މުޒާހަރާ ހުއްޓާލައި ކޫއްޑޫ އޮޕަރޭޝަނަށް އައިއްސި!
ލިޔުންތެރިޔާ
ޚަދީޖާ އަރުފާ
މަސްވެރިންނަށް ލިބެންޖެހޭ ފައިސާ ނުލިބިގެން، ކޫއްޑޫގައި މަސްވެރިން ކުރަމުންދިޔަ އިހްތިޖާޖު ހުއްޓާލައިފި އެވެ.
މިރޭގެ ވަގުތެއްގައި ކޫއްޑޫގައި މަސްވެރިން ކުރަމުންދިޔަ އިހްތިޖާޖު ހުއްޓާލުމާއެކު ކޫއްޑޫ މިހާރު ވަނީ އަލުން އަނބުރާ އޮޕަރޭޝަނަށް އައިސްފައެވެ.
ފައިސާ ނުލިބިގެން މިމަހު 18 ވަނަ ދުވަހުން ފެށިގެން މަސްވެރިން ކުރަމުންދިޔަ އިހްތިޖާޖުގެ ސަބަބުން ކޫއްޑޫ އޮޕަރޭޝަން އެއްކޮށް ހުއްޓުމަކަށް އައިސް މަސް ނުކިރި، އައިސް ނުލިބި ތެޔޮ ވެސް ނުލިބި މަސްވެރިންނަށް ބޮޑު ގެއްލުންތަކެއް ވަމުންދާ ކަމަށްބުނެ، ގިނަ މަސްވެރިންތަކެއް ވަނީ ކަންބޮޑުވުން ފާޅުކޮށްފައެވެ.
އެގޮތުން ގިނަ މަސްދޯނި ތަކަކަށް މަސް ނުކިރި، އެދޯނިތަކުން ބާނާފައިވާ މަސްތައް އުކާލަން ޖެހިދާނެ ކަމަށް މަސްވެރިން ބުނެފައިވާއިރު، އައިސް އަދި ތެޔޮ ނުލިބުމުގެ ސަބަބުން މަހަށް ނުފުރިފައިވެސް ދޯނިތައް ހުރި ކަމަށް ވޮއިސް އަށް މައުލޫމާތު ދިން މަސްވެރިން ބުނެފައިވެއެވެ.
އެހެންކަމުން، އެކަމުގެ ކަންބޮޑުވުން ގިނަ މަސްވެރިން ތަކެއް ފާޅުކުރަމުންދަނިކޮށް މުޒާހަރާ ހުއްޓާލާފައި މިވަނީ މަސްވެރިންނަށް ދޭންހުރި ފައިސާގެ ތެރެއިން 70 މިލިއަން ރުފިޔާ ދިނުމުގެ މަސައްކަތް މިފްކޯއިން ފަށާފައިވަނިކޮށްކަން ފާހަގަކޮށްލަންޖެހެއެވެ. އެގޮތުން މި ދެދުވަހުގެ ތެރޭގައި 70 މިލިއަން ރުފިޔާ ދޫކުރަން ހަމަޖެހިފައިވާއިރު 30 މިލިއަން އަންނަ ހަފްތާގައި ދޫކުރަން ހަމަޖެހިފައިވާ ކަމަށް މައުލޫމާތު ލިބެއެވެ.
މީގެ އިތުރުން، މަސްވެރިކަމާއި ބެހޭ ވަޒީރު އަހުމަދު ޝިޔާމް އިއްޔެ މަޖިލީހުގައި ވިދާޅުވި ގޮތުގައި މަސްވެރިންނަށް ދޭން ހުރި ހުރިހާ ފައިސާއެއް މާރިޗު 5 ގެ ކުރިން ސަރުކާރުންދީ ޚަލާސް ކުރާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
