އިންޖީނިއަރުންގެ ދުވަސް ފާހަގަކުރުމަށް ރާއްޖޭގެ 164 ރަށެއްގައި ސައިޓް ވިޒިޓް ހަރަކާތްތަކެއް ކުރިއަށް ގެންގޮސްފި

ދިވެހިރާއްޖޭގެ އިންޖީނިއަރުންގެ ދުވަހާ ގުޅިގެން، ރާއްޖޭގެ އެކި ކަންކޮޅުތަކުގައި ތަޢުލީމު ޙާޞިލުކުރަމުންދާ ދަރިވަރުންނަށް އަމާޒުކޮށްގެން ޚާއްޞަ ސައިޓް ވިޒިޓް ހަރަކާތްތަކެއް ކާމިޔާބުކަމާއެކު ކުރިއަށް ގެންގޮސްފިއެވެ.

ފެނަކައިން މަޢުލޫމާތު ދިން ގޮތުގައި، އިއްޔެ ހެނދުނު 9:00 ގައި ފެށި މި ހަރަކާތްތައް ރާއްޖޭގެ ސިޓީތައް ހިމެނޭހެން ޖުމްލަ 164 ރަށެއްގައި ވަނީ ކުރިއަށް ގެންގޮސްފައެވެ.

މި ޕްރޮގްރާމުގެ ދަށުން އަތޮޅުތަކުގެ ސްކޫލްތަކުގެ ދަރިވަރުން ވަނީ ފެނަކަ ކޯޕަރޭޝަން އަދި ސްޓެލްކޯގެ އިންޖީނުގެތަކަށާއި، އެމް.ޑަބްލިޔު.އެސް.ސީގެ ފެސިލިޓީތަކުގެ އިތުރުން އެމް.ޓީ.ސީ.ސީން ކުރިއަށްގެންދާ ޢުމްރާނީ ތަރައްޤީގެ އެކިއެކި މަޝްރޫޢުތަކުގެ ސައިޓުތަކަށް ޒިޔާރަތްކޮށްފައެވެ. މި ޒިޔާރަތްތަކުގައި އެ ތަންތަނުގައި އިންޖިނިއަރިންގ މަސައްކަތްތައް ހިނގަމުންދާ ގޮތް ދަރިވަރުންނަށް ޢަމަލީ ގޮތުން ކިޔައިދީފައިވާ ކަމަށް ފެނަކައިން ބުނެއެވެ.

މީގެއިތުރުން، މި ދާއިރާއާއި މަސައްކަތްތަކާ ގުޅޭގޮތުން މަޢުލޫމާތު ސާފުކުރުމާއި ސުވާލުކުރުމުގެ ފުރުޞަތު ވެސް ވަނީ ދަރިވަރުންނަށް ފަހިކޮށްދީފައެވެ.

އަތޮޅުތަކުގެ އިތުރުން، މާލެ ސަރަޙައްދުގެ ސްކޫލްތަކުގެ ދަރިވަރުންނަށް ޚާއްޞަކޮށްގެން ވަނީ ތިލަމާލެ ބްރިޖް މަޝްރޫޢުގެ ސައިޓަށް ޒިޔާރަތްކުރުމުގެ ފުރުޞަތު ދީފައެވެ. ދެ ސެޝަނަކަށް ބަހާލައިގެން ކުރިއަށް ގެންދިޔަ މި ވިޒިޓުގައި ސެންޓަރ ފޯ ހަޔަރ އެޑިއުކޭޝަން (ސީއެޗްއެސްއީ) އަދި މާލެ ވޮކޭޝަނަލް ހައި ސްކޫލުގެ 45 ދަރިވަރަކު ވަނީ ބައިވެރިވެފައެވެ.

ފެނަކައިން ފާހަގަކުރި ގޮތުގައި، މިފަދަ ސައިޓް ވިޒިޓްތަކެއް ބޭއްވުމުގެ މައިގަނޑު މަޤްޞަދަކީ ދަރިވަރުން އިންޖިނިއަރިންގ ދާއިރާއަށް އަހުލުވެރިކޮށް، އެ ދާއިރާއިން ކުރިއަށްދިއުމަށް ބޭނުންވާ މަޢުލޫމާތާއި ހިތްވަރު ދަރިވަރުންނަށް ފޯރުކޮށްދިނުމެވެ.