ހުޅުމާލެ އިންޖީނުގެ ނިއްވާލައިގެން ކުރިއަށްގެންދެވުނު މަސަައްކަތް ކާމިޔާބުކަމާއެކު ނިންމާލައިފި

ސްޓެލްކޯ ހުޅުމާލެ އިންޖީނުގެ ނިއްވާލައިގެން މިއަދު ހެނދުނު ކުރިއަށްގެންދިޔަ މަސައްކަތް ކާމިޔާބުކަމާއެކު ނިންމާލައިފިއެވެ.

ސްޓެލްކޯއިން ރޭ ވަނީ ހުޅުމާލޭ 50 މެގަވޮޓް އިންޖީނުގެ މިއަދު ހެނދުނު ނިއްވާލައިގެން މެއިންޓަނަންސް މަސައްކަތްތަކެއް ކުރިއަށްގެންދަން ނިންމާފައިވާކަމަށް ބުނެފައެވެ. އެގޮތުން މިއަދު ހެނދުނު 6 ކުން 10 އަކަށް އެކި ވަގުުތަކުގައި ކަރަންޓް ދާނޭކަމަށް އެކުންފުނިން ވަނީ ބުނެފައެވެ.

ސްޓެލްކޯއިން މިއަދު ކުރިއަށްގެންދިޔަ މަސައްކަތްތަކާ ގުޅޭގޮތުން އެކުންފުނީގެ މެނޭޖިންގ ޑިރެކްޓަރު ހުސައިން ފަހްމީ އެކްސްގައި ކުރި ޕޯސްޓެއްގައި ވިދާޅުވީ،  ހުޅުމާލޭ 50 މެގަވޮޓް އިންޖީނުގެ ނިއްވާލައިގެން މިއަދު ކުރެވުނު މޭޖަރ މެއިންޓަނަންސް މަސައްކަތް މިއަދު ހެނދުނު 08:43 ގައި ކާމިޔާބުކަމާއެކު ނިންމާލާފައިވާކަމަށެވެ. ފަހްމީ ވިދާޅުވީ ކުރިން 10 ޖަހާއިރު މަސައްކަތް ނިންމާލެވޭނޭކަމަށް ލަފާކުރިނަމަވެސް ސްޓެލްކޯގެ ޚިދުމަތްތެރި އިންޖީނިއަރުންނާއި ޓެކްނީޝަނުންގެ މަސައްކަތްތަކާއެކު ކަނޑައެޅިފައިވާ ގަޑިއަށްވުރެ ކުރިން މައްސަލަ ހައްލުކޮށް ނިންމާފައިވާކަމަށެވެ.

ފަހްމީ ވަނީ މިކަމުގައި މާލެ ސަރަހައްދުގެ ރައްޔިތުން ދިން އެއްބާރުލުން ފާހަގަކޮށް ރައްޔިތުންނަށް ޝުކުރުއަދާކުރައްވާފައެވެ.

ސްޓެލްކޯއިން ހުޅުމާލެއަށް ދެމުންގެންދާ ކަރަންޓްގެ ހިދުމަތުގެ ފެންވަރު ރަނގަޅުކުރުމަށް މިއަދު ފެށި މަސައްކަތްތަކުގައި 21 ސަބްސްޓޭޝަނަކުން ކަރަންޓް ކެނޑުނު ނަމަވެސް މާގިނަ ވަގުތުތަކެއް ނުނަގައި ވަނީ ކަރަންޓް ކެނޑުނު ތަންތަނަށް ކަރަންޓް އަލުން ދީފައެވެ. ކަރަންޓް ކެނޑުނުނުނަމަވެސް ހޮސްޕިޓަލް ފަދަ ތަންތަނުން ކަރަންޓްގެ ހިދުމަތް މެދުކެނޑިފައެއް ނުވެއެވެ.

މާލެ ސަރަހައްދުގައި ކަރަންޓް ބޭނުންކުރާ މިންވަރު އިތުރުވަމުން އަންނައިރު، ސްޓެލްކޯއިން ދަނީ ޑިމާންޑާ އެއްވަރަށް ކަރަންޓްގެ ހިދުމަތް ފުޅާކުރުމަށް މަސައްކަތްކުރަމުންނެވެ.