ގަވާއިދާއި ޚިލާފަށް އުޅޭ 173 ބިދޭސީއެއް ޑީޕޯޓް ކުރުމަށް ފުލުހުން އިމިގްރޭޝަނާއި ހަވާލުކޮށްފި

ރާއްޖޭގައި ގަވާއިދާއި ޚިލާފަށް އުޅެމުންދިޔަ 173 ބިދޭސީއެއް ޑީޕޯޓް ކުރުމަށް ފުލުހުން އިމިގްރޭޝަނާއި ހަވާލުކޮށްފިއެވެ.

ފުލުހުންގެ އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް ޗީފް ސުޕްރިޓެންޑެންޓް އޮފް ޕޮލިސް އަޙްމަދު ނާފިޒު ވިދާޅުވީ ގަވާއިދާއި ހިލާފަށް ރާއްޖޭގައި އުޅޭ ހޯދުމާއި، ދިވެހިންނާއި ގުޅިގެން ހަށި ވިއްކުމުގެ ވިޔަފާރި ކުރާ ބިދޭސީން ހޯދުމުގެ ގޮތުން ހިންގި އޮޕަރޭޝަންތަކުގެ ތެރެއިން 173 ފަރާތެއް ޑީޕޯޓް ކުރުމަށް އިމިގްރޭޝަނަށް ހަވާލުކޮށްފައިވާނެ ކަމަށެވެ.

"މި ދާއިރާއިން 13 އޮޕަރޭޝަނެއް ހިނގައިފައިވާނޭ. މި މަސައްކަތުގެ ތެރެއިން 173 ފަރާތެއް އިމިގްރޭޝަންއަށް ހަވާލުކޮށްފައިވާނެ ޑީޕޯޓް ކުރުމަށް"

ނާފިޒު ވިދާޅުވިއެވެ.

ރާއްޖޭގައި ލައްކައެއްހާ ބިދޭސީން ދިރިއުޅެމުން ދާއިރު، މީގެ ތެރޭގައި ގަވާއިދާ ހިލާފަށް އުޅޭ ބިދޭސީންވެސް ގިނަކަން ފާހަގަ ކޮށްލަން ޖެހެއެވެ.

ސަރުކާރުން ދަނީ ގަވައިދާ ހިލާފައް އުޅޭ ބިދޭސީން ހޯދާ އެފަދަ މީހުން އަނބުރާ ގައުމަށް ފޮނުވާލުމުގެ މަސައްކަތް ކުރަމުންނެއެވެ.

މިގޮތުން ދިވެހިރާއްޖޭގައި ޤަވައިދާއި ޚިލާފަށް އުޅޭ ބިދޭސީންގެ ތެރެއިން ކުށަށް އަރައިގަންނަ ބިދޭސީން ވަގުތުން ޑީޕޯޓްކުރާނެ ކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު އަލީ އިޙްސާން ވަނީ ވިދާޅުވެފައެވެ. އަދި އަމާޒަކީ އެއް އަހަރު ދުވަސްތެރޭގައި ރާއްޖޭގައި ތިބި ހުރިހާ ބިދޭސީންގެ ފިންގަ ޕްރިންޓް ނެގި، އެމީހުންނަކީ ޤާނޫނީ އިމުގެ ތެރެއަށް ވެއްދިފައިތިބި މީހުންކަން ކަށަވަރު ކުރުން ކަމަށް ވެސް ވަޒީރު ވިދާޅުވިއެވެ.

މީގެ އިތުރުންވެސް އިޤްތިސާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވެސް ވަނީ ރާއްޖޭގައި ޤަވާއިދާއި ޚިލާފަށް އުޅޭ ބިދޭސީން ހިންގާ ވިޔަފާރިތައް ހުއްޓުވުމަށް ކުރެވެން އޮތް ހުރިހާ މަސައްކަތެއް ކުރައްވާނެކަމަށް ވިދާޅުވެފައެވެ.