އެމްޕީއެލުން އިންތިޒާމްކުރާ "މޯލްޑިވްސް މެރިޓައިމް ކޮންފަރެންސް 2026" ފަށައިފި

މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) އިން އިންތިޒާމު ކުރާ "މޯލްޑިވްސް މެރިޓައިމް ކޮންފަރެންސް 2026"  މިއަދު ފަށައިފިއެވެ.

ވިލާ ނޯޓިކާގައި އެއް ދުވަހުގެ މުއްދަތަކަށް ކުރިއަށްދާ މޯލްޑިވްސް މެރިޓައިމް ކޮންފަރެންސް ހުޅުވުމުގެ ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް މުޙައްމަދު ސަޢީދުއެވެ. މިރަސްމިއްޔާތުގައި ޞިއްޙަތާއި އާޢިލާއާޢި އިޖުތިމާއީ އެހީއާ ބެހޭ ވަޒީރު، އޮނަރަބަލް ޤީލާ ޢަލީ ބައިވެރިވެވަޑައިގަތެވެ. އަދި ދައުލަތުގެ އެކި މުޢައްސަސާތަކުގެ އިސްވެރިންނާއި، ސަރުކާރު ހިއްސާވާ ކުންފުނިތަކުގެ އިސްވެރިން ބައިވެރިވަޑައިގަތެވެ.

މި ރަސްމިއްޔާތުގައި ވާހަކަދައްކަވަމުން މިނިސްޓަރ ސައީދު ވަނީ ދިވެހިރާއްޖޭގެ ޢިޤްތިޞާދުގައި އެމް.ޕީ.އެލް އިން އަދާކުރާ މުހިންމު ދައުރަށް އަޅިއަޅުއްވާފައެވެ. އަދި ބަނދަރުގެ ޚިދުމަތް ފޯރުކޮށްދިނުމަށް އެމް.ޕީ.އެލްގެ މެނޭޖްމަންޓާއި މުވައްޒަފުން ކުރަމުންދާ ބުރަ މަސައްކަތް ފާހަގަކުރައްވައި، އެމް.ޕީ.އެލްގެ މުވައްޒަފުންނަށް މިނިސްޓަރ ސައީދު ޝުކުރު އަދާކުރެއްވިއެވެ.

އެމް.ޕީ.އެލްގެ ޗީފް އެގްޒެކްޓިވް އޮފިސަރ، ކެޕްޓަން ޙުސައިން ޝަފީޤު ވިދާޅުވީ ބަނދަރުގެ އޮޕަރޭޓްކުރުމުގެ އިތުރުން އެމް.ޕީ.އެލްއަކީ މެރިޓައިމްގެ ސިނާއަތުގެ ސަލާމަތާއި ރައްކާތެރިކަމާއި ގަވަރނަންސް އަދި މީހުން ބިނާކުރުމުގައި މުހިންމު މަސައްކަތްތަކެއް ކުރަމުންދާ ކުންފުންޏެއް ކަމަށެވެ. އަދި މީހުން ބިނާކުރުމަށް އެމް.ޕީ.އެލްގެ ޕޯޓް ޓްރެއިނިންގ ސެންޓަރ (ޕީ.ޓީ.ސީ) އިން ކުރަމުންދާ މަސައްކަތްތައް ޝަފީގް ފާހަގަކުރެއްވިއެވެ.

އަޅުގަނޑު ޤަބޫލްކުރާ ގޮތުގައި ދުނިޔޭގެ ފެންވަރުގެ އޮޕަރޭޝަނަލް ސްޓޭންޑާރޑް ޤާއިމްކުރެވޭނީ މީހުން ބިނާކުރުމަށް އިންވެސްޓްކޮށްގެން. މި ފުރުސަތުގައި އަޅުގަނޑު ފަހުރުވެރިކަމާއެކު ފާހަގަކޮށްލަން ބޭނުން ޕޯޓް ޓްރެއިނިން ސެންޓަރ އިން ކުރަމުންދާ މަސައްކަތްތައް

ޝަފީގް

މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫޢު ކުރިއަށްދާއިރު، އައު ބަނދަރުގައި ޒަމާނީ ވަސީލަތްތައް ޤާއިމްކުރުމުގެ މުހިންމުކަން ޝަފީގް ފާހަގަކުރެއްވިއެވެ.