އިސްރާއީލުން އަނެއްކާވެސް ޣައްޒާގެ އުތުރަށް އަމާޒުކޮށް ވަރުގަދަ ހަމަލާތަކެއް ދޭން ފަށައިފި

ޣައްޒާގެ އުތުރުގައި ހަރަކާތްތެރި ވަމުންދިޔަ ހަމާސް ޖަމާއަތުގެ ހުރިހާ މުޖާހިދުން ޝަހީދުކޮށްލެވިއްޖެ ކަމަށް ބުނެ އެ ސަރަހައްދުގައި ދެމުންދިޔަ ހަމަލާތައް ހުއްޓާލުމަށް ފަހު ޔަހޫދީ ފައުޖުން އަނެއްކާ ވެސް ޣައްޒާގެ އުތުރަށް ހަމަލާތައް އަމާޒުކުރަން ފަށައިފިއެވެ.

ޣައްޒާގެ ސިވިލް ޑިފެންސް ސާވިސްގެ ތަރުޖަމާނު މަހުމޫދު ބާސެލް ވިދާޅުވީ، ގެތަކުގެ އެތެރޭގައި އާއްމުން ތިއްބާ ޔަހޫދީ ފައުޖުން ހަމަލާތައް އަމާޒުކޮށްފައިވާ ކަމަށާއި، އާއްމުންގެ ގެތަކުގެ އިތުރުން އެހެން ތަންތަނަށް ވެސް ގެއްލުންތައް ދީފައިވާކަމުގެ ރިޕޯޓް ލިބިފައިވާ ކަމަށެވެ.

ދާދި ފަހުން ޔަހޫދީ ފައުޖުން ވަނީ ޣައްޒާގެ އުތުރުގައި އޮންނަ ޖަބަލިޔާ ސަރަހައްދުގައި ތިބި ހަމާސް ޖަމާއަތުގެ މުޖާހިދުންނަށް އަމާޒުކޮށްގެން ރޭގަނޑު އޮޕަރޭޝަނެއް ހިންގާނެ ކަމުގެ އިންޒާރުދީ އެ ސަރަހައްދުގައި ދިރިއުޅެމުންދާ އަދި ބޯހިޔާވަހިކަން ހޯދަމުންދާ އާއްމުން އެ ސަރަހައްދު ދޫކޮށް، ޣައްޒާގެ ހުޅަނގަށް ދިޔުމަށް އަންގާފައެވެ.

މި އިންޒާރަށްފަހު ޔަހޫދީ ފައުޖުން ޖަބަލިޔާ އަށް ހަމަލާތައް ދޭން ފެށިިއިރު، މި ސަރަހައްދަކީ ޣައްޒާގެ ތާރީހީ 8 ރެފިއުޖީ ކޭމްޕް ހިމެނޭ ސަރަހައްދެއްކަން ފާހަގަކޮށްލަން ޖެހެއެވެ. މި ސަރަހައްދުގައި 100,000 އަށް ވުރެ ގިނަ މީހުން ބޯހިޔާވަހިކަން ހޯދަމުން އަންނައިރު،އިސްރާއީލުގެ ސިފައިން ޖަބަލިއާ ކޭމްޕަށް އަށް ވަދެ، ފުރަތަމަ ފަހަރަށް އުތުރަށް ޣައްޒާއަށް އަރައިގަތް ވަރަށް ވުރެ އަނިޔާވެރިކަމާއި އެކު އެ ސަރަހައްދުގެ ލޯކަލް މާރުކޭޓުތައް ކައިރީގައި އެމީހުންގެ ޓޭންކަރުތައް ބަހައްޓާފައިވާ ކަމަށް އެ ސަރަހައްދުގައި ދިރިއުޅެމުންދާ ފަރާތްތަކުން ވަނީ ރޮއިޓާސް އަށް މައުލޫމާތުދީފައެވެ.

ޖަބަލިޔާ ގެ އިތުރުން ޔަހޫދީ ފައުޖުން ޣައްޒާގެ ޒައިތޫން އާއި އަލް ސަބްރާ އަށް ވެސް ވަދެގަނެ ފައިވާއިރު، އެމީހުން ވަނީ ރަފާހަށް ވެސް އަރައިގަނެ، އެ ސަރަހައްދުގައިވާ ބޯޑަރުގެ ކޮންޓްރޯލް ވެސް ނަގާފައެވެ.

މިދިޔަ އަހަރުގެ އޮކްޓުބަރު މަހުގެ 7 ވަނަ ދުވަހުން ފެށިގެން ޔަހޫދީ ފައުޖުން ކެނޑިނޭޅި ދެމުންގެންދާ ލާއިންސާނީ ހަމަލާތަކުގެ ސަބަބުން ޝަހީދުވި މީހުންގެ އަދަދު 35,000 މީހުންނަށް ވުރެ މައްޗަށް އަރާފައިވާ ކަމަށް ޣައްޒާގެ ސިއްހަތާއި ބެހޭ ވުޒާރާއިން މައުލޫމާތުދެއެވެ.