ދައުލަތުގެ ބެލުމުގެ ދަށުގައި ތިބި ކުދިން ފޯސްޓާ ކުރާ މިންވަރު ދެގުނަ އިތުރުވެއްޖެ: ވަޒީރު

’ކޮންމެ ކުއްޖަށް ޢާއިލާއެއް‘ ހޯދައި ދިނުމަށް ކުރިއަށް ގެންދާ ޕްރޮގްރާމްގެ ތެރެއިން، ކުދިން ރީއިންޓެގްރޭޓް ކުރެވޭ މިންވަރު މިދިޔަ އަހަރަށްވުރެ ދެގުނަ އިތުރުވެފައިވާ ކަމަށް އާއިލާއާ ބެހޭ ވުޒާރާގެ ވަޒީރު ޑރ. ޢައިޝަތު ޝިހާމް ވިދާޅުވެއްޖެއެވެ.

ސަރުކާރަށް ދެ އަހަރު ފުރުމާއި ގުޅިގެން، ފާއިތުވެދިޔަ ދުވަސްތަކުގައި އާއިލާއާބެހޭ ވުޒާރާއިން ކުރެވުނު މަސައްކަތްތަކާ ބެހޭ ގޮތުން ދައުލަތުގެ މީޑިއާއަށް ދެއްވި ބަސްދީގަތުމެއްގައި ވަޒީރު ވިދާޅުވީ، ދައުލަތުގެ ބެލުމުގެ ދަށުގައި ތިބުމަކީ ކުދިންނަށް އެންމެ ރަނގަޅު ގޮތް ނޫން ކަމަށެވެ.

ކުދިންނަށް އެންމެ ރަނގަޅި ޢާއިލާއެއްގެ ލޯތްބާއި އާއިލާއެއްގެ ތެރެއިން ކުދިންނަށް ދަސްވާ ހުނަރުތަކާއި އެކަންތަކުގެ ތެރޭގައި އުޅުން.

ވަޒީރު ޑރ. ޢައިޝަތު ޝިހާމް

އެހެންކަމުން ކުދިން އަނބުރާ އެކުދިނގެ އާއިލާ ތަކަށް ގެންދިޔުމަށް ގިނަ މަސައްކަތްތަކެއް ކުރެވޭ ކަމަށާ، އެ ފުރުސަތު ނެތް ނަމަ، އެކުދިން ފޯސްޓާކުރާ ކުރަން ބޭނުންވާ މީހުން ތިބި ނަމަ އެމީހުންނާ ހަވާކުކުރުމުގެ މަސައްކަތް ކުރިއަށްދާ ކަމަށް ވަޒީރު ވިދާޅުވިއެވެ. އަދި އެކަމަށް ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ލިބެމުންދާ ކަން ވަޒީރު ފާހަގަކުރެއްވިއެވެ.

މިދިޔަ އަހަރު ރީ އިންޓަގްރޭޓް ކުރެވުނު ކުދިންގެ އަދަދުގެ ޑަބަލް މިއަހަރު މިހާތަނަށް ވެއްޖެ. އެހެންވީމާ މުޖުތަމައުއިން ކުދިން ބަލައިގަންނަލެއްވެސް އަވަސް. ކުދިންނަށް ހެޔޮކަންވެސް އަވަސް. އަދި ކުދިންވެސް އެކަމަށް ތައްޔާރުވެ ތިބޭ.

ވަޒީރު ޑރ ޢާއިޝަތު ޝިހާމް

ދައުލަތުގެ ބެލެނިވެރިކަމުގެ ދަށުގައި ތިބޭ ކުދިންނަށް އާއިލީ ވެއްޓެއް ހޯދުމަށް 2023 ވނަ އަހަރުގެ ނޮވެމްބަރުމަހުގެ 17 ވަނަ ދުވަހު ސަރުކާރުން ވަނީ ހާއްސަ ޕްރޮގްރާމެއް ފަށާފައެވެ.

އެގޮތުން މިނިސްޓްރީއިން ކުރިއަށްގެންދާ ’ކޮންމެ ކުއްޖަކަށް އާއިލާއެއް‘ ޕްރޮގްރާމަކީ ދައުލަތުގެ ބެލުމުގެ ދަށުގައި ތިބި ކުދިން އަނބުރާ އާއިލާތަކަށް ގެންދިއުމާއި، ފޮސްޓިރިން ނިޒާމުގެ ތެރެއިން ކުދިންނަށް އާއިލާތައް ހޯދައިދިނުމަށް ކުރިއަށް ގެންދާ ވަރަށް ޚާއްސަ މަސައްކަތެކެވެ.

އެ ޕްރޮގްރާމުގެ ދަށުން ފޮސްޓަރިންގެ ނިޒާމު ހަރުދަނާކޮށް ވަގުތީގޮތުން ކުދިން ފޮސްޓަރކުރެވޭނެ އިންތިޒާމުވެސް މިހާރު ވަނީ ހަމަޖެހިގެން ގޮސްފައެވެ.

ފޮސްޓަރިންގެ ތެރެއިންނާއި، ރީ-އިންޓަގްރޭޝަންގެ ތެރެއިން ދައުލަތުގެ ތިބި ކުދިންނަށް އާއިލީ ވެއްޓެއް ހޯދުމަށް މިނިސްޓްރީއިން މަސައްކަތްކުރަމުން ގެންދާ އެންމެ ބޮޑު ސަބަބަކީ ކުދިންގެ ހެދިބޮޑުވުމާއި ކުދިންގެ ނަފްސާނީ އަދި އިޖްތިމާއީ ދުޅަހެޔޮކަމަށް އެންމެ ރަނގަޅީ، އާއިލީ ގުޅުންތައް ތަޖުރިބާކުރެވޭނެ ރައްކާތެރި އާއިލީ ވެއްޓެއްގައި ކުދިން ހެދިބޮޑުވުންކަމަށް އިޖްތިމާއީ އަދި އާއިލީ ތަރައްޤީއާ ބޭހޭ ވަޒީރު ޑރ ޢައިޝަތު ޝިހާމް ވަނީ ވިދާޅުވެފައެވެ.