މާލެ ސިޓީ ކައުންސިލުގެ އައު އިމާރާތުގެ ބިިންގާ އަޅައިިފި

މާލެ ސިޓީ ކައުންސިލުގެ އައު އިމާރާތުގެ ބިިންގާ އަޅައިިފިއެވެ.

އައު އިމާރާތުގެ ބިިންގާ އެޅުމަށް ބޭއްވުނު ރަސްމިއްޔާތުގައި ވާހަކަ ދައްކަވަމުން މޭޔަރ ޢާޒިމް ވަދާޅުވީ، މާލެ ސިޓީ ކައުންސިލްގެ އެކި މުވައްޒަފުން އެކިތަންތަނުގައި ތިބެގެން މަސައްކަތް ކުރަން ޖެހުމަކީ ރައްޔިތުންނަށް ޚިދުމަތް ދިނުމުގައި ދަތި އުދަނގޫތަކެއް ކުރިމަތިވާ ކަމެއް ކަމަށެވެ. އަދި މާލެ ސިޓީ ކައުންސިލް ނޫނީ އޮފީހެއް ނެތް ކައުންސިލެއް ރާއްޖޭގައި ނެތްކަމަށް ވިދާޅުވިއެވެ.

ހަމައެކަނި އަމިއްލަ އޮފީހެއް ނެތް ކައުންސިލަކީ މާލެ ސިޓީ ކައުންސިލްކަން ފާހަގަ ކުރައްވައި މޭޔަރ ޢާޒިމް ވިދާޅުވީ، ދަތި އުދަނގޫ މަރުހަލާއެއްގައި މަސައްކަތް ކުރަމުންދާއިރު ކައުންސިލްގެ ހުރިހާ މެންބަރުންގެ ފަރާތުން ވަރަށް ބޮޑު އެހީތެރިކަމެއް ލިބެމުން އަންނަ ކަމަށެވެ.

މޭޔަރ ވިދާޅުވީ ޚިދުމަތުގެ ރޮނގުން މާލެ ސިޓީ ކައުންސިލަށް ވުރެ ރަނގަޅަށް ޚިދުމަތްދޭ އޮގަނައިޒޭޝަނަށް ނެތް މިންވަރަށް އެ ކައުންސިލްގެ ހުރިހާ މެންބަރުންނާއި މުވައްޒަފުން ގުޅިގެން ކޮށްދެވެން ހުރި ހުރިހާ ކަމެއް ކޮށްދެއްވާނެ ކަމަށެވެ. އަދި ވޭތުވެދިޔަ 15 އަހަރު އުފުލި ބުރައާއި ތަކުލީފު ނިމުމަކަށް ގެނެވި ކުރިއަށް އޮތް 8 ނުވަތަ 10 މަސް ދުވަހުގެ ތެރޭ މި އޮފީހަށް ވަދެވޭ ވަރަށް މަސައްކަތް ކުރައްވާނެ ކަމަށްވެސް މޭޔަރ ވިދާޅުވި އެވެ.

މާލެ ސިޓީ ކައުންސިލްގެ އައު ޢިމާރާތް އެޅުމުގެ މަސައްކަތް ކުރިއަށްދަނީ ކައުންސިލްގެ ބެލުމުގެ ދަށުގައިވާ ތައިސޭ ކޮށީގައެވެ. 20 ހާސް އަކަފޫޓުގެ ބިއްމެއްގައި ޢިމާރާތް ކުރާ މި އައު އޮފީސް ޢިމާރާތުގައި ހުންނާނީ ދެ ފަންގިފިލާއެވެ. މި ވަގުތު މާލެ ސިޓީ ކައުންސިލުން ޚިދުމަތް ދެމުން އަންނަނީ އެކި ސަރަހައްދު ތަކުގައި ހުރި 9 އިމާރާތެއްގައެވެ. މާލެސިޓީ ކައުންސިލް އޮފީސް އިމާރާތަކީ 4.9 މިލިއަން ރުފިޔާ ހަރަދުކޮށްގެން ހަދަމުންދާ އިމާރާތެކެވެ.