ރައީސް މައުމޫނުގެ ވާހަކަފުޅަށް ޝެއިޙް ސަމީރު ރައްދު ދެއްވައިފި

އެއްވެސް ސަބަބަކާހުރެ ރާއްޖޭގައި މަރުގެ އަދަބު ދޭން ފެށުމަކީ ފެންނަ ކަމެއް ނޫން ކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވި ވިދާޅުވުމަށް މަޝްހޫރު ދީނީ އިލްމުވެރިޔާ އަދި ސަލަފު ޖަމުޢިއްޔާގެ އިލްމުވެރިންގެ ރައީސް އައްޝައިޙް އަޙްމަދު ސަމީރު ވަރުގަދަ ރައްދެއް ދެއްވައިފިއެވެ.

ރާއްޖެގައި އިސްލާމް ދީނަށް ލޯބިކުރާ ގިނަބައެއްގެ އިހްތިރާމާއި ލޯބި ހޯއްދަވާފައިވާ ޝެއިހް ސަމީރުގެ އެކްސް ޕޯސްޓުގައި ބުނެފައިވަނީ  ޤިޞާޞް ގެ ޢުޤޫބާތައް އިންކާރު ކުރާމީހުންގެ ބުއްދިއާ މެދުވެސް ސުވާލު އުފެދޭ ކަމަށެވެ. އަދި އެއީ ހޭބުއްދި ހުރި މުސްލިމުން ދައްކާނެ ވާހަކައެއް ނޫން ކަމަށެވެ.

"ޤިޞާޞް ގެ ޢުޤޫބާތަކީ އިންސާނިއްޔަތަށްވާ ދިރުމެއްކަން ބަޔާންކުރެއްވި އާޔަތުގައި، ބުއްދީގެ އަހުލުވެރިންނާ  މުޚާޠަބު ކުރައްވާފައިވުމުން، އެޙުކުމަށް އިންކާރު ކުރާމީހުންގެ ބުއްދިއާ މެދުވެސް ސުވާލު އުފެއެވެ. އެއި ހޭބުއްދިވާ އިސްލާމުން  ދައްކާނެ ވާހަކައެއް ނޫނެވެ!" ޤުރުއާނުގެ އާޔަތުން ހެކި ދައްކަވަމުން އެކްސް ޕޯސްޓުގައި ށެއިޙް ސަމީރު ލިޔުއްވާފައި ވެއެވެ.

ރާއްޖެއަށް ބޮޑު އަދަދުން މަސްތުވާތަކެތި އެތެރެކުރާ މީހުންނަށް މަރުގެ އަދަބު ދޭންޖެހޭ ކަމަށް ޕީއެންސީގެ ޓިކެޓްގައި މާލޭ މޭޔަރ ކަމަށް ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރު ވިދާޅުވުމާއި ގުޅިގެން އެކަމާއި ދެކޮޅަށް "އެކްސް" ގައި ކުރެއްވި ޕޯސްޓެއްގައި މައުމޫން ވިދާޅުވީ، އެއްވެސް ސަބަބަކާހުރެ ރާއްޖޭގައި މަރުގެ އަދަބު ދޭން ފެށުމަކީ ފެންނަ ކަމެއް ނޫން ކަމަށާއި، އަދި އާންމުންގެ ތާއީދު ހޯދުމަށް އެފަދަ ވާހަކަ ދެއްކުމަކީ ތައުލީމީ މީހަކު ކޮށްގެންވާނެ ކަމެއް ވެސް ނޫން ކަމަށެވެ.

މައުމޫނުގެ މިވާހަކައާއި ގުޅިގެން ގިނަބަޔަކު ގެންދަނީ އެމަނިކުފާނަށް ވަރަށް ބޮޑަށް ފާޑުކިޔަމުންނެވެ.