އަލިފާން ނިއްވާ ސައިކަލު ތައާރަފް ކުރަނީ

ތޮއްޖެހިފައިވާ މާލޭގެ ހަނިގޯޅިތަކަށް އެމްއެންޑީއެފް ފަޔާ އެންޑް ރެސްކިއު އިން އަލިފާން ނިއްވާ ވެހިކަލްތަކަށް ނުވަދެވޭތީ މިކަމަށް ހައްލެއް ގެނައުމަށް އަލިފާން ނިއްވާ ސައިކަލް ތައާރަފްކުރަން ނިންމައިފިއެވެ.

މިކަން އިއުލާން ކުރައްވާ އިއްޔެ ނޫސްވެރިންނަށް މައުލޫމާތު ދެއްވަމުން އެމްއެންޑީއެފް ފަޔާ އެންޑް ރެސްކިއުގެ ފަރާތުން ކާނަލް އަބްދުﷲ ޒުހުރީ ވިދާޅުވީ މީގެ ސަބަބުން އަލިފާން ނިއްވާ އާލާތްތައް އަވަހަށް ފޯރުކޮއްދިނުމަށް މަގުފަހިވެގެން ދާނެކަމަށެވެ.

ކާނަލް އަބްދުﷲ ޒުހުރީ އިތުރަށް ވިދާޅުވީ މިސައިކަލުގައި އަލިފާން ނިއްވުމަށް ބޭނުންވާނެ އާލާތްތަކާއި، އަލިފާން ރޯވެފައިވާ ތަނެއް އިތުރަށް ފެތުރުން ހުއްޓުވޭނެ އާލާތްތައް ހަރުކުރެވިފައި ހުންނާނެކަމަށެވެ.

އަލިފާން ނިއްވާ ސައިކަލުގެ ހިދުމަތް އާންމުކޮށް ބޭނުންކުރަން ފަށާނީ މިއަދު އެމްއެންޑީއެފް ފަޔާ އެންޑް ރެސްކިޔު އިން ފަށަން ހަމަޖެހިފައިވާ އެކްސަސައިޒް ޖައްރާފާގައި އަލިފާން ނިއްވާ ސައިކަލު ބޭނުންކުރުމަށް ފަހު ކަމަށް އަބްދުﷲ ޒުހުރީ ވިދާޅުވިއެވެ.

އެމްއެންޑީއެފް ފަޔާ އެންޑް ރެސްކިއު މާލޭ ސްޓޭޝަންގައި އިއްޔެ ހެނދުނުވަނީ އަމަލީގޮތުން އަލިފާން ނިއްވާ ސައިކަލު މަސައްކަތް ކުރާނެ ގޮތް ނޫސްވެރިންނަށް ދައްކާލައިފައެވެ.