ކޮޅުފުށީގެ ލިންކު ރޯޑު ޤާއިމްކޮށް، އިތުރު 100 ހައުސިން ޔުނިޓު ޤާއިމްކޮށްދޭނަން: ރައީސް

ރިޔާސީ ވަޢުދުފުޅާއި އެއްގޮތަށް، މ. ކޮޅުފުށީގައި ލިންކް ރޯޑެއް ޤާއިމްކޮށް، އިތުރު 100 ހައުސިން ޔުނިޓު ޤާއިމްކޮށްދެއްވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިހާރު މ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން އެރަށުގެ ރައްޔިތުންނާއި އެކު ބޭއްވެވި ބައްދަލުވުމުގައި ރައީސް ވިދާޅުވީ، އެ ރަށުގެ މަގުތައް ހެދުމުގެ މަޝްރޫއަކީ ވަރަށް މުހިންމު އަދި އެމަނިކުފާނުގެ ރިޔާސީ ވައުދުފުޅާއި އެއްގޮތަށް ނިންމަވައިދެއްވާނެ މަޝްރޫއެއް ކަމަށެވެ.

އެގޮތުން އެ މަޝްރޫއު ނިމޭއިރު ލިންކްރޯޑް ޤާއިމްކުރެވޭނެ ކަމަށާއި، އެކަން ވާނީ ތަރައްގީގެ ގޮތުން އެރަށަށް ގެނެވޭ މުހިންމު އުމްރާނީ މަސައްކަތަކަށް ކަމަށް ރައީސް ވިދާޅުވިއެވެ.

އިތުރަށް އެ ރަށުގެ މަޝްރޫއުތަކުގެ ވާހަކަ ހިއްސާކުރައްވަމުން ރައީސް ވިދާޅުވީ، ކޮޅުފުށްޓަށް އިތުރު ހައުސިން ޔުނިޓުތައް ބޭނުންވާ ކަމަށާއި، ސަރުކާރުން މުޅި ރާއްޖޭގައި ކުރިޔަށްގެންދަން ރާވާފައިވާ މަޝްރޫއުތަކުގެ ތެރެއިން އެ ރަށުގައި ވެސް އިތުރު 100 ހައުސިން ޔުނިޓު ޤާއިމްކޮށްދެއްވާނެ ކަމަށެވެ.

އަދި މިހާރު އެ ރަށުގައި ނިމިފައި ހުރި ގެތަކަށް ކަރަންޓައި ނަރުދަމާ ގުޅުމުގެ މަސައްކަތް ވެސް ކުރިޔަށްދާނެ ކަމަށާއި، އެ މަސައްކަތްތައް ފެނަކައިން ވަރަށް ބޮޑު އިސްކަމެއްދެއްވައިގެން ކުރިޔަށްގެންދަވާނެ ކަމަށް ރައީސް ވިދާޅުވިއެވެ.

ބާރު ސްޕީޑްގައި ގެތަށް ބޭނުންކުރަން ފެށޭނެ. މިހާރު ހަވާލުކުރުމުގެ މަރުހަލާ ކުރިއަށްދަނީ. އެކަން ވަރަށް ގާތުން ބަލަމުން މި ގެންދަނީ. މި އަހަރު ތެރޭގައި އާ ގެތަކުގެ ހުރިހާ ކަމެއް ނިމިގެންދާނެ

ރައީސް ޑރ. މުޙައްމަދު މުޢިއްޒު

ކޮޅުފުށީގެ ތަރައްގީގެ ބައެއް މަޝްރޫއުތައް ރައީސް މިއަދު ފައްޓަވައިދެއްވާފައިވާއިރު، މިއަދު އެގޮތުން ވަނީ އެރަށުގެ މަގުތައް ތަރައްގީކުރުމުގެ މަޝްރޫޢާއި ފިޓްނެސް އަދި ރެކްރިއޭޝަން ސެންޓަރެއް ގާއިމުކުރުމުގެ މަޝްރޫއުގެ މަސައްކަތް ވެސް ފަށާފައެވެ.

މަގުތައް ތަރައްގީކުރުމުގެ މަޝްރޫޢު ފައްޓަވައިދެއްވީ ކޮންސްޓްރަކްޝަން އެންޑް އިންފްރާސްޓްރަކްޗާގެ ވަޒީރު ޑރ. ޢަބްދުﷲ މުއްޠަލިބެވެ. މި ރަސްމިއްޔާތުގައި އާރުޑީސީގެ މެނޭޖިން ޑިރެކްޓަރު އިބްރާހިމް ނަޒީމާއި ކޮޅުފުށީ ކައުންސިލްގެ ރައީސް ޢަބްދުﷲ ޢަލީމް ބައިވެރިވެވަޑައިގެންނެވިއެވެ.

ފިޓްނެސް އަދި ރެކްރިއޭޝަން ސެންޓަރުގެ ބިންގާ އަޅުއްވައިދެއްވީ މާލީ ވަޒީރު ވަޒީރު މޫސާ ޒަމީރެވެ. މި ރަސްމިއްޔާތުގައި މުލަކު ދާއިރާގެ މެންބަރު އިބްރާހިމް ނައުފަލާއި، ކޮޅުފުށީ ކައުންސިލްގެ ރައީސް ޢަބްދުﷲ ޢަލީމް، އަދި އެމްޓީސީސީގެ މެނޭޖިންގ ޑިރެކްޓަރ އާދަމް ސަޢީދު ބައިވެރިވެވަޑައިގެންނެވިއެވެ.