މަޑަވެލި ރައްޔިތުން ބޭނުންވާ ފެންވަރުގެ ރަނގަޅު ބޮޑު ބަނދަރެއް ހަދާނަން: ރައީސް ޑރ.މުއިއްޒު
ގދ.މަޑަވެލި ރައްޔިތުން ބޭނުންވާ ފެންވަރުގެ ރަނގަޅު ބޮޑު ބަނދަރެއް ހަދާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިފަދައިން ވިދާޅުވީ މިހާރު އެމަނިކުފާނު ގދ ގެ އަތޮޅު ތަކަށް ކުރައްވަމުންގެންދަވާ ދަތުރުފުޅުގެ ތެރެއިން އެ އަތޮޅުގެ މަޑަވެލި އަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
މިގޮތުން ރައީސް ޑރ.މުއިއްޒު ވިދާޅުވީ މަޑަވެލި ފަދަ މަސްވެރިކަމުގައި ކުރިއަރާފައިވާ ރަށަކަށް ޖާގަ އިތުރުވެގެން ދިޔުން މުހިންމު ކަމަށެވެ. އެހެންކަމުން މިއަދު އެރަށުގެ ކައުންސިލާއި އެކު ބޭއްވި ބައްދަލުވުމުގައި ޔަގީންކަން ދެއްވި ފަދައިން ރައީސް ޑރ.މުއިއްޒު ވަނީ ރަށުގެ ރައްޔިތުން ބޭނުންވާ ފެންވަރުގެ ބަނދަރެއް ހަދާނެ ކަމުގެ ޔަގީން ރަށުގެ ރައްޔިތުންނަށް އަރުވާފައެވެ.
މި އަހަރުގެ ބަޖެޓުގައި ބަނދަރުގެ މަސައްކަތް ނެތް ނަމަވެސް އަންނަ އަހަރުގެ ބަޖެޓަށް މަޑަވެލި ބަނދަރު ހެދުމުގެ މަސައްކަތް ހިމަނާނެ ކަމަށާއި އޭގެ ކުރިން ވެސް ބަނދަރުގެ މަސައްކަތް ކުރިއަށް ގެންދެވޭ ގޮތަށް ހަމަޖެހިއްޖެނަމަ، އުސޫލު ތަކުގެ ތެރެއިން އެކަމަށް މަސައްކަތް ފަށާނެ ކަމަށް ރައީސް ޑރ.މުއިއްޒު ވިދާޅުވިއެވެ.
"އަޅުގަނޑު މިއަދު ކައުންސިލް ބައްދަލުވުމުގައި ވެސް ޔަގީންކަން ދިން ފަދައިން ރައްޔިތުންނަށް ދޭނެ ޔަގީން ކަމަކީ މިއީ. އިރާދަކުރެއްވިއްޔާ ތިޔަ ބޭފުޅުން ބޭނުންވާ ފެންވަރުގެ ރަނގަޅު ބޮޑު ބަނދަރެއް ހަދާނަން. އެހެންވީމަ މި އަންނަ އަހަރުގެ ބަޖެޓަށް އެކަން ހިމަނައިގެން ކުރިއަށް ގެންދެވޭނެ މަގެއް ފަހި ކުރުމަށް އަޅުގަނޑުމެން މަސައްކަތް ކުރާނަން. އެއަށްވުރެ އަވަހަށް އެކަން ކުރެވޭނެ ގޮތެއް އޮތް ނަމަވެސް އުސޫލު ތަކުގެ ތެރެއިން އެކަމަށް މަސައްކަތް ފަށާނެ ވާހަކަ ދަންނަވަން."
ރައީސް ޑރ.މުއިއްޒު ވިދާޅުވިއެވެ.
މަޑަވެލި ރައްޔިތުންނާއި ބައްދަލުކުރައްވަމުން އެމަނިކުފާނު ވަނީ ރަށުގެ ބަނދަރު ހެދުމުގެ އިތުރުން، އެ ރަށުގެ ސިއްހީ މަރުކަޒުގެ ފެންވަރު މަތިކުރާނެ ކަމަށް ވެސް ވިދާޅުވެފައެވެ. މިގޮތުން ރާއްޖޭގެ ކޮންމެ ރަށެއްގައި ވެސް ރަށުގެ އާބާދީއާއި އެއްވަރަށް ލެބޯޓަރީ ހިދުމަތް ދިނުމަށް އެމަނިކުފާނު ވެވަޑައިގެން ވައުދުގެ ތެރެއިން މަޑަވެލީގައި ވެސް ލެބޯޓަރީގެ ހިދުމަތް އިތުރުކުރައްވާނެ ކަމަށް ރައީސް ޑރ.މުއިއްޒު ވަނީ ވިދާޅުވެފައެވެ.
މީގެ އިތުރުންވެސް ރައީސް ޑރ.މުއިއްޒު ވަނީ އަންނަ އަހަރުގެ ބަޖެޓުގައި ހިމަނައިގެން ނުވަތަ އޭގެ ކުރިން މި އަހަރުގެ ތެރޭގައި ނަމަވެސް އެންމެ އިސްކަމެއް ދޭ ރަށެއްގެ ގޮތުގައި މަޑަވެލި ސްކޫލް އެއް ސެޝަނަށް ބަދަލު ކުރުމަށްޓަކައި، މަލްޓި ޕާޕޯސް ހޯލެއްވެސް ހިމެނޭ ގޮތަށް ސްކޫލްގެ ޖާގަ އިތުރުކުރައްވާނެ ކަމަށް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
