ޤަތަރު ކުރީގެ އަމީރު އަވަހާރަވުމާއި ގުޅިގެން ރައީސްގެ ތަޢުޒިޔާ؛ ”އެއީ އާދަޔާޚިލާފު ލީޑަރޝިޕެއް ދެއްކެވި ބޭފުޅެއް“

ޤަޠަރުގެ ތަރައްޤީގެ ބާނީގެ ގޮތުގައި ބެލެވޭ އެ ޤައުމުގެ ކުރީގެ އަމީރު، ޝައިޚް ޙަމަދު ބިން ޚަލީފާ އަލްޘާނީ އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާ ވިދާޅުވެއްޖެއެވެ.

އުމުރުން 74 އަހަރުފުޅުގައި ޝެއިޚް ހަމަދު އަވަހާރަވީ މިއަދު ހެނދުނު ވަގުތެއްގައެވެ.

ރައީސުލްޖުމްހޫރިއްޔާ ޑރ. މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ޝައިޚް ޙަމަދު އަވަހާރަވީ ޚަބަރު އެއްސެވީ ފުން ހިތާމަޔާއެކު ކަމަށެވެ. އެމަނިކުފާނަކީ ޤަޠަރުގެ ކުރިއެރުމަށާއި ތަރައްޤީއަށް ދުރުވިސްނޭ އާދަޔާޚިލާފު ލީޑަރޝިޕެއް ދެއްކެވި ބޭފުޅެއްކަން ރައީސް ފާހަގަކުރެއްވިއެވެ.

ރައީސް ވަނީ ޤަޠަރުގެ މިހާރުގެ އަމީރު ޝައިޚް ތަމީމް ބިން ޙަމަދު އަލްޘާނީއަށާއި، ޝާހީ ޢާއިލާއަށާއި، ޤަޠަރުގެ ސަރުކާރާއި ރައްޔިތުންނަށް އިޚްލާޞްތެރި ތައުޒިޔާ ފޮނުއްވާފައެވެ. އަދި މަރްޙޫމްގެ ފުރާނަފުޅަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި ދުޢާކުރެއްވިއެވެ.

ޝައިޚް ޙަމަދު ޤަޠަރުގެ އަމީރުކަން ކުރެއްވީ 1995 އިން 2013 ވަނަ އަހަރާ ހަމައަށެވެ. އެމަނިކުފާނު ވެރިކަން ދޫކޮށްލެއްވީ 2013 ވަނަ އަހަރު، ދަރިކަލުން އަދި މިހާރުގެ އަމީރު ޝައިޚް ތަމީމްއާ ވެރިކަން ޙަވާލުކުރެއްވުމަށްފަހުގައެވެ. މުޠުލަޤު ރަސްކަމެއްގެ ގޮތުގައި ވެރިކަން ކުރެއްވި ޝައިޚް ޙަމަދުގެ 18 އަހަރުވީ ޒަޢާމަތުގައި ޤަޠަރު ވަނީ ދުނިޔޭގެ އެންމެ މުއްސަނދި ޤައުމަށް ބަދަލުކޮށްލައްވާފައެވެ.

އެމަނިކުފާނުގެ ވެރިކަމުގައި ޤަޠަރުގެ ގޭސް އުފައްދާ މިންވަރު 77 މިލިއަން ޓަނަށް އިތުރުކުރެއްވިއެވެ. މީގެ ނަތީޖާއެއްގެ ގޮތުން ބޮލަކަށް ޖެހޭ އާމްދަނީ 86,440 ޑޮލަރަށް އަރައި، ޤަޠަރު އިޤްތިޞާދީ ގޮތުން ބޮޑު ކުރިއެރުމެއް ހޯދިއެވެ. މީގެ އިތުރުން ޤަޠަރު އިންވެސްޓްމަންޓް އޮތޯރިޓީ (ކިއު.އައި.އޭ) އުފައްދަވައި، ދުނިޔޭގެ މަޝްހޫރު ކުންފުނިތަކާއި އިމާރާތްތަކުގައި 100 ބިލިއަނަށްވުރެ ގިނަ ޑޮލަރު އިންވެސްޓްކުރެއްވިއެވެ. އޭގެ ތެރޭގައި އިނގިރޭސިވިލާތުގެ "ދަ ޝާޑް" އިމާރާތާއި، ހެރޮޑްސް އަދި ޕެރިސް ސެއިންޓް ޖާމަން ކްލަބް ފަދަ ތަންތަން ހިމެނެއެވެ.

ޚާރިޖީ ދާއިރާއިންނާއި ކުޅިވަރުގެ ދާއިރާއިންވެސް ޝައިޚް ޙަމަދު ވަނީ ޤަޠަރު ދުނިޔޭގެ ޗާޓަށް ނެރުއްވާފައެވެ. އެގޮތުން 2006 ގެ އޭޝިއަން ގޭމްސްއާއި، 2022 ވަނަ އަހަރުގެ ފީފާ ވޯލްޑް ކަޕް ބޭއްވުމުގެ ފުރުޞަތު ޤަޠަރަށް ހޯއްދަވައިދެއްވީ އެމަނިކުފާނުގެ ޒަޢާމަތުގައެވެ. އޭގެ އިތުރުން ސަރަޙައްދީ ސުލްޙައަށްޓަކައި "ދޯހާ އެއްބަސްވުން" ފަދަ މުހިންމު ސިޔާސީ މަޝްވަރާތައްވެސް އެމަނިކުފާނުގެ އިސްނެންގެވުމުގެ މަތިން ޤަޠަރުގައި ކުރިއަށްގެންގޮސްފައިވެއެވެ.