިޔުމާއި ހަރުކަށި ފިރުކުރުގެ ފަރާތްތަކާއި ގުޅުންއޮންނަ ފަރާތްތަކަށް މާލީ އެހީތެރިކަން ފޯރުކޮށްދެމުންދާ ކަމަށްވެސް އެ މީހުންގެ މައްޗަށް ތުޙުމަތު ކުރެވުނެވެ.

މައްސަލާގައި ދަޢުވާލިބޭ މީހުން:

1. ތ. ތިމަރަފުށި، ކެނެރީގެ، ޢަލީ މުނީޒު

2. ތ. ތިމަރަފުށި، އަސުރުމާގެ މުޙައްމަދު އާޞިރު

3. ތ. ތިމަރަފުށި، ފެހިވިދުވަރުގެ ޢަބްދުالله ޝަރީފް

4. ތ. ތިމަރަފުށި، އަސްރަފީވިލާ އަޙްސަން މުޙައްމަދު

5. ރ. މަޑުއްވަރި، ބީޗްހައުސް ޢަބްދުالله ޢިމާދު

6. ތ. ތިމަރަފުށި، ސައިމާ ޝަމާޚު ޝަރީފް

7. ނ. ކުޑަފަރި، ރޯޒްމީޑު ޢިބްރާހިމް ލޫޠު

8. ރ. ކަނދޮޅުދޫ، ޢަލީ އަރުހަމް މުޙައްމަދު

މި މައްސަލާގައި ކޮށްފައިވާ ދަޢުވާތައް:

- ޓެރަރިޒަމްގެ ޢަމަލެއް ކުރުމަށް ރޭވުން

- ޓެރަރިޒަމްގެ ޢަމަލެއް ކުރުމަށް ހިތްވަރު ދިނުން

- ޓެރަރިސްޓު ޖަމާޢަތަކަށް ތާއީދުކުރާ މީހެއްކަން ދޭހަވާފަދަ ލިޔުމެއް ގެންގުޅުން

- ހަނގުރާމައަށް ދާން އުޅުން

- ޓެރަރިޒަމްގެ ޢަމަލެއް ކުރުމަށް ބޭނުންވާ އުކުޅުތައް ދަސްކުރުން

- ޢަދުލު އިންޞާފު ޤާއިމުކުރުމަށް ހުރަސްއެޅުން

މި ދަޢުވާތައް ކޯޓަށް ހުށަހެޅީ 2021 ވަނައަހަރުގެ ފެބްރުވަރީ މަހުގެ 8 ވަނަ ދުވަޖުއެވެ.

މި މައްސަލައިގެ ޝަރީޢަތުގެ އެންމެހައި އަޑުއެހުންތައް އިއްޔެގެ ނިޔަލަށް ވަނީ ނިމިފައެވެ. އިއްޔެގެ އަޑުއެހުމުގައި ދެފަރާތުން ޚުލާޞާކޮށް ވާހަކަދައްކައި، ފަހު ބަސް އިއްވާފައިވެއެވެ.

ދެން އޮންނާނީ މި މައްސަލާގައި ކޯޓުން ގޮތެއް ކަނޑައެޅުމެވެ. ޖިނާއީ އިޖުރާއަތު ޤާނޫނު ބުނާގޮތުން ޚުލާޞާ ބަޔާން ހުށަހެޅުމުގެ އަޑުއެހުން ބޭއްވޭ ތާރީޚުން ފެށިގެން 30 ދުވަސް ތެރޭގައި މައްސަލާގައި ޙުކުމްކުރަންޖެހޭނެއެވެ. އެހެންކަމުން 8 މޭގެ ކުރިން މި މައްސަލާގައި ކޯޓުން ގޮތެއް ނިންމާނެ ކަމަށް ބެލެވެއެވެ.