ދުނިޔޭގައި އުޅޭ ކޮންމެ މީހަކީވެސް ދިރިއުޅުން ތަފާތު ގޮތަކަށް ތަޖުރިބާކުރާނެ މީހެއް: މެޑަމް ސާޖިދާ

ދުނިޔޭގައި އުޅޭ ކޮންމެ މީހަކީވެސް ދިރިއުޅުން ތަފާތު ގޮތަކަށް ތަޖުރިބާކުރާނެ މީހެއްކަމަށާއި، އެ ތަފާތަކީ އެމީހެއްގެ ބަލިކަށިކަމެއް ނޫންކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

ދުނިޔޭގެ ޑައުން ސިންޑްރޯމް ދުވަހާ ގުޅިގެން އެކަމަނާ ކުރެއްވި ޕޯސްޓެއްގައި ވިދާޅުވީ، އިންސާނުންގެ މެދުގައި ހުންނަ މިފަދަ ތަފާތުތަކަކީ ދުނިޔޭގެ ރީތިކަން އިތުރުކޮށްދޭ މުހިންމު ބައެއް ކަމަށެވެ.

މެޑަމް ސާޖިދާ ފާހަގަކުރެއްވި ގޮތުގައި، ޑައުން ސިންޑްރޯމް ހުންނަ ފަރާތްތަކަށް މުޖްތަމަޢުގެ ތެރޭގައި ގިނަ ފަހަރަށް ބާކީވުމާއި އެކަހެރިކަމުގެ ހިތްދަތި އިޙްސާސްތަކާ ކުރިމަތިލާން ޖެހެއެވެ. ނަމަވެސް، އެފަދަ ގޮންޖެހުންތަކާ އެކުވެސް އެފަރާތްތަކަކީ އިންތިހާއަށް ލޯތްބާއި، އޯގާތެރިކަމާއި، އަދި ކަންކަމުގައި ސާބިތުކަން ދައްކުވައިދޭ ނަމޫނާ ބައެއްކަން އެކަމަނާ ފާހަގަކުރެއްވިއެވެ.

މިއަހަރުގެ ޑައުން ސިންޑްރޯމް ދުވަސް ފާހަގަކުރާއިރު، ކޮންމެ މީހަކަށްމެ އެމީހެއްގެ އަގު ވަޒަންކުރެވޭ، އަދި އެންމެން ބައިވެރިކުރެވޭ ފަދަ މާޙައުލެއް ބިނާކުރުމަށް އަޒުމް ކަނޑައަޅަންޖެހޭ ކަމަށް މެޑަމް ސާޖިދާ ވިދާޅުވިއެވެ. މުޖްތަމަޢުގެ ތެރޭގައި އެއްވެސް މީހަކީ 'ފެންނަން ނެތް' ނުވަތަ އަޅައިނުލާ ދޫކޮށްލެވިފައިވާ މީހެއް ކަމުގެ އިޙްސާސް ނުކުރެވޭ ފަދަ އިންސާފުވެރި މާޙައުލެއް ޤާއިމުކުރުމަކީ އަޅުގަނޑުމެންގެ ޒިންމާއެއްކަން އެކަމަނާ ހަނދާންކޮށްދެއްވިއެވެ.

އަޅުގަނޑުމެން އެކަކު އަނެކަކަށް ކަންތައް ކުރާ ގޮތާމެދު މިއަށްވުރެ ބޮޑަށް ހޭލުންތެރިވެ، އޯގާތެރިކަން އިސްކުރުމަކީ މިއަދު ކުރަންޖެހިފައިވާ މަސައްކަތެއްކަމަށް އެކަމަނާ ވިދާޅުވިއެވެ. ވަކިން ޚާއްޞަކޮށް، ޑައުން ސިންޑްރޯމް ހުންނަ ފަރާތްތަކަށް މުޖްތަމަޢުގެ ތެރެއިން ލިބެންޖެހޭ ފުރިހަމަ ޖާގަ ހޯދައިދިނުމުގައި، ކޮންމެ ފަރުދަކުވެސް މިއަށްވުރެ ބޮޑަށް އިސްނަގައިގެން މަސައްކަތްކުރަންޖެހޭ ކަމަށް އެކަމަނާ ބާރުއެޅުއްވިއެވެ.

މެޑަމް ސާޖިދާގެ މެސެޖު ނިންމަވާލެއްވީ ވަރަށް މުހިންމު ނުކުތާއަކަށް އަލިއަޅުއްވާލައްވަމުންނެވެ. އެކަމަނާ ވިދާޅުވި ގޮތުގައި، މުޖްތަމަޢުގެ ތެރޭގައި ބައިވެރިވުމާއި، އެ މުޖްތަމަޢުގެ ބައެއްގެ ގޮތުގައި ބަލައިގަތުމަކީ ކޮންމެ އިންސާނަކަށްމެ ލިބިގެންވާ އަސާސީ ޙައްޤެކެވެ. އެހެންކަމުން، އެ ޙައްޤު އެންމެންނަށް ކަށަވަރުކޮށްދިނުމަކީ ހަމަހަމަ މުޖްތަމަޢެއް ބިނާކުރުމުގެ ބިންގަލެވެ.