މަޖިލީހުގެ ރައީސްކަމަށް ގާސިމްގެ ޝައުގުވެރިކަމެއް ނެތް: ޖޭޕީ
ރައްޔިތުންގެ މަޖިލީހުގެ ރައީސްގެ މަގާމަށް ވަޑައިގަތުމަށް ޖުމްހޫރީ ޕާޓީގެ ލީޑަރ ޤާސިމް އިބްރާހީމް ޝައުގުވެރިކަން ނުގެންގުޅޭކަމަށް ޖޭޕީގެ އިސް ތަރުޖަމާނު ޢަލީ ޞާލިޙު ވިދާޅުވެއްޖެއެވެ.
މީޑިއާތަކަށް މިއަދު ފޮނުއްވެވި މެސެެޖެއްގައި ޢަލީ މިފަދައިން ވިދާޅުވީ، ޔާމީންގެ ޕާޓީ އިން ދާދި ބަހުން ބޭއްވި ޖަލްސާއެއްގައި ޖޭޕީ ލީޑަރ ޤާސިމް އިބްރާހީމްާއާއި ބެހޭގޮތުން ދެއްކެވި ވާހަކައިގެ ރައްދުގައެވެ.
ރައްޔިތުންގެ މަޖިލީހުގެ ރައީސްގެ މަގާމު ހުސްވާން އުޅޭކަމަށް ކުރީގެ ރައީސް ޔާމީން ޢަބްދުލްޤައްޔޫމަށް ހީފުޅުވިޔަސް އެކަން ޖުމްހޫރީ ޕާޓީއަށް އެނގިފައިނުވާ ކަމަށް އޭނާ ފޮނުއްވި މެސެޖްގައި ވެއެވެ. އަމިއްލަ ހޮޅުއަށީގައި އިނދެގެން ޤާސިމާމެދު މީހުންގެ ހިތްތަކުގައި ނަފުރަތު އުފެއްދުމަށް ރައީސް ޔާމީން ދެއްކެވި ވާހަކަ ޖުމްހޫރީ ޕާޓީން ކުށްވެރިކުރާކަމަށް އޭނާ ވިދާޅުވިއެވެ.
ރައީސް ޑރ.މުހައްމަދު މުއިއްޒު ރިޔާސީބަޔާން ދެއްވި ދުވަހު މަޖިލިސްކުރާ ގޭގައި ޤާސިމް ނޫސްވެރިންނާއި ބައްދަލު ކުރެއްވީ މިއަދުގެ ސިޔާސީ މަސްރަހާއި ގައުމުގެ ހާލަތާމެދު އެމަނިކުފާނު ދެކިވަޑައިގަންނަވާ ގޮތް ހާމަކުރެއްވުމަށް ކަމަށް ޖޭޕީ އިން ވަނީ ބުނެފައެވެ. އެ ބައްދަލުވުމުގައި ޤާސިމް ވަނީ ޔާމީނަށް ފާޑު ވިދާޅުވެފައެވެ. އަދި ގައުމުގެ އިގްތިސާދީ ހާލަތު ގޯސްވީ ކުރީ ސަރުކާރުތަކުގެ ސަބަބުން ކަމަށް ގާސިމް ވިދާޅުވެފައި ވެއެވެ. އެކަމުގެ ރައްދުގައި ރައީސް ޔާމީނު ރޭ ވިދާޅުވެފައިވަނީ މަޖިލީހުގެ ރައީސްކަމުގެ މަޤާމް ގާސިމް ބޭނުންފުޅުވާކަމަށެވެ.
ޔާމީން މި މޭރުމުން ވާހަކަދައްކަވަމުންދާއިރު މަޖިލީހުގެ ރައީސް ޢަބްދުއްރަޙީމް ޢަބްދުﷲ މަޤާމުން ވަކިކުރައްވަން އުޅޭ ކަމުގެ ވާހަކަތައް ފެތުރިފައި ވެއެވެ. މި ވާހަކަ ފެތުރިފައިވަނީ އެމަނިކުފާނުގެ ދަރިކަލުން އަދި ޓޫރިޒަމް މިނިސްޓަރު ފައިސަލް އިބްރާހީމް މިނިސްޓަރުކަމުން ވަކިކުރެއްވިފަހުންނެވެ. ނަމަވެސް ޕީއެންސީގެ ޕީޖީ ލީޑަރ އިބްރާހީމް ފަލާހު ވަނީ މި ވާހަކަތައް ދޮގުކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
