މިދިޔަ ސަރުކާރުގައި، މިސްކިތްތަކަށް ގެއްލުންދީގެން ފިޔަވަޅެއް ނާޅާ: ޤާސިމް

އެމްޑީޕީ ސަރުކާރުގައި މިސްކިތްތަކަށް ގެއްލުންދިން ފަރާތްތަކާމެދު ފިޔަވަޅުއަޅާފައި ނުވާ ކަމަށް ޖޭޕީގެ ލީޑަރު އަދި މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާހީމް ވިދާޅުވެއްޖެއެވެ.

ޤާސިމް މިހެން ވިދާޅުވެފައިވަނީ، މިސްކިތަށް ގެއްލުންދިނުމަކީ ޓެރަރިޒަމްގެ އަމަލަކަށް ހަދަން ޓެރަރިޒަމް މަނާކުރުމުގެ ޤާނޫނަށް ހުށަހެޅި އިސްލާހަށް ބަހުސްކުރައްވަމުންނެވެ. މި އިސްލާޙް ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް (ކުޑޫ) އެވެ.

މަޖިލީހުގެ މިއަދުގެ ޖަލްސާގައި އެ އިސްލާހަށް ވާހަކަ ދައްކަވަމުން ޤާސިމް ވިދާޅުވީ، މިސްކިތްތަކަށް ގެއްލުންދޭ މީހުންނަށް އަދަބު ދިނުމަކީ އާއްމު ގާނޫނޫގެ ތެރެއިން ކުރިންވެސް މިހާރުވެސް ކުރެވެން އޮންނަ ކަމެއް ކަމަށެވެ. އަދި އެކަމަށް ވަކި ޤާނޫނެއް ހަދަން ނުޖެހޭ ކަމަށެވެ.

ހަގީގަތުގައި ވަކި ގާނޫނެއް ހަދާކަށެއް ނުވެސްޖެހޭ. އާންމު ގާނޫނުތަކުގެ ތެރެއިން އެކަމަށް ބޭނުންވެއްޖިއްޔާ ނުވަތަ ދައުލަތަށް ފެނިވަޑައިގެންފިއްޔާ ނުވަތަ އެކަން ކުރައްވަން ޖެހޭގޮތަށް މިހާރުވެސް އާންމު ގާނޫނުތަކުން ހުރި ކަންތައްތަކެއް އެބަހުރި.

މިއާއެކު ޤާސިމް ވިދާޅުވީ، ނިމިދިޔަ ސަރުކާރުގައިވެސް މިސްކިތްތަކަށް ގެއްލުންދޭ މައްސަލަތައް ފެންމަތިވި ކަމަށެވެ. އަދި އޭރުވެސް ގާނޫނުގެ ތެރެއިން އެފަރާތްތަކަށް ފިޔަވަޅު އެޅެން އޮތް ކަމަށާ އެހެން ނަމަވެސް އެ ސަރުކާރުން އެކަން ކޮށްފައި ނުވާ ކަމަށް ޤާސިމް ވިދާޅުވިއެވެ.

އެހެންވީމާ އަޅުގަނޑު ދަންނަވާލަން މިއުޅެނީ، އެކަން އެހެން އޮއްވާ، އާންމު ގާނޫނުތަކުގެ ތެރެއިން އެމީހެއްގެ މައްޗަށް ދައުވާކުރެވެން އޮއްވާ އިސްވެދިޔަ ސަރުކާރުގައި، މިސްކިތްތަކަށް އިހާނެތި އަމަލުތަކެއްކުރި މީހުންނަށް އެ އަދަބު ދިންތޯއޭ. އަޅުގަނޑު ދަންނަވަން އޮތީ އެކަން ނުކުރައްވައޭ. އެކަން ކުރައްވާފަ އޮތް ކަން އަޅުގަނޑުމެންނަށް އެނގޭކަށެއް ނެތް

މާމިގިލީ ދާއިރާގެ މެންބަރު ޤާސިމް އިބްރާހިމް

މިސްކިތްތައް ނޭޅި ލަސްވާ ކަމަށްބުނެ އިދިކޮޅު ފަރާތްތަކުން ސަރުކާރަށް ފާޑުވިދާޅުވަމުންދާތީ އެކަމަށް ރައްދުދެއްވައި ޤާސިމް ވިދާޅުވީ، މިސްކިތްތައް އެޅޭނީވެސް އަދި މަރާމާތު ކުރެވޭނީވެސް އެކަމަށް ބޭނުންވާ ފައިސާ ހުރެގެން ކަމަށެވެ.

މީގެ އިތުރުން ނިމިދިޔަ ތިން ސަރުކާރުން ދައުލަތް ދަރުވާލާފައިވާ ކަމަށާ، އެކަމުގެ ބުރަ މި ސަރުކާރަށް އުފުލަންޖެހިފައިވާ ކަަމަށެވެ. އެހެންކަމުން، މި ސަރުކާރުން އެކި ގޮތްގޮތުން ފައިސާ ހޯދައިގެން އެ ބޮޑު ދަރަނިން ސަލާމަތްވެވޭތޯ މަސައްކަތް ކުރަމުންދާކަމަށްވެސް ޤާސިމް ވިދާޅުވި އެވެ.