40 އަހަރު ނުނަގާ ވަރަށް ދަރަނި ނަގައި، ގައުމު އަނދަވަޅަކަށް ވައްޓާލީ ޞާލިހު: ހަމްދާން

މިދިޔަ 40 އަހަރު ތެރޭ ދައުލަތުން ނުނަގާ ވަރަށް ރޭވުންތެރިކަމެއް ނެތި ދަރަނި ނަގައި ގަމުގެ އިގްތިސާދު އަނދަވަޅަކަށް ވައްޓާލާފައިވަނީ ކުރީގެ ރައީސް އިބްރާޙީމް މުހައްމަދު ޞާލިޙް ކަމަށް އެފްޑީސީގެ މެނޭޖިންގ ޑިރެކްޓަރ ހަމްދާން ޝަކީލް ވިދާޅުވެއްޖެއެވެ.

ރާއްޖޭގެ އިގްތިޞާދީ ހާލަތާއި ގުޅޭ ގޮތުން އެކްސް ގައި ކުރެއްވި ޕޯސްޓެއްގައި ހަމްދާން ވިދާޅުވީ، ރައީސް ޞާލިހު، ގަމުގެ އިގްތިސާދު އަނދަވަޅަކަށް ވައްޓާލާފައިވާ ކަމީ ބަދަލު ނުވާނެ ހަގީގަތެއް ކަމަށެވެ.

މިއަދުގެ ރައީސް، ރައީސް ޑރ.މުޢިއްޒު ދަނީ ރޭވުން ތެރިކަމާއި އެކު ދައުލަތުގެ ހަރަދުތަށް ކުޑަކޮށް ދަރަނި ހަމަޖައްސާ އިގްތިސާދުގެ ދުވުން އަލުން ބާރު ކުރަން ގިނަ ހެޔޮ މަސައްކަތްތަކެއް ކުރައްވަމުން.

ހަމްދާން ޝަކީލް

ދުނިޔޭގެ މަޝްހޫރު ކްރެޑިޓް ރޭޓިން އެޖެންސީ ފިޗުން މިދިޔަ ބުދަ ވަނީ ރާއްޖޭގެ ރޭޓިން މުރާޖައާކުރުމަށް ފަހު "ބީ މައިނަސް"އިން "ސީސީސީ ޕްލަސް"އަށް ދަށްކޮށްފަ އެވެ. އެ ރޭޓިންއަކީ ބޭރުގެ ފަރާތްތަކަށް ދައްކަން ޖެހޭ ދަރަނި ނުދެއްކި ޑީފޯލްޓްވުމުގެ ފުރުސަތު ވަރަށް ބޮޑު ގައުމުތަކަށް ދޭ ރޭޓިންއެކެވެ.

އެކަމާއި ގުޅިގެން، ވޯލްޑް ބޭންކުން ރާއްޖެއަށް ކަނޑައަޅާފައި ހުންނަވާ ކަންޓްރީ އިކޮނޮމިސްޓް އަދި ރެޒިޑެންޓް ކޯޑިނޭޓަރު އެރްދެމް އަތާސް ވަނީ، ރާއްޖެއަށް މިހާރު ކުރިމަތިވެފައިވާ އިގްތިސާދީ ނާޒުކު ހާލަތަކީ މިދިޔަ 10 އަހަރު ތެރޭގައި ބޮޑެތި އަދަދުތަކުން ދަރަނި އުފެއްދުމުގެ އިތުރުން އެ 10 އަހަރު ތެރޭގައި މެދުނުކެނޑި ފިސްކަލް އަދި ކަރަންޓް އެކައުންޓް ޑެފިސިޓް ބޮޑުވާން ދޫކޮށްލުމުން ދިމާވި ހާލަތެއް ކަމަށް ވިދާޅުވެފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދައުލަތުގެ ޚަރަދުތައް ކުޑަކުރުމަށްޓަކައި ގިނަ ފިޔަވަޅުތަކެއް އަޅުއްވަން ނިންމަވާފައެވެ. އެގޮތުން، ސަރުކާރުގެ ރިކަރަންޓް ޚަރަދު ކުޑަކުރުމުގެ ގޮތުން ސިޔާސީ މަޤާމުތަކުގެ އަދަދު މަދުކުރުމާއި، އެކި މުނާސަބަތުތަކުގައި ބާއްވާ ޙަފްލާތަކަށް ކުރާ ޚަރަދުތައް މަދު ކުރެއްވުން ފަދަ ކަންކަން ހިމެނެއެވެ. އަދި އެނޫންވެސް އިތުރު ފިޔަވަޅުތައް އަޅުއްވާނެކަން ވަނީ ހާމަކުރައްވާފައެވެ.